पुणे : तळवडे येथील शरद रूपचंद चितळे (वय ३५) नावाच्या व्यक्तीने पत्नीच्या चारित्र्यावर संशय घेत तिला गळा दाबून मारले. यानंतर त्याने आत्महत्या करण्याचा प्रयत्न केला, पण पोलिसांनी वेळेत घटनास्थळी पोहोचून त्याला वाचवले. मात्र, त्यानंतर चौकशीसाठी चिखली पोलिस ठाण्यात बोलावले असता तेथेच त्याने आत्महत्या केली.
मिळालेल्या माहितीनुसार, चितळे एका खाजगी कंपनीत नोकरी करत होते. त्याची पत्नी कांचन (वय २६) आशा वर्कर म्हणून काम करत होती. १३ एप्रिल रोजी शरदने पत्नीचा गळा दाबून खून केला. यानंतर त्याने गळफास घेऊन आत्महत्या करण्याचा प्रयत्न केला, मात्र पोलिसांनी त्याला वाचवून रुग्णालयात दाखल केले. शरदच्या पत्नीला वायसीएम रुग्णालयात दाखल केले असता डॉक्टरांनी तिला मृत घोषित केले. शवविच्छेदन अहवालात कांचन यांचा मृत्यू गळा दाबून झाल्याचे निष्पन्न झाले.
शरदला निगडीतील लोकमान्य रुग्णालयात उपचारासाठी दाखल करण्यात आले होते. १८ एप्रिल रोजी शुक्रवारी चितळे यांना रुग्णालयातून सोडण्यात आले, त्यानंतर कांचनच्या मृत्यूच्या चौकशीचा भाग म्हणून त्यांना त्यांच्या कुटुंबियांसह चिखली पोलिस ठाण्यात बोलावण्यात आले. मात्र, चौकशी दरम्यान शरद याने लघुशंकेचा बहाणा करून स्वच्छतागृहात जाऊन आतून दरवाजा बंद केला. शरद बराच वेळ न परतल्याने शंका येताच पोलिसांनी दरवाजा तोडला, त्यावेळी शरद चितळे बेशुद्धावस्तेत आढळले, त्याने फरशी पुसण्याचे लिक्विड पिल्याचे निदर्शनास आले. त्यानंतर शनिवारी पहाटे २.५० वाजता पोलिसांनी त्याला तातडीने वायसीएम रुग्णालयात दाखल केले, मात्र उपचारादरम्यान त्याचा मृत्यू झाला. सध्या पिंपरी चिंचवड पोलिसांच्या गुन्हे शाखेकडून या प्रकरणाचा तपास सुरू आहे.
