एनसीबीकडून अभिनेत्री रिया चक्रवर्तीला अटक करण्यात आली आहे. एनसीबी च्या सूत्रांनी दिलेल्या माहितीनुसार रियाने चौकशीदरम्यान ड्र्ग्स घेतल्याचं कबूल केलं आहे. सुशांत आणि त्याच्या मित्रांसोबत अनेकदा ड्रग्स घेतल्याचंही तिने मान्य केलं आहे. अटकेनंतर आता रियाची मेडिकल टेस्ट केली जाणार आहे.
गेल्या तीन दिवसांपासून एनसीबी रियाची सतत चौकशी करत होती. सध्या एनसीबी कार्यालयाच्या बाहेरील पोलीस बंदोबस्त वाढवण्यात आला आहे. आरोपीला अटक केल्यानंतर त्याची कोव्हिड चाचणी केली जाते. त्यासाठी रियाला सायन रुग्णालयात नेण्यात आले आहे.
पुरावे मिळाल्यानंतर रियाला अटक करण्यात आली आहे, असं बिहारचे डीजीपी गुप्तेश्वर पांडे यांनी म्हटलं आहे. रियाचे ड्रग्स माफियांसोबत संबंध असल्याचंही उघड झालं आहे. रिया सराईत गुन्हेगार नसल्याने तिला रिमांडची गरज नाही, असं एनसीबीचे उपसंचालक केपीएस मल्होत्रा यांनी म्हटलं आहे.
