नागपूर : पायलटला विमानातच हृदयविकाराचा त्रास सुरू झाल्याने बांगलादेशच्या विमानाचे नागपूर विमानतळावर इमर्जन्सी लॅण्डींग करण्यात आले. या विमानात एकूण १२६ प्रवासी होते. मस्कतहून ढाक्याला जाणारे हे विमान रायपूरवरुन जात असताना पायलटला हृदयविकाराचा त्रास जाणवू लागला, त्यामुळे विमानाने कोलकाता एटीसीला संपर्क करून विमानातील परिस्थितीबद्दल सांगितले. त्यानंतर एटीसीने विमानाचे नागपूर विमानतळावर इमर्जन्सी लॅण्डींग करण्याचे आदेश दिले.
मिळालेल्या माहितीनुसार, विमानाच्या पायलटला हृदयविकाराचा त्रास जाणवल्याने सकाळी ११.४० वाजताच्या सुमारास विमान तातडीने नागपूर विमानतळावर उतरवण्यात आले. पायलटला उपचारासाठी खासगी रुग्णालयात दाखल करण्यात आले आहे. या विमानातील सर्व प्रवासी सुखरूप आहेत. एअरलाइन्सने पर्यायी विमानाची व्यवस्था केल्यानंतर हे प्रवासी येथून रवाना होतील.
