भोपाळ : मध्य प्रदेशची राजधानी भोपाळमधून एक धक्कादायक घटना समोर आली आहे. प्रेयसी सोडून गेल्यामुळे दुःखी झालेल्या एका तरुणाने स्वतःला पेटवून घेत आत्महत्या केली आहे. या तरुणाने या घटनेच्या एक दिवस आधी चाकूने हाताची नस कापतानाचा एक व्हिडिओ बनवला होता आणि सोशल मीडियावर शेअर केला होता. त्याच्या दुसऱ्याच दिवशी त्याने स्वतःला जिवंत पेटवून घेतले.
मिळालेल्या माहितीनुसार, नीरज विश्वकर्मा नावाच्या तरुणाचे जोगीपुरा येथे राहणाऱ्या एका तरुणीवर प्रेम होते. गेल्या तीन वर्षांपासून हे दोघे लिव्ह इन रिलेशनशिपमध्ये राहत होते. पोलिसांनी सांगितले की, नीरज हा अमली पदार्थांचे व्यसन करायचा, तो व्यवसायाने ऑटोचालक होता. मात्र, त्याच्या व्यसनामुळे त्याचे प्रेयसीबरोबर अनेकदा भांडण व्हायचे. दररोजच्या या भांडणांना कंटाळून आणि प्रियकराच्या ड्रग्जच्या सवयीमुळे नाराज होऊन ही तरुणी नीरजला सोडून तिच्या घरी गेली. मात्र, यामुळे नीरज खूप दुःखी झाला होता.
दरम्यान, शनिवारी सकाळी नीरज आपल्या प्रेयसीच्या घरी पोहोचला आणि घराबाहेरून प्रेयसीला आवाज देऊन आरडाओरडा करू लागला. मात्र, बराच वेळ कोणी बाहेर न आल्याने नीरजने स्वत:वर पेट्रोल ओतून पेटवून घेतले. ही घटना घडली त्यावेळी नीरजची प्रेयसी घरी नव्हती आणि ती स्वतः नीरजला भेटायला त्याच्या घरी गेलेली होती. मात्र, दुर्दैवाने त्यांची भेट झाली नाही. दरम्यान, प्रेयसीला फोनवर माहिती मिळाली की नीरजने तिच्या घराबाहेर स्वत:ला पेटवून घेतले आहे, त्यानंतर तिने तत्काळ तिचे घर गाठले आणि तेथून गंभीर भाजलेल्या नीरजला घेऊन ती रुग्णालयात पोहोचली, मात्र नीरजचा जीव वाचू शकला नाही आणि त्याचा रुग्णालयात मृत्यू झाला.
