मध्य प्रदेश येथी सिधी बस अपघाताने अनेक कुटुंबांना खोल जखमा दिल्या. अपघातातील मृतांचा आकडा 51 झाला आहे. मंगळवारी रात्रीपर्यंत 47 मृतदेह सापडले होते. आज (बुधवार) आणखी 4 मृतदेह सापडले, त्यामध्ये 5 महिन्यांच्या मुलीचा मृतदेह देखील सापडला आहे. 3 बेपत्ता लोकांचा शोध सुरू आहे.
दरम्यान, मुख्यमंत्री शिवराजसिंह चौहान यांनी घटनास्थळी जाऊन पीडित कुटुंबियांची भेट घेतली. रामपूर नायकिन गावच्या लोकांनी मुख्यमंत्र्यांना आवाहन केलं की, रस्ता तयार करा. जर रस्ता जाम झाला नसता, तर आमची कुटुंब अशी उध्वस्त झाली नसती.
बसमध्ये असलेली 5 महिन्यांची शुभी उर्फ सौम्या पाण्याच्या प्रवाहाने वाहून गेली. तिचा मृतदेह २४ तासांनंतर सिधीपासून २२ कि.मी. अंतरावर असलेल्या रीवा येथील गोविंदगडजवळ आढळला. तिची आई आणि मावशी यांचा मृतदेह बसमध्येच मंगळवारी सापडला होता.
बसमध्ये एकूण 63 प्रवासी होते. अपघाताच्या काही वेळ अगोदरच यातील तीन प्रवासी बसमधून खाली उतरले होते. 60 पैकी सहा प्रवाशांचे प्राण वाचले आहेत. ५१ मृतदेह हाती लागले असून ३ जण अजूनही बेपत्ता आहेत.
