मुंबई : मुंबई हाय येथे बुडालेल्या बार्ज P ३०५ चे कॅप्टन राकेश बल्लव या दुर्घटनेत मृत्यू झाल्याचे अखेर डीएनए चाचणीतून स्पष्ट झाले आहे. जेजे रुग्णालयात ओळख न पटलेल्या बेवारस मृतदेहाचा डीएनए बल्लव यांच्या मुलाशी जुळल्याची माहिती पोलिसांनी दिली.
बल्लव कुटुंब काही दिवसांपूर्वी जेजे रुग्णालयात मृतदेहाची ओळख पटविण्यासाठी आले होते. तेव्हा एक मृतदेह बल्लव यांचा असावा, असा अंदाज त्यांनी व्यक्त केला होता. परंतु, त्यांनी खात्रीने सांगता येणार नाही, असं सांगितल्यामुळे पोलिसांनी निव्वळ अंदाजावर मृतदेह कुटुंबाच्या ताब्यात न देण्याचा निर्णय घेतला होता. त्यानंतर, डीएनए चाचणीसाठी त्यांच्या मुलाचा नमुना घेत तो चाचणीसाठी न्यायवैद्यक प्रयोगशाळेत पाठवण्यात आला होता. त्यावरून तो डीएनए बल्लव यांच्याशी जुळल्याची माहिती मिळाली आहे.
