हिमाचल प्रदेश सरकारच्या मान्यतेनंतर आज (शनिवार) सकाळी धर्मगुरू दलाई लामा यांना कोरोना लस देण्यात आली. जिल्हा कांगडा आरोग्य विभागाच्या वतीने राज्यात वयोवृद्ध लोकांसाठी सुरु असलेल्या कोरोना लस मोहिमेअंतर्गत धर्म गुरू दलाई लामा यांना लस देण्यात आली.
तिब्बती प्रशासनाने दोन महिन्यांपूर्वी कोरोना लस मिळावी यासाठी विनंती केली होती. यानंतर आरोग्य विभागाने सरकारकडे प्रस्ताव पाठविला. विभागाच्या प्रस्तावावर शासकीय मान्यतेनंतर दलाई लामाला आज सकाळी प्रादेशिक रुग्णालय धर्मशाला येथे कोरोना लसीचा पहिला डोस देण्यात आला.
लसीकरणानंतर दलाई लामा यांनी सर्व लोकांना लस घेण्याचा संदेश दिला. दलाई लामा म्हणाले कि, “कोरोनाशी लढण्यासाठी कोरोनाची लस अत्यंत प्रभावी आहे. सर्व लोकांनी ही लस घेण्यासाठी पुढे यावे.” दलाई लामा यांच्या लसीकरणानंतर आता त्यांचे 70 हून अधिक कर्मचारी आणि अनुयायी यांचेदेखील लसीकरण केले जाणार आहे.
