अमरावती : नागपूर-औरंगाबाद महामार्गावर दोन ट्रक समोरासमोर धडकल्याने भीषण अपघात झाला आहे. या अपघातात चार जणांचा मृत्यू झाला आहे. गुरुवारी मध्यरात्री 12 ते 1 दरम्यान अमरावती जिल्ह्यातील शिंगणापूर चौफुली समोर दोन ट्रकची समोरासमोर धडक झाली. नागपूर अमरावती महामार्गावर लोखंडी रॉड घेऊन जाणारा ट्रक खड्डे वाचवण्याच्या नादात अनियंत्रित झाला आणि औरंगाबादहून नागपूरकडे कांदे वाहून नेणाऱ्या ट्रकला धडकला.
अनियंत्रित ट्रक समोरून येणाऱ्या ट्रकवर धडकल्याने दोन्ही ट्रक मधील ड्रायव्हर व क्लिनर यांचा घटनास्थळीच मृत्यू झाला. हा अपघात एवढा भीषण होता की दोन्हीही ट्रकच्या पुढील भागाचा अक्षरशः चेंदामेंदा झाला असून ट्रक मधील लोखंडी रॉड चालक आणि वाहकाच्या शरीरातून आरपार गेले आणि काचेतून बाहेर आले. या दोन्ही ट्रकच्या चालक आणि वाहक अशा चौघांचा जागीच मृत्यू झाला आहे. ट्रकमधील चालक – वाहक दोघांचे मृतदेह ट्रकमध्ये अडकले होते. त्यांना काढण्यासाठी अमरावती महानगरपालिकांचे वाहन व अग्निशमन दलाच्या पथकाला बोलावण्यात आले होते.
