आयपीएलच्या 13 व्या सत्रातील उत्तरार्ध सुरू झाला आहे. लीगमधील सर्व संघ आजपासून पुन्हा समोरासमोर उभे राहतील. लीगचा 29 वा सामना आज संध्याकाळी 7.30 वाजेपासून दुबईमध्ये सनरायझर्स हैदराबाद आणि चेन्नई सुपर किंग्ज यांच्यात खेळला जाईल. हैदराबादविरुद्धच्या त्यांच्या मागील पराभवाचा बदला घेण्याची संधी चेन्नईला असेल. चेन्नई आणि हैदराबाद या दोघांमध्ये एकूण 13 सामने खेळले गेले असून चेन्नईने 9 आणि हैदराबादने 4 विजय मिळविले आहेत.
दुबई येथील खेळपट्टी फलंदाजांना मदत करू शकते. येथे स्लो विकेट असल्याने स्पिनर्सनाही खूप मदत होईल. नाणेफेक जिंकणार्या संघाला प्रथम फलंदाजी करायला आवडेल.
महेंद्रसिंह धोनीच्या नेतृत्वाखालील चेन्नई सुपर किंग्जला यंदाच्या आयपीएल मध्ये अद्याप चांगली कामगिरी करता आलेली नाही. चेन्नईचा संघ सात सामन्यांपैकी दोन सामने जिंकून अवघ्या चार गुणांसह सातव्या स्थानी आहे. हैदराबादविरुद्धच्या मागील लढतीत त्यांना सात धावांनी पराभव पत्करावा लागला होता.
सलामीवीर शेन वॉटसन आणि फॅफ डय़ू प्लेसिस सातत्याने योगदान देत आहेत. परंतु मधल्या फळीत धोनीसह अंबाती रायुडू, रवींद्र जडेजा यांनी अद्याप हवी तशी कामगिरी पार पाडली नाही. केदार जाधवच्या जागी गेल्या लढतीत एन. जगदीशनला स्थान देण्यात आले होते. परंतु तोही फारसा प्रभाव पाडू शकला नाही. शार्दुल ठाकूर आणि दीपक चहर ही वेगवान भारतीय जोडी चेन्नईच्या गोलंदाजीची धुरा वाहत असून फिरकीपटू कर्ण शमाने उत्तम गोलंदाजी केली आहे. सॅम करण अष्टपैलू खेळाडूची भूमिका बजावत आहे.
डेव्हिड वॉर्नरच्या नेतृत्वाखालील हैदराबाद संघामध्ये फलंदाजीत वॉर्नर आणि जॉनी बेअरस्टो यांच्यापैकी किमान एकाने मोठी खेळी साकारणे आवश्यक आहे. मधल्या फळीत केन विल्यम्सन आणि मनीष पांडे खेळतात. तसेच युवा प्रियम गर्ग आणि अब्दुल समद या युवांवर अवलंबून राहणे हैदराबादला महागात पडू शकते. भुवनेश्वर कुमारच्या अनुपस्थितीचा फटका गेल्या लढतीत हैदराबादला बसला. फिरकीपटू रशिद खान वरच हैदराबादच्या गोलंदाजीची भिस्त असेल.
