हैदराबाद : जुन्या शहरातील मुगल पुरा पोलिस ठाण्याच्या हद्दीतील गौलीपुरा येथे श्रीनिवास हायस्कूलच्या दुमजली इमारतीत गुरुवारी दुपारी भीषण आग लागली. प्राथमिक अंदाजानुसार, शॉर्ट सर्किटमुळे ही आग लागली. सुमारे 50 विद्यार्थ्यांना सुखरूप बाहेर काढण्यात आलं आहे.
वृत्तानुसार, शॉर्ट सर्किटमुळे तळमजल्यावर असलेल्या शाळेच्या प्रशासकीय कार्यालयात ही आग लागली. यात शाळेच्या नोंदी, पुस्तके व फर्निचर जाळून खाक झाले. सुदैवाने, कोणतीही जीवितहानी झाली नाही. आग पसरण्यापूर्वी शाळेतील सुमारे 50 विद्यार्थ्यांना वाचविण्यात आले. शालेय कर्मचारी व स्थानिकांनी तातडीने सर्व विद्यार्थ्यांची सुटका केली. घटनेची माहिती मिळताच अग्निशमन दल घटनास्थळी दाखल झाले आणि आगीवर नियंत्रण मिळवले.
