गुजरात : अमरेली शहरातील शास्त्री नगर भागात मंगळवारी एक खाजगी प्रशिक्षण विमान कोसळल्याची दुर्घटना घडली. या अपघातात विमान चालवत असलेल्या पायलट अनिकेत महाजन यांचा मृत्यू झाला. दुर्घटनाग्रस्त विमान हे ‘व्हिजन फ्लाइंग इन्स्टिट्यूट’ या प्रशिक्षण संस्थेचे होते. अपघातानंतर विमानात जोरदार स्फोट झाला, ज्यामुळे आसपासच्या रहिवाशांमध्ये घबराट पसरली.
घटनेची माहिती मिळताच अग्निशमन दल आणि पोलिसांनी तत्काळ घटनास्थळी धाव घेतली. परिसर सील करून बचाव कार्य सुरु करण्यात आले. याबाबत अधिक माहिती देताना अमरेलीचे उपविभागीय पोलिस अधिकारी (DYSP) चिराग देसाई यांनी सांगितले, “दुर्दैवाने पायलट अनिकेत महाजन यांचा या अपघातात मृत्यू झाला आहे. घटनेचा तपास सुरू आहे.”
मागील एका महिन्यात गुजरातमध्ये घडलेली हहे दुसरी प्रशिक्षण विमान दुर्घटना आहे. मार्च महिन्यात मेहसाणा जिल्ह्यातील एका गावाजवळसुद्धा अशाच प्रकारचा अपघात झाला होता. विमान प्रशिक्षण संस्थांमध्ये वाढत असलेल्या अपघातांच्या पार्श्वभूमीवर, या दुर्घटनांबाबत नागरी उड्डाण महासंचालनालयाने (DGCA) गांभीर्याने लक्ष देण्याची गरज व्यक्त केली जात आहे.
