17 year old boy killed in chopper attack in Pune
पुणे : पुण्यातील रामटेकडी परिसरात मंगळवारी (३ डिसेंबर) सकाळी झालेल्या एका प्राणघातक हल्ल्यात १७ वर्षीय यश सुनील घाटे या तरुणाचा मृत्यू झाला. हल्ला जुन्या वादातून करण्यात आला होता. याप्रकरणी, पोलिसांनी साहिल लतीफ शेख (18) आणि ताहीर खलील पठाण (18, दोघे रा. रामटेकडी, हडपसर) या दोघांना अटक केली आहे.
पोलिसांनी दिलेल्या माहितीनुसार, रामटेकडी येथील जामा मशिदीजवळ सकाळी ७ वाजण्याच्या सुमारास ही घटना घडली. वानवडी येथील यश हा त्याचा मित्र आदित्य चव्हाण, रेहान पठाण आणि श्रेयस शिंदे यांच्यासोबत कॉलेजकडे जात असताना मागून आलेल्या दोन आरोपींनी त्याच्यावर चॉपरने वार केले. या हल्ल्यात यश गंभीर जखमी झाला. त्याला जवळच्या रुग्णालयात नेण्यात आले, मात्र डॉक्टरांनी त्याला मृत घोषित केले.
पोलिसांनी तत्परतेने कारवाई करत गुन्ह्याच्या काही तासांतच दोन आरोपींना पकडले. पोलिसांनी सांगितले कि, यश आणि आरोपी यांच्यातील पूर्वीच्या भांडणातून हा हल्ला झाल्याचे प्राथमिक तपासात दिसून येते. आरोपींची पुढील चौकशी सुरू असून पोलीस या प्रकरणाचा तपास करत आहेत.
