मुंबई : पत्रा चाळ घोटाळ्यातील साक्षीदार असलेल्या एका महिलेच्या तक्रारीनंतर मुंबई पोलिसांनी संजय राऊत यांच्याविरोधात एफआयआर नोंदवल्यानंतर राऊत यांच्या अडचणीत भर पडली आहे. ईडीच्या साक्षीदार स्वप्ना पाटकर यांच्या तक्रारीवरून संजय राऊत यांच्याविरोधात रविवारी रात्री वाकोला पोलिस ठाण्यात विनयभंगाचा गुन्हा दाखल झाला. बलात्कार आणि हत्येची धमकी मिळाल्याची तक्रार पाटकर यांनी केली होती.
वाकोला पोलीस ठाण्यात रविवारी रात्री भारतीय दंड संहितेच्या कलम ५०४ (शांतता भंग करण्याच्या हेतूने अपमान), ५०६ (गुन्हेगारी धमकीची शिक्षा) आणि ५०९ (महिलेचा अपमान करण्याच्या हेतूने) गुन्हा दाखल करण्यात आला आहे. शनिवारी संध्याकाळपासून राऊत आणि संबंधित महिलेमधील संभाषणाची कथित ऑडिओ क्लिप सोशल मीडिया प्लॅटफॉर्मवर व्हायरल झाली. शनिवारी, वाकोला पोलिस ठाण्यात एनसी (नॉन-कॉग्निसेबल ऑफेन्स) नोंदवली गेली, जी रविवारी रात्री एफआयआर (प्रथम माहिती अहवाल) मध्ये रूपांतरित झाली.
महिलेने दावा केला होता की 15 जुलै रोजी तिला एक पत्र/चिठ्ठी मिळाली होती, ती एका वृत्तपत्रात गुंडाळून ठेवली होती, ज्यामध्ये ती काही बोलल्यास बलात्कार आणि खून करण्याची धमकी देण्यात आली होती. नंतर, एक ऑडिओ क्लिप व्हायरल झाली ज्यामध्ये एक पुरुष दुसऱ्या बाजूला असलेल्या महिलेशी अपशब्द वापरून बोलताना ऐकू येतो. संभाषणातील या दोन व्यक्ती राऊत आणि तक्रारदार आहेत की नाही हे निश्चित करण्यासाठी पोलीस आवश्यक ती खबरदारी घेणार आहेत.
ईडीने रविवारी मध्यरात्री केली अटक : शिवसेना नेते व खासदार संजय राऊत यांना आज न्यायालयात हजर करण्यात येणार आहे. त्यापूर्वी त्यांची वैद्यकीय चाचणी करण्यात येईल, अशी माहिती राऊत यांचे बंधू आमदार सुनील राऊत यांनी दिली. 1 हजार 34 कोटींच्या पत्रा चाळ पुनर्वसन गैरव्यवहार प्रकरणी सुमारे 18 तासांच्या चौकशीनंतर ईडीने रविवारी मध्यरात्री त्यांना अटक केली होती. रविवारी सकाळी 7 वाजेपासून ते मध्यरात्री 1 वाजेपर्यंत त्यांची घरी आणि ईडी कार्यालयात चौकशी झाली.
