ठाणे : मराठी अभिनेत्री केतकी चितळे हिची ठाणे कारागृहातून सुटका झाली आहे. काल तिला ठाणे न्यायालयाकडून जामीन मंजूर झाला होता.
राष्ट्रवादी काँग्रेसचे अध्यक्ष शरद पवार यांना उद्देशून अपमानास्पद फेसबुक पोस्ट केल्यानंतर ठाणे पोलिसांनी तिला अटक केली होती. केतकी चितळे हिने पवारांच्या आजारपणावर, दिसण्यावर, आवाजावर अपमानास्पद फेसबुक पोस्ट केल्यामुळे आणि त्यांना भ्रष्ट संबोधल्याच्या कारणावरून तिला अटक करण्यात आली होती. तिला १४ मे रोजी पोलिसांनी ताब्यात घेतले होते, त्यानंतर 18 मे पासून ती न्यायालयीन कोठडीत आहे. तिच्या याचिकेवर अतिरिक्त सत्र न्यायाधीश एचएम पटवर्धन यांनी सुनावणी केली. गुन्हे शाखेने आधीच तिच्या जामीन अर्जाला विरोध करत उत्तर दाखल केले होते. मंगळवारी तिच्या जामीन अर्जाला पोलीस विरोध करत नसल्याचे सांगत अतिरिक्त जबाब नोंदवण्यात आला. त्यानुसार काल न्यायालयाने तिला जामीन मंजूर करण्याचा आदेश दिला.