१ ऑगस्टपासून होणार ‘हे’ ६ आर्थिक बदल, सर्वसामान्यांच्या खिशावर थेट परिणाम

नवी दिल्ली : ऑगस्ट २०२५ मध्ये देशात काही महत्त्वाचे आर्थिक बदल होणार आहेत. क्रेडिट कार्डच्या अटींपासून ते यूपीआयच्या नियमांपर्यंत, एलपीजी आणि एटीएफ दरांपासून ते बँक सुट्ट्यांपर्यंत – हे बदल थेट सामान्य नागरिकाच्या रोजच्या खर्चावर परिणाम करू शकतात. अशाच ६ बदलांची सविस्तर माहिती घेऊयात.

१. एसबीआय को-ब्रँडेड क्रेडिट कार्डवरील विमा कव्हर बंद
जर तुम्ही एसबीआय को-ब्रँडेड क्रेडिट कार्डधारक असाल, तर ११ ऑगस्ट २०२५ पासून तुम्हाला मोठा धक्का बसू शकतो. एसबीआय युको बँक, सेंट्रल बँक, पीएसबी, करूर वैश्य बँक आणि अलाहाबाद बँक यांसारख्या संस्थांच्या एलिट आणि प्राइम कार्डधारकांना मिळणारे मोफत हवाई अपघात विमा कव्हर (₹५० लाख ते ₹१ कोटी पर्यंत) बंद करण्यात येणार आहे.

२. एलपीजीच्या किमतीत संभाव्य बदल
प्रत्येक महिन्याच्या १ तारखेला एलपीजी किंवा कमर्शियल सिलेंडरच्या किमतीत बदल होतो. जुलै २०२५ मध्ये कमर्शियल सिलेंडर ₹६० ने स्वस्त झाला होता. यानंतर १ ऑगस्टपासून घरगुती एलपीजी सिलेंडरच्या किमतीत कपात अपेक्षित आहे. हे बदल महागाईशी थेट संबंधित असल्याने घरगुती बजेटवर परिणाम करू शकतात.

३. यूपीआय व्यवहारांवर मर्यादा लागू
एनपीसीआय (राष्ट्रीय पेमेंट कॉर्पोरेशन ऑफ इंडिया) ने १ ऑगस्टपासून यूपीआय व्यवहारांमध्ये मर्यादा घालण्याचा निर्णय घेतला आहे. या मर्यादांचा उद्देश सर्व्हरवरील लोड कमी करणे आणि सेवा अधिक स्थिर ठेवणे आहे.

नवीन नियम पुढीलप्रमाणे:

• दिवसातून फक्त ५० वेळा बॅलन्स चेक करता येणार.
• २५ वेळा बँक खाते तपासणी करता येणार.
• ऑटोपे व्यवहार (जसे नेटफ्लिक्स, म्युच्युअल फंड हप्ते) तीन विशिष्ट स्लॉटमध्येच प्रोसेस होतील – सकाळी १० पूर्वी, दुपारी १ ते संध्याकाळी ५, आणि रात्री ९:३० नंतर.
• दिवसातून फक्त ३ वेळा अयशस्वी व्यवहारांची स्थिती तपासू शकता आणि प्रत्येक वेळेस ९० सेकंदांचे अंतर अनिवार्य असेल.

४. सीएनजी आणि पीएनजीच्या दरात संभाव्य बदल
सीएनजी व पीएनजीच्या किमती दर महिन्याला बदलण्याची परंपरा असली, तरी एप्रिल २०२५ पासून त्यात बदल झाला नव्हता. मागील बदल ९ एप्रिल रोजी झाला होता. सध्या मुंबईत सीएनजी ₹७९.५०/किलो व पीएनजी ₹४९/युनिट आहे. १ ऑगस्टपासून नवीन दर लागू होण्याची शक्यता असून, हे दर बदल ग्राहकांच्या वाहतूक व स्वयंपाकाच्या खर्चावर थेट परिणाम करू शकतात.

५. बँक सुट्ट्यांचा परिणाम व्यवहारांवर
रिझर्व्ह बँक ऑफ इंडिया दर महिन्याला बँक सुट्ट्यांची यादी जाहीर करते. ऑगस्ट महिन्यातही काही सण, प्रादेशिक सुट्ट्या व आठवड्याचे शेवटचे दिवस यामुळे बँका ठरावीक दिवशी बंद राहतील. त्यामुळे तुमचे व्यवहार, चेक क्लिअरिंग आणि बँकिंग सेवा यावर परिणाम होऊ शकतो. सुट्ट्यांची यादी राज्यानुसार वेगळी असते.

६. एटीएफ (एअर टर्बाइन फ्युएल) दरात बदल
एलपीजीप्रमाणेच, एअर टर्बाइन फ्युएलच्या (ATF) किमती देखील महिन्याच्या १ तारखेला बदलतात. एटीएफचे दर फ्लाइट तिकिटांच्या किमतींवर थेट परिणाम करतात. त्यामुळे १ ऑगस्टपासून हवाई प्रवास करणाऱ्यांसाठी तिकिटांच्या किमतीत वाढ किंवा कपात होण्याची शक्यता आहे.