मुंबई : आयफा अवॉर्ड्स २०२५ सोहळा राजस्थानमध्ये आयोजित करण्यात आला आहे. बॉलीवूडच्या विविध नामांकित सेलिब्रिटी राजस्थानला पोहोचत असून तेथील काही खास क्षण सोशल मीडियावर व्हायरल होत आहेत. त्यात एक व्हिडीओ सर्वाधिक चर्चेत आहे, ज्यामध्ये अभिनेता शाहिद कपूर आणि अभिनेत्री करीना कपूर यांची भेट होताना दिसत आहे.
शाहिद कपूर आणि करीना कपूर यांचं ब्रेकअप १८ वर्षांपूर्वी झालं होतं. ब्रेकअपनंतर या दोघांनी एकमेकांबरोबर काम करणं तर दूरच, एकमेकांना सामोरे जाणे देखील टाळले होते. मात्र, आयफा अवॉर्ड्सच्या मंचावर या दोघांची भेट घडली आणि त्यानंतर एक अप्रत्याशित दृश्य दिसले. व्हिडीओत शाहिद आणि करीना एकमेकांची गळाभेट घेताना आणि गप्पा मारताना दिसत आहेत. हा व्हिडीओ पाहून ‘जब वी मेट’ या चित्रपटाच्या चाहत्यांना आश्चर्याचा धक्काच बसला आहे.
व्हिडीओचा सोशल मीडियावर धुमाकूळ
आयफा अवॉर्ड्समध्ये शाहिद आणि करीना यांची अचानक भेट झाल्याने सोशल मीडियावर त्यांचा व्हिडीओ मोठ्या प्रमाणात व्हायरल झाला आहे. शाहिद आणि करीना एकमेकांसमोर आले, त्यांनी एकमेकांना मिठी मारली आणि नंतर बराच वेळ गप्पा देखील मारल्या. चाहत्यांनी या व्हिडीओवर अनेक दिलखुलास कमेंट्स केल्या आहेत. या व्हिडीओमुळे ‘जब वी मेट’ या लोकप्रिय चित्रपटाच्या चाहत्यांमध्ये आनंदाची लाट आहे. या चित्रपटात शाहिद कपूर आणि करीना कपूर यांनी मुख्य भूमिका साकारली होती, आणि त्यातील त्यांची रोमँटिक केमिस्ट्री आजही चाहत्यांच्या मनात घर करून आहे. या व्हिडीओमुळे त्यांच्या किमान ‘फ्रेंडली’ नात्याचे संकेत मिळाले आहेत, ज्यामुळे अनेक चाहते खुश झाले आहेत.
View this post on Instagram
“गीत आणि आदित्यचं अखेर रियुनियन झालं!”
“या दोघांना एकत्र पाहून खूप बरं वाटतंय!”
“या दोघांना पाहून माझ्या डोळ्यांतून आनंदाश्रू आले.”
“ते दोघे बोलतायत आणि मला आनंद होतोय.” अशा अनेक कमेंट चाहत्यांनी केल्या आहेत.
या व्हिडीओमुळे त्यांच्या चाहत्यांना आशा आहे की कदाचित त्यांना भविष्यात एकत्र काम करताना पाहता येईल.
