नागपूर : नागपूरमध्ये दारूगोळा कंपनीत भीषण स्फोट होऊन दोन कामगारांचा दुर्दैवी मृत्यू झाला. तर काही जण जखमी झाले आहेत. काटोल तालुक्यातील कोतवालबड्डी येथील एशियन फायर वर्क्स बारूद कंपनीमध्ये हा स्फोट झाला. या प्रकरणाची शासनाने गंभीर दखल घेतली असून पालकमंत्री चंद्रशेखर बावनकुळे यांनी सखोल चौकशी करण्याचे निर्देश जिल्हा प्रशासनाला दिले आहेत. अपघातातील जखमींवर उपचार सुरू असून त्यांना प्रशासनातर्फे सर्वोतोपरी मदत केली जात आहे असे चंद्रशेखर बावनकुळे यांनी सांगितले. या घटनेत मृत्यू झालेल्या कामगार कुटुंबीयांच्या दुःखात सहभागी असल्याचे त्यांनी म्हटले आहे.
जखमी कामगारांच्या उपचारात कोणतीही कमतरता पडू नये, याची खबरदारी घेण्याचे निर्देश बावनकुळे यांनी जिल्हा प्रशासनाला दिले आहेत. दरम्यान, नागपूर लगतच्या सोलार कंपनीत यापूर्वी अशाच प्रकारची घटना घडली होती. तेव्हा कंपनीतर्फे मृत कामगारांच्या कुटुंबियांना पंचवीस लाख रुपयांची मदत करण्यात आली होती. त्याप्रकारे या कामगारांना मदत करावी अशी मागणी केली जात आहे.
