पुणे : पुण्यातील एका हॉटेलमध्ये फेसबुक लाइव्ह करीत एका वेटरने तेराव्या मजल्यावरुन उडी मारून आत्महत्या केल्याची धक्कादायक घटना घडली आहे. मुंढवा परिसरातील हॉटेल पेंटहाऊसमध्ये घडलेल्या या घटनेमुळे एकच खळबळ उडाली आहे. आत्महत्या केलेल्या वेटरचे नाव अरविंदसिंह राठोड (वय २६) असे असल्याची माहिती मिळाली आहे.
मिळालेल्या माहितीनुसार, अरविंदसिंह राठोड हा मूळचा उत्तराखंडचा राहणारा होता. तो महिन्याभरापूर्वीच मुंढवा येथील हॉटेल पेंटहाऊसमध्ये कामाला आला होता. मात्र या कालावधीत त्याला खूप त्रास सहन करावा लागला. त्यातून बुधवारी रात्रीच्या सुमारास अरविंदसिंह राठोड हा हॉटेलच्या टेरेसवर १३ व्या मजल्यावर गेला आणि त्याने फेसबुक लाइव्ह केले. यावेळी मी आत्महत्या करणार असून हॉटेलमधील काही व्यक्तींनी माझे वाईट केले आहे. फसवून माझ्याकडून काही काम करुन घेतले आहे, असं तो म्हणत होता. हे पाहून अरविंदसिंह याला अनेकांनी फोन देखील केले. त्याला आत्महत्येपासून रोखण्याचा प्रयत्न केला. मात्र त्याने काही क्षणातच खाली उडी मारली आणि त्याचा जागीच मृत्यू झाला. मुंढवा पोलिस या प्रकरणाचा अधिक तपास करत आहेत.
