नागपूर : राज्यातील लाडक्या बहिणींसाठी खूशखबर आहे. राज्य सरकारच्या माझी लाडकी बहीण योजनेअंतर्गत मिळणारी रक्कम वाढवण्याच्या घोषणेनंतर या महिन्यापासूनच 2100 रुपये दिले जाणार असल्याची माहिती मिळाली आहे. सरकार सहावा हप्ता कधी देणार याची तारीख जाहीर करण्यात आलेली नसली तरीही या महिन्यात किंवा डिसेंबरच्या शेवटच्या आठवड्यात पैसे येऊ शकतात अशी बातमी आहे.
दरम्यान, सोमवारी नागपूर अधिवेशनादरम्यान, महाराष्ट्र सरकारने 33,788.40 कोटी रुपयांच्या पुरवणी मागण्या मांडल्या, ज्यामध्ये ‘मुख्यमंत्री माझी लाडकी बहीण योजनेसाठी 1,400 कोटी रुपयांची तरतूद आहे.
मागील अर्थसंकल्पात, माझी लाडकी बहीण योजनेंतर्गत 21 ते 65 वर्षे वयोगटातील पात्र महिलांना 1,500 रुपये मासिक भत्ता देण्यासाठी राज्य सरकारने वार्षिक 46,000 कोटी रुपयांची घोषणा केली होती. 2.5 कोटींहून अधिक महिलांना मासिक हप्ते मिळाले आहेत. आता सरकारने या भत्त्याची रक्कम वाढवून 2,100 रुपये केली आहे.
आतापर्यंत 5 हप्ते जारी
माझी लाडकी बहीण योजनेअंतर्गत राज्य सरकारने आतापर्यंत पाच हप्ते जारी केले आहेत. आता या महिन्यापासून सहाव्या हप्त्याचे वितरण सुरू होणार आहे. या हप्ता वितरणाची तारीख आणि संबंधित आदेश लवकरच शासनाकडून जारी करण्यात येईल. आदेश जारी झाल्यानंतर, संबंधित रक्कम थेट महिलांच्या बँक खात्यात जमा केली जाईल.
