जयपूर : एका सात वर्षांच्या मुलीचा तिच्याच १६ वर्षीय आत्याने शिरच्छेद केल्याची खळबळजनक घटना समोर आली आहे. राजस्थानमधील डुंगरपूर जिल्ह्यातील झिंझवा फाला गावात ही भयंकर घटना घडली. सोमवारी पहाटे ही घटना उघडकीस आली.
अल्पवयीन आरोपीच्या कुटुंबियांनी असा दावा केला की ती मागील दोन दिवसांपासून विचित्रपणे वागत होती. ती हातात तलवार घट्ट धरून पूजा करत होती. जेव्हा तिचे वडील आणि काकांनी तिला पकडण्याचा प्रयत्न केला तेव्हा तिने त्यांच्यावर हल्ला केला, तिने कुटुंबाला घाबरवले.
दरम्यान, या अल्पवयीन आरोपीने तिच्या खोलीत झोपलेल्या 7 वर्षांच्या भाचीला प्रथम ओढून नेले आणि नंतर तलवारीने तिचा गळा कापला. त्यानंतर कुटुंबीयांनी तिला कसेबसे पकडले आणि पोलिसांना माहिती दिली. माहिती मिळाल्यानंतर एसएचओ गोविंद सिंह तात्काळ घटनास्थळी पोहोचले. त्यांना घराबाहेर 7 वर्षांच्या मुलीचा मृतदेह पडलेला दिसला. पोलिसांनी आरोपी मुलीला ताब्यात घेतले असून, अधिक चौकशी सुरू आहे. कुटुंबीयांच्या तक्रारीनंतर मुलीला अटक करण्यात आली आणि या प्रकरणाचा तपास करण्यासाठी बांसवाडा येथून एफएसएल टीमला पाचारण करण्यात आले.
