पुणे : राज्य राखीव दलाच्या (SRPF) जवानाने अंतर्गत वादातून आपल्या सहकाऱ्यावर गोळीबार करुन स्वतःवरही गोळी झाडल्याची खळबळजनक घटना घडली आहे. या घटनेत दोन्ही जवानांचा मृत्यू झाला आहे. गडचिरोली येथील मरपल्ली येथे ही धक्कादायक घटना घडली. हे दोघेही पुणे जिल्ह्यातील दौंड येथील एसआरपी कॅम्पचे जवान होते.
राज्य राखीव पोलिस दलाच्या जवानाने सहकाऱ्याची हत्या करुन आत्महत्या केल्याचा प्रकार समोर आला आहे. अतिदुर्गम आणि अतिसंवेदनशील मरपल्ली पोलीस ठाण्यातील बॅरकमध्ये ही घटना घडली आहे. पुण्याहून हे दोन्ही जवान गडचिरोलीमधील पोलीस मदत केंद्र (मरपल्ली) येथे तैनात होते. राज्य राखीव दलाच्या जवानांमधील अंतर्गत वादातून ही घटना घडली असल्याची प्राथमिक माहिती समोर आली आहे. श्रीकांत बेरड यांनी रागाच्या भरात रायफलमधून बंडू नवतरला यांच्यावर गोळी झाडली. यात त्यांचा जागीच मृत्यू झाला. त्यानंतर श्रीकांत यांनी स्वत:वर बंदुकीने गोळी झाडून आत्महत्या केली.
जवानाने आपल्या रायफलने फायर केल्याची प्राथमिक माहिती आहे. या घटनेत दोन्ही जवानांचा जागीच मृत्यू झाला. वरिष्ठ पोलीस अधिकारी घटनास्थळी दाखल झाले असून दोघांचे मृतदेह जिल्हा सामान्य रुग्णालयात रवाना करण्यात आले आहेत.
