नाशिक : अभिनेत्री हीना पांचाळ हिला पोलिसांनी अटक केली आहे. नाशिकमधील इगतपुरी येथे हाय प्रोफाईल रेव्ह पार्टीवर पोलिसांनी छापा टाकला होता. तिथून ‘बिग बॉस मराठी’ फेम अभिनेत्री हीना पांचाळ हिला पोलिसांनी ताब्यात घेतल्याची माहिती मिळत आहे. या पार्टीत एकूण २२ जण ड्रग्ज, कोकेन, गांजा यांचं सेवन करत होते. यात बॉलिवुडमधील दोन कोरिओग्राफर, तामिळ आणि हिंदी चित्रपटांत अभिनय केलेल्या अभिनेत्रींचा समावेश असल्याची माहिती समोर आली.
मिळालेल्या माहितीनुसार, शनिवारी मध्यरात्रीच्या सुमारास इगतपुरी येथील स्काय ताज व्हिला व स्काय लगून व्हिला या दोन खासगी बंगल्यांमध्ये ड्रग्ज पार्टी होत असल्याची माहिती नाशिकचे पोलीस अधीक्षक सचिन पाटील यांना मिळाली. त्यानंतर मध्यरात्री अडीच वाजेच्या सुमारास पोलिसांनी छापा टाकला आणि ‘रेव्ह पार्टी’च्या नावाखाली ड्रग्सचं सेवन करणाऱ्या सर्वांना ताब्यात घेत इगतपुरी पोलीस ठाण्यात आणले. संबंधितांविरुध्द विनापरवाना अंमली पदार्थ बाळगणे, त्याचे सामूहिकपणे सेवन करणे आणि कोरोनाच्या नियमावलीचे उल्लंघन करत गर्दी केल्याप्रकरणी गुन्हा दाखल करण्यात आला आहे. अंमली पदार्थांचा पुरवठा कोणी केला याबाबतचा तपास करण्याकरिता नाशिक ग्रामीण पोलिसांचे एक स्वतंत्र पथक मुंबईत रवाना करण्यात आले आहे.
हीना पांचाळ ही ‘बिग बॉस मराठी’ या रिअॅलिटी शोच्या दुसऱ्या पर्वात वाईल्ड कार्ट एन्ट्री म्हणून सहभागी झाली होती. हीना पांचाळनं हुक्का, मोहल्ला, बेबो बेबो, राजू ओ राजू, बोगन अशा काही चित्रपटांमध्ये काम केलं आहे. याशिवाय हिंदी, मराठी, तामिळ आणि तेलुगू चित्रपटांमध्ये तिनं ‘आयटम साँग’ केले आहेत.
