नाशिक : गॅस गिझर फुटल्याने गौरव पाटील युवकाचा गुदमरून मृत्यू झाल्याची धाक्कादायक घटना नाशिक शहरातील सिडको परिसरात घडली. गौरव शुक्रवारी दुपारी अंघोळ करत असताना हा प्रकार घडला. रुग्णालयात दाखल करण्यापूर्वीच श्वास गुदमरल्यामुळे त्याचा मृत्यू झाला.
मिळालेल्या माहितीनुसार, गौरव पाटील त्याच्या घरात बाथरुममध्ये अंघोळ करत होता. यावेळी अचानक गॅस गिझरचा स्फोट झाला. त्यानंतर गौरवला गुदमरायला लागले. अचानकपणे घडलेल्या या प्रकारमुळे त्याचे कुटुंबीय घाबरले. त्यांनी तत्काळ बाथरुमकडे धाव घेत गौरवला बाहेर काढले. त्याचे कुटुंबीय तसेच त्याच्या मित्रांनी त्याला घेऊन रुग्णालयाकडे धाव घेतली. मात्र, श्वास घेण्यास जास्तच त्रास जाणवू लागल्यामुळे त्याचा रस्त्यातच मृत्यू झाला.
दरम्यान, गौरवच्या अशा अचानक मृत्यूमुळे त्याच्या कुटुंबीयांना धक्का बसला आहे. तसेच, गॅस गिझर वापरतना काळजी घेण्याचे आवाहन केले जात आहे.
तुम्ही जर गॅस गिझर वापरत असाल तर काळजी घ्याल?
- गॅस गिझरमधून निघणारा कार्बन मोनॉक्साईड हा गॅस शरीरासाठी हानिकारक असतो. तो रंगहीन असल्यामुळे गॅस गिझर लीक झालेले कळूनही येत नाही. त्यामुळे गॅस गिझर लीक झाल्याची थोडी जरी शंका आली तर गॅस गिझर बंद करावे.
- कार्बन मोनॉक्साईड श्वासावाटे शरीरात गेल्यामुळे काही मिनिटांत चक्कर येते. अशी काही लक्षणं आढळल्यास तत्काळ बाथरुमच्या बाहेर यावे.
- गॅस गिझर लावताना बाथरुममध्ये मोकळी जागा आणि नैसर्गिक हवा येण्यासाठी जागा आहे का?, याची चाचपणी करावी. तसेच, बाथरुम मोठे असेल तरच गॅस गिझर लावावे.
- बाथरुममध्ये जाण्यापूर्वी गॅस गिझर बंद केलेलं होतं का याची खात्री करुन घ्या.
- कार्बन मोनॉक्साईड शरीरात गेल्यानंतर घरगुती उपाय करण्यापेक्षा रुग्णाला तत्काळ रुग्णालयात दाखल करा.
- रुग्ण बेशुद्ध पडल्यानंतर त्याला तुमच्या तोंडावाटे श्वास देण्याचा प्रयत्न करु नाका. कारण त्यामुळे तुम्हाच्याही शरीरात कार्बन मोनॉक्साईट हा वायू जाण्याची शक्यता असते.