मुंबई : सेबीने उद्योगपती मुकेश अंबानी आणि त्यांच्या रिलायन्स समुहाला दंड भरण्याचा आदेश दिला. नोव्हेंबर २००७ मध्ये आढळलेल्या शेअर घोटाळा प्रकरणी सेबीने (Securities and Exchange Board of India – SEBI) ही कारवाई केली. शेअर घोटाळा केल्याप्रकरणी रिलायन्स इंडस्ट्रीजला २५ कोटी रुपयांचा तर मुकेश अंबानी यांना १५ कोटी रुपयांचा दंड केला. तसेच नवी मुंबई सेझ प्रायव्हेट लिमिटेड कंपनीला २० कोटी रुपये आणि मुंबई सेझ प्रायव्हेट लिमिटेड कंपनीला १० कोटी रुपयांचा दंड केला.
रिलायन्स पेट्रोलियम लिमिटेड कंपनीच्या नोव्हेंबर २००७ मध्ये झालेल्या शेअरच्या व्यवहारांमध्ये घोटाळा केल्याप्रकरणी दोषी ठरवून सेबीने सर्व दोषींवर दंडात्मक कारवाई केली. दोषी ठरलेल्यांनी सामूहिकरित्या नोव्हेंबर २००७ मध्ये केलेल्या घोटाळ्यामुळे गुंतवणूकदारांची फसवणूक झाल्याचा आरोप सेबीने लावला आहे. गुंतवणूकदारांच्या हितांचे रक्षण करण्यासाठी तसेच भविष्यात अशा स्वरुपाच्या घोटाळ्याची पुनरावृत्ती होऊ नये यासाठी सर्वांनाच योग्य तो इशारा देण्याकरिता सेबीने दोषींना दंड भरण्याचा आदेश दिला.
सेबीचे अधिकारी बी जे दिलीप यांनी ९५ पानांच्या आदेशपत्रात कोणाला किती दंड आणि त्याची कारणे या संदर्भात सविस्तर माहिती नमूद केली आहे. सामान्य गुंतवणूकदारांना शेअर बाजारातील गैरव्यवहारांची कल्पना येणे शक्य नव्हते. याच कारणामुळे फसवणुकीच्या उद्देशाने शेअर बाजारात गैरव्यवहार केल्याप्रकरणीही सेबीने कारवाई केली.
