नागपूर : नागपूरमधील कटोल रोडवर भीषण अपघात झाला आहे. भरधाव वेगाने जाणाऱ्या ट्रकने मोटारसायकलला जोरदार धडक दिल्याने दुचाकीवरील दोघांचा जागीच मृत्यू झाला आहे, तर नऊ वर्षाच्या मुलाला गंभीर दुखापत झाली आहे. पोलिसांनी शनिवारी यासंबंधी माहिती दिली.
अपघाताची माहिती मिळताच पोलीस तात्काळ घटनास्थळी दाखल झाले. घटनास्थळावर पंचनामा करून पोलिसांनी दोघांचे मृतदेह ताब्यात घेतले. पोलिसांनी ते मृतदेह शवविच्छेदनासाठी नजिकच्या स्थानिक रुग्णालयात पाठवले. जखमी मुलावर रुग्णालयात उपचार सुरू आहेत.
पोलिसांनी दिलेल्या माहितीनुसार, सतनामसिंग अंधरेले (वय 50) आणि मुन्नी कौर अंधरेले (वय 45) अशी मृतांची नावे आहेत. हे दोघे वर्धा जिल्ह्यातील रहिवासी आहेत. तिघे बाईकवरून परसोडी या गावी जात असताना ही घटना घडली. या अपघातात सतनाम सिंगचा पुतण्या सुलिदर सिंग गंभीर जखमी झाला आहे. या प्रकरणात पोलिसांनी गुन्हा दाखल करून घेतला आहे. पोलीस पुढील तपास करत आहेत.
