पोलिओ लसीकरणादरम्यान 12 लहानग्यांना सॅनिटायझर पाजल्याचा धक्कादायक प्रकार यवतमाळमधील घाटंजी प्राथमिक आरोग्य केंद्राअंतर्गत येणाऱ्या कापसी कोपरी येथे घडला आहे. या 12 बालकांना यवतमाळच्या शासकीय वैद्यकीय महाविद्यालयामध्ये दाखल करण्यात आलं आहे.
मुलांना उलट्या सुरु झाल्यानंतर त्यांना रात्री रुग्णालयात दाखल करण्यात आलं. या संपूर्ण घटनेची चौकशी जिल्हा परिषदेचे मुख्य कार्यकारी अधिकारी श्रीकृष्ण पांचाळ करत आहेत. मुलांना लस म्हणून सॅनिटीझर पाजण्यात आले हे केंद्रावरील कर्मचाऱ्यांच्या लक्षात येताच त्यांनी काही वेळाने त्या सर्वांना पोलिओ लस दिली. उशिरापर्यंत वरिष्ठ अधिकाऱ्यांना या घटनेची माहिती दिली नाही, असे पांचाळ यांनी सांगितले. संपूर्ण प्रकार गंभीर असून यात कोणाकडून ही चूक झाली याची चौकशी सुरू आहे.
