सोलापूर : सोलापूरचे उपमहापौर राजेश काळे यांना दोन वर्षांसाठी सोलापूर, उस्मानाबाद आणि पुणे जिल्ह्यातील इंदापूर येथून तडीपार करण्यात आले आहे. सोलापूरचे पोलीस आयुक्त हरीश बैजल यांनी हे आदेश काढले आहेत. उपमहापौर राजेश काळे हे भाजपचे निलंबित नगरसेवक आहेत. त्यांच्यावर सरकारी कामात अडथळा, मारहाण असे सात गुन्हे दाखल आहेत.
सोलापूर महापालिकेचे उपायुक्त धनराज पांडे यांना राजेश काळे यांनी अश्लील भाषेत शिवीगाळ केली होती. त्या प्रकरणी राजेश काळे यांना पोलिसांनी अटकसुद्धा केली होती. हे प्रकरण सध्या न्यायप्रविष्ट आहे. आज बुधवारी पहाटे पाच वाजता उपमहापौर राजेश काळे यांना विजापूर नाका पोलिसांनी ताब्यात घेतले.