पाटणा : बिहारचे माजी मुख्यमंत्री लालू प्रसाद यादव यांना दिल्लीतील एम्सच्या इमर्जन्सी वॉर्डमध्ये दाखल करण्यात आले आहे. दिल्ली विमानतळावर त्यांची प्रकृती खालावल्यानंतर त्यांना पुन्हा एम्समध्ये आणून दाखल करण्यात आले आहे. मिळालेल्या माहितीनुसार, वॉर्डमध्ये चार डॉक्टरांची टीम आहे. लालूंच्या रुग्णालयात दाखल झाल्याची माहिती मिळताच पक्षाचे नेते मनोज झा, प्रेमचंद गुप्ता, मिसा भारती, राजश्री यादव, संजय यादव, भोला यादव रुग्णालयात उपस्थित आहेत.
लालू यादव यांना चांगल्या उपचारांसाठी दिल्ली एम्समध्ये पाठवण्यात आले होते, मात्र त्यांना एम्सच्या डॉक्टरांनी दाखल करण्यास नकार दिल्याची माहिती आहे. सूत्रांनी दिलेल्या माहितीनुसार, एम्सच्या डॉक्टरांनी त्यांना रांचीच्या रिम्समध्येच उपचार घेण्याचा सल्ला दिला होता. अशा परिस्थितीत ते आज दुपारी ३ वाजता दिल्लीहून रांचीला रवाना होणार होते. मात्र विमानतळावरच त्यांची प्रकृती खालावली, त्यानंतर त्यांना पुन्हा एम्स रुग्णालयात आणण्यात आले.
मंगळवारी एक तासाच्या बैठकीनंतर, लालू यादव यांना चांगल्या उपचारांसाठी रिम्समधून दिल्ली एम्समध्ये पाठवण्याचा निर्णय रिम्सच्या डॉक्टरांनी घेतला होता. अशा परिस्थितीत माजी मुख्यमंत्र्यांची मोठी मुलगी मीसा भारती यांनी दिल्लीहून हेलिकॉप्टर आणले आणि वडिलांना दिल्लीला नेले. मात्र एम्सच्या डॉक्टरांनी लालू यादव यांची तपासणी केली आणि त्यानंतर त्यांना ऍडमिट करून घेण्यास नकार दिला होता.
