नवी दिल्ली : पंजाब नॅशनल बँक (पीएनबी) घोटाळ्यातील आरोपी आणि फरार डायमंड व्यापारी मेहुल चोकसीबद्दल मोठी बातमी समोर आली आहे. मेहुल चोकसी डोमिनिकामध्ये सापडला असल्याची बातमी आहे. तेथील पोलिसांनी त्याला ताब्यात घेतले असून आता अँटिगुआ पोलिसांच्या वतीनेही डोमिनिका प्रशासनाशी संपर्क साधण्यात आला आहे. गेल्या काही दिवसांपासून चोकसी याने अँटिगुआमधले त्याचे लपण्याचे ठिकाण बदलले होते. परंतु आता डोमिनिका पोलिसांनी त्याला पकडले आहे आणि लवकरच त्याला अँटिगुआ पोलिसांच्या स्वाधीन केले जाऊ शकते.
मेहुल चोकसी रविवारी म्हणजेच 23 मे रोजी अँटिगुआ येथून फरार झाल्याचं सांगितलं जात होतं. मात्र, आज (२६ मे) तो डोमिनिकामध्ये असल्याची माहिती मिळाली आणि पोलिसांनी त्वरित कारवाई करत त्याला ताब्यात घेतलं. भारत सरकारकडून सतत मागणी होत होती की मेहुलचे अँटिगुआ नागरिकत्व रद्द केलं जावं, अशा परिस्थितीत तेथील अधिकाऱ्यांवर दबाव येत होता. त्यामुळे मेहुलला त्याच्या भविष्याबद्दल चिंता वाटल्याने त्याने आपली लपण्याची जागा बदलणे हाच एक उत्तम पर्याय राहील, असा विचार करून लोकेशन बदलले आणि काही दिवसांतच तो पुन्हा पोलिसांच्या ताब्यात आला. फरक इतकाच आहे की तो सध्या डोमिनिका पोलिसांच्या ताब्यात आहे, पण लवकरच त्याला अँटिगुआ पोलिसांच्या ताब्यात देण्यात येईल.
डोमिनिका पोलिसांनी मेहुलला अटक करणे ही भारतासाठी दिलासादायक बातमी आहे, कारण अँटिगुआ प्रशासनाने हे स्पष्ट केले होते की जर मेहुल चोकसी पळून जाण्यात यशस्वी झाला आणि जर तो सापडला नाही, तर प्रत्यर्पण प्रकरणावर त्याचा परिणाम होऊ शकतो आणि त्याला भारतात आणण्याची प्रक्रिया कदाचित अडकून पडू शकते. पण आता मेहुल डोमिनिकामध्ये सापडला आहे, त्यामुळे त्याला भारतात आणण्याचा प्रयत्न सुरू आहे आणि आता त्याचे अँटिगुआ नागरिकत्व रद्द करण्याची मागणीही वाढत जाईल.
मिळालेल्या माहितीनुसार, अँटिगुआ मधून पळून जाण्यात मेहुल यशस्वी झाला होता कारण त्याने एकाच वेळी अनेक कॅरिबियन देशांचे नागरिकत्व घेतले आहे. त्यामुळे तो प्रत्येक वेळी पळून जाण्याचा प्रयत्न करत असायचा. पंजाब नॅशनल बँकेच्या 13,500 कोटी रुपयांच्या सार्वजनिक निधीचा गैरवापर केल्याप्रकरणी मेहुल चोकसी आणि नीरव मोदी आरोपी आहेत.
