मुंबई : बॉलिवूड अभिनेता सलमान खानने वैयक्तिक संरक्षणासाठी शस्त्र परवाना मिळावा यासाठी मुंबई पोलिसांकडे अर्ज सादर केला आहे. अभिनेता सलमान खानला काही दिवसांपूर्वी जीवे मारण्याच्या धमक्या आल्या होत्या. सलमान खान आणि त्याचे वडील सलीम खान यांना सिद्धू मूसवाला प्रमाणे मारू, असे या धमकीत म्हटले होते. सिद्धू मुसेवालाच्या हत्येनंतर काही दिवसांनीच सलमान खान आणि सलीम खान यांना ही धमकी मिळाली होती. तेव्हापासून सलमानची सुरक्षा मोठ्या प्रमाणात वाढवण्यात आली आहे.
दरम्यान, या धमकीनंतर सलमान खानने स्वत:च्या सुरक्षेसाठी शस्त्राच्या परवान्यासाठी अर्ज केला होता. यासंदर्भात आज सलमान खानने मुंबईचे पोलीस आयुक्त विवेक फणसळकर यांची भेट घेतली.
गेल्या महिन्यात अभिनेत्याला धमकीचे पत्र मिळाले होते. या प्रकरणाचा तपास करणाऱ्या मुंबई पोलिसांनी सांगितले की, धमकीचे पत्र लॉरेन्स बिश्नोईच्या टोळीचा प्रसिद्धी स्टंट आहे. अधिकाऱ्यांनी दिलेल्या माहितीनुसार, सध्या कॅनडामध्ये असलेला बिष्णोईचा सहकारी विक्रम बरड याच्या सांगण्यावरून ही धमकी देण्यात आली होती.
