पुणे : विमाननगर भागात अतिशय संतापजनक घटना घडली आहे. एका हॉटेलच्या सुरक्षारक्षकाने पाच वर्षाच्या चिमुकलीवर बलात्कार केला. या प्रकरणी पोलिसांनी दिलीपकुमार गोस्वामी नावाच्या २0 वर्षीय आरोपीला अटक केली आहे. पीडित चिमुकलीवर सध्या उपचार सुरू आहेत.
मिळालेल्या माहितीनुसार, पीडित मुलगी आणि तिचे आई वडील एका लेबर कॅम्पमध्ये राहतात. आई वडील कामावर गेल्यानंतर आरोपीने या मुलीला घराबाहेर बोलवून घेतलं. त्यानंतर आरोपी ज्या हॉटेलमध्ये सुरक्षा रक्षक म्हणून काम करतो, त्याच्या बाजूला असलेल्या पार्किंगमध्ये तिला घेऊन गेला. तिथे नेऊन त्याने तिच्यावर अत्याचार केला. या धक्कादायक घटनेनंतर पीडित चिमुकली अतिशय घाबरलेल्या अवस्थेत घरी गेली.
मुलीची आई कामावरून घरी आली होती. मुलीची अवस्था पाहिल्यानंतर आईने चौकशी केली. तेव्हा तिने आईला घडलेली हकिकत सांगितली. त्यानंतर मुलीची आई तात्काळ पोलीस स्टेशनमध्ये गेली आणि पोक्सो अंतर्गत गुन्हा दाखल केला. पोलिसांनी कारवाई करत आरोपीला ताब्यात घेतलं. पीडित चिमुकलीवर सध्या रुग्णालयात उपचार सुरू आहेत.
