मुंबई : ‘मिर्झापूर-2’ वेबसिरीजमध्ये ललितची भूमिका साकारणारा ब्रह्म मिश्रा याचे त्याच्या अंधेरीतील राहत्या घरात निधन झाले आहे. गेल्या चार वर्षापासून तो मुंबईतील अंधेरी येथे भाड्याच्या घरात एकटाच राहत होता. हृदयविकाराच्या झटक्याने त्याचा मृत्यू झाल्याची शक्यता व्यक्त केली जात आहे.
मिळालेल्या माहितीनुसार, २९ नोव्हेंबरला त्याच्या छातीत दुखत होतं, त्यामुळे तो डॉक्टरांकडेही गेला होता. डॉक्टरांनी त्याला गॅसेसची औषध देऊन घरी जाण्यास सांगितले होते. आज अभिनेत्याच्या शेजारच्यांनी दुर्गंधी येत असल्याने पोलिसांना याबाबत सूचना दिली. ब्रम्ह मिश्रा घराचं दार उघडत नव्हता. त्यामुळे चावीवाल्याला बोलावून दार उघडण्यात आलं. दरम्यान पोलिसांना बाथरूममध्ये मिश्रा पालथा पडलेला आढळला. त्याचा मृतदेह कुजलेल्या अवस्थेत होता. त्यानंतर त्याचा मृतदेह पोस्टमॉर्टमसाठी कूपर इस्पितळात पाठवण्यात आला.
मिर्झापूर या वेबसिरीजमध्ये ललितची भूमिका साकारणाऱ्या ब्रह्म मिश्रा यांचा सहकारी कलाकार दिव्येंदू शर्माने इंस्टाग्रामवर ललितचा फोटो शेअर करत दु:खद बातमी शेअर केली. ही बातमी समजल्यानंतर चाहत्यांना धक्का बसला आहे. दिव्येंदूने ब्रम्ह मिश्राचा स्वतःसोबतचा एक फोटो शेअर करत आमचा ललित आता या जगात नाही अशी पोस्ट लिहिली आहे.
View this post on Instagram
मूळचा भोपाळचा असलेला ब्रह्म मिश्राचे लहानपणापासूनच अभिनेता होण्याचे स्वप्न होते. 2013 मध्ये ‘चोर चोर सुपर चोर’ या चित्रपटाद्वारे त्याने बॉलिवूडमध्ये पदार्पण केले. यानंतर त्याने अक्षय कुमारच्या केसरी या चित्रपटातही ‘खुदाद खान’ची भूमिका साकारली होती.
