राजस्थानमधील दौसा येथे अतिशय धक्कादायक घटना उघडकीस आली आहे. एका ढाब्याच्या मालकाने एकाच कुटुंबातील चार महिलांवर बलात्कार केल्याची घटना घडली आहे. या आरोपीविरोधात पोलिसांनी बलात्काराच्या गुन्ह्यांची नोंद केली आहे.
मिळालेल्या माहितीनुसार, दौसा येथे राहणाऱ्या या महिलांवर ढाबा चालक विष्णू गुर्जर याने बलात्कार केला. पीडित महिलेने पोलीस ठाणे गाठून त्याच्याविरोधात तक्रार दाखल केली. पोलिसांत तक्रार दाखल केल्यानंतर या महिलेच्या मुलीने आणि तिच्या दोन लहान बहिणींनी त्यांच्यावर देखील आरोपीने जबरदस्ती केल्याचे सांगितले. २१ जानेवारी रोजी महिलेने आरोपी गुर्जर याच्याविरोधात तक्रार दाखल केली होती. त्याच दिवशी महिलेच्या लहान बहिणीने तक्रार दाखल केली. २३ जानेवारीला महिलेच्या दुसऱ्या बहिणीने पोलीस ठाण्यात आरोपीविरोधात बलात्काराची तक्रार केली. त्यानंतर २४ जानेवारीला महिलेच्या मुलीने आरोपीविरोधात बलात्काराची तक्रार दिली.
माहितीनुसार, आरोपीने आधी पीडित महिलेच्या घरातील अन्य सदस्यांशी ओळख वाढवली. त्यानंतर त्याने महिलेसह तिच्या दोन बहिणी आणि मुलीला प्रेमाच्या जाळ्यात ओढले. त्याने या चौघींवर बलात्कार केला. पोलिसांनी आरोपीविरोधात बलात्कार केल्याप्रकरणी चार गुन्हे नोंदवले आहेत. पोलीस या प्रकरणाचा अधिक तपास करत आहेत.
