मुंबई : उत्तर मुंबईतील 16 मजली निवासी इमारतीमध्ये रविवारी लागलेल्या आगीतून 11 जणांची सुखरूप सुटका करण्यात आली. बोरीवली उपनगरात असलेल्या ‘धीरज सवेरा’ इमारतीला आग लागल्याची माहिती अग्निशमन नियंत्रण कक्षाला रात्री 12.25 च्या सुमारास देण्यात आली होती. त्यानंतर अग्निशमन दलाच्या सात गाड्या घटनास्थळी दाखल झाल्या.
मिळालेल्या माहितीनुसार, इमारतीच्या 14व्या मजल्यावरील दोन फ्लॅटमध्ये आग लागली होती, त्यामुळे त्यातील घाबरलेल्या रहिवाशांनी स्वतःला वाचवण्यासाठी 15व्या मजल्यावर धाव घेतली. अग्निशमन दलाच्या सात गाड्या, आठ जंबो टँकर, रुग्णवाहिका आणि इतर मदत घटनास्थळी रवाना करण्यात आल्याचे अधिकाऱ्याने सांगितले.
अधिकाऱ्याने सांगितले कि, आग लागलेल्या फ्लॅटमधील तीन महिला आणि इतर आठ लोकांना इमारतीतून सुरक्षितपणे बाहेर काढण्यात आले. या घटनेत कोणीही जखमी झाले नाही. सकाळी 6.30 च्या सुमारास आग पूर्णपणे आटोक्यात आली. आगीचे कारण अद्याप समजू शकले नाही. सुदैवाने या घटनेत कोणीही जखमी झाले नाही.
