काँग्रेसचे ज्येष्ठ नेते व महाराष्ट्राचे माजी मुख्यमंत्री शिवाजीराव पाटील निलंगेकर यांचं निधन झालं आहे. वयाच्या 91 व्या वर्षी त्यांनी पुण्यात अखेरचा श्वास घेतला. आज पहाटे पाच वाजण्याच्या सुमारास त्यांनी जगाचा निरोप घेतला.
किडनीच्या विकाराने त्यांचं निधन झालं आहे. पुण्यातल्या एका खाजगी रूग्णालयात त्यांनी अखेरचा श्वास घेतला. काही दिवसांपूर्वीच शिवाजीराव पाटील निलंगेकर यांनी कोरोनावर यशस्वीपणे मात केली होती.
अत्यंत शिस्तप्रिय नेतृत्व म्हणून त्यांची ओळख होती. तसंच अभ्यासू नेत्यांपैकी एक अशी त्यांची ख्याती होती. स्वातंत्र्यलढ्यात देखील शिवाजीराव पाटील सहभागी होते. ते 1985 ते 1986 दरम्यान मुख्यमंत्री होते. राज्याच्या मंत्रिमंडळात त्यांनी अनेक खात्यांचा कारभार सांभाळला होता.
आज निलंग्यात कोरोनाच्या पार्श्वभूमीवर नियमावली पाळून त्यांच्यावर अंतिम संस्कार होणार आहे.
