दिल्ली : राजस्थान पोलिसांनी एका 46 वर्षीय हिंदू निर्वासिताला पाकिस्तानसाठी हेरगिरी केल्याच्या आरोपाखाली दिल्लीतून अटक केली आहे. 2016 मध्ये भारतीय नागरिकत्व मिळवलेल्या या व्यक्तीवर हेरगिरी केल्याचा आरोप आहे. यापूरच्या सीआयडी गुप्तचर पोलिसांनी ही कारवाई केली. अटक करण्यात आलेल्या व्यक्तीचे नाव भागचंद असून त्याचा जन्म पाकिस्तानात झाल्याचे पोलिसांनी सांगितले.
भागचंद 1998 मध्ये आपल्या कुटुंबासह दिल्लीत आला आणि दिल्लीच्या संजय नगरमध्ये राहत होता. त्याला 2016 मध्ये भारतीय नागरिकत्व मिळाले आणि तो दिल्लीतच टॅक्सी चालक आणि मजूर म्हणून काम करू लागला. परंतु आता तो पाकिस्तानी गुप्तचर संस्थांसाठी हेरगिरी करत असल्याची माहिती मिळाली आहे.
पाकिस्तानी गुप्तचर संस्थांसाठी करायचा हेरगिरी
सध्या जयपूरच्या सीआयडी इंटेलिजन्स पोलिसांनी त्याला पाकिस्तानी गुप्तचर संस्थांसाठी हेरगिरी केल्याप्रकरणी अटक केली आहे. डीजी (इंटेलिजन्स) उमेश मिश्रा म्हणाले, “गेल्या तीन-चार वर्षांपासून तो त्याच्या पाकिस्तानी हँडलरच्या संपर्कात होता आणि पैशाच्या बदल्यात त्यांना भारतीय मोबाइल नंबर आणि सिमकार्ड देत होता. भागचंदने पाकिस्तानमधील त्याच्या मास्टर्सना भारतीय नंबर देऊन सोशल मीडिया अकाउंट तयार करण्यात मदत केली आहे. खाते तयार करताना या क्रमांकांवरून दिलेला ओटीपी तो त्यांच्यासोबत शेअर करायचा आणि नंतर सिमकार्ड कपड्याच्या आणि मसाल्यांच्या पाकिटात लपवून पार्सलने मुंबईला पाठवायचा.”
अशी मिळाली माहिती
पोलिसांनी सांगितले की, नारायण लाल गद्री या दुसऱ्या व्यक्तीच्या चौकशीत भागचंदचे नाव पुढे आले, खरे तर नारायणला यापूर्वी भीलवाडा येथून अटक करण्यात आली होती. चौकशीदरम्यान नारायणलालने भागचंदचे नाव घेतले आणि सांगितले की तो पाकिस्तानी गुप्तचर संस्थांना मोबाईल सिम क्रमांक पुरवत असे. त्याने सांगितले की त्याने दिल्लीतील भागचंदच्या मदतीने अनेक वेळा मोबाईल सिम जारी करून हे नंबर ऍक्टिव्हेट केले. त्यानंतर या क्रमांकांवरून सोशल मीडिया अकाउंट तयार करून, ओटीपी क्रमांक पाकिस्तानी हँडलर्सना सांगून मोठी रक्कम मिळवली.
