पुणे : कात्रज पोलीस चौकीत पोलीस उपनिरीक्षकाला एक महिला व तिच्या मुलाने मारहाण करून धमकावल्याची धक्कादायक घटना समोर आली आहे. याप्रकरणी प्रीतम चुन्नीलाल परदेशी आणि त्याची आई सुजाता चुन्नीलाल परदेशी या दोन्ही आरोपींना भारती विद्यापीठ पोलिसांनी अटक केली आहे.
मिळालेल्या माहितीनुसार, प्रीतम परदेशी आणि अक्षय पांडुरंग माळवे (वय २३) या अन्य व्यक्तीमध्ये जोरदार भांडण झाले होते. त्यानंतर प्रीतम आणि त्याची आई पोलीस चौकीत पोहोचले, तेथे त्यांनी गोंधळ घालण्यास सुरुवात केली. त्यामुळे पोलिस उपनिरीक्षक (PSI) नितीन तानाजी जाधव यांनी दोघांकडे जाऊन त्यांना शांतता राखण्याचा सल्ला दिला. मात्र, याचा राग येऊन प्रीतम परदेशी यांनी पोलीस अधिकार्यांच्या सूचनेला धमकी देऊन उत्तर दिले. तो म्हणाला, “तुला माहित आहे का मी कोण आहे? मी तुझी वर्दी उतरवीन. माझ्यावर यापूर्वी गुन्हे दाखल आहेत, तु या चौकीला नवीन आहेस, आधी माझी माहिती काढ.” असे म्हणत त्यांना जोरात ढकलून दिले. प्रितम याने त्याच्याकडील फुटलेल्या मोबाईलने त्यांच्या उजव्या हाताच्या अंगठ्याजवळील बोटावर वार करुन त्यांना जखमी केले.
आरोपीची आई सुजाता परदेशी हिनेदेखील उपनिरीक्षक जाधव यांच्यावर शारिरीक हल्ला केला. तिने जाधव यांच्या शासकीय गणवेशाची कॉलर पकडून ”तुझ्यासारखे बरेच बघीतलेत, तू काय करणार आमचे, माझा मुलगा पण प्रेसमध्ये आहे, त्याला सांगून तुझी नोकरी घालवते,” असे म्हणत शिवीगाळ केली. पोलिसांनी दोघांना अटक केली असून पोलीस उपनिरीक्षक थोरात पुढील तपास करत आहेत.
