पुणे : पुण्यातल्या मुळशी आणि मावळ तालुक्यातील सीमेवर असणाऱ्या तैल-बैल गडावर रविवारी एक दुर्दैवी घटना घडली आहे. तैल-बैल गडावर ट्रेकींग करत असताना रोप तुटल्याने २०० फूट खाली कोसळून एका ट्रेकर्सचा दुर्दैवी मृत्यू झाल्याची घटना समोर आली आहे. सोमनाथ बळीराम शिंदे (वय २५) असे मृत पावलेल्या ट्रेकर्सचे नाव आहे.
मिळालेल्या माहितीनुसार, सोमनाथ हा त्याच्या नऊ मित्रांसोबत ट्रेकिंगसाठी तैल-बैल गडावर गेला होता. चढाई करत असताना बांधलेला रोप अचानक तुटल्यामुळे तो खाली २०० फूट दरीत कोसळला. या घटनेत त्याच्या डोक्याला गंभीर दुखापत झाल्याने त्याचा जागेवरच मृत्यू झाला. सोमनाथ हा पुण्यातील कात्रज परिसरातील रहिवासी होता. त्याला आधीपासून ट्रेकिंगची आवड होती. सोमनाथचा मृत्यू झाल्याने सर्वत्र हळहळ व्यक्त करण्यात येत आहे.
