मुंबई : कोरोनाच्या संसर्गामुळे सध्या शाळा व महाविद्यालये ऑनलाइन माध्यमातून सुरू आहेत. मात्र, ऑनलाइन वर्ग सुरु असताना घडणाऱ्या अनेक विचित्र घटना समोर येत असतात. मुंबईतील विलेपार्ले येथील एका महाविद्यालयाचा ऑनलाइन वर्ग सुरू असताना अशीच एक धक्कादायक घटना घडली आहे. काही टवाळखोर विद्यार्थ्यांनी चालु वर्गात पॉर्न व्हिडिओ अपलोड केले. त्यामुळे एकच खळबळ उडाली.
मिळालेल्या माहितीनुसार, ही घटना चार दिवसांपूर्वी घडली आहे. त्यानंतर संबंधित प्राध्यपकांनी या प्रकरणी पोलिस ठाण्यात गुन्हा दाखल केला आहे. त्यानुसार हा प्रकार करणाऱ्या विद्यार्थ्यांविरोधात आयपीसी २९२, ५७० आणि सायबर गुन्ह्यांतर्गत तक्रार दाखल करण्यात आली आहे. त्यानुसार जुहू पोलिस पुढील तपास करत असून दोषींवर लवकरच योग्य ती कारवाई होईल.
