मुंबई : 3 जानेवारीपासून देशातील 15 ते 18 वर्षे वयोगटातील मुलांना कोरोनाची लस दिली जाईल, अशी घोषणा करण्यात आली होती. यासाठी 1 जानेवारीपासून म्हणजेच नवीन वर्षापासून लसीकरण स्लॉटचे बुकिंग कोविन ऍपवर किंवा साइटवर करता येईल. लसीकरणाच्या स्लॉट बुकिंगसाठी 10वीचे ओळखपत्र देखील वैध असेल.

आरोग्य मंत्रालयाच्या म्हणण्यानुसार, 15-18 वयोगटातील मुलांना फक्त भारत बायोटेकची कोवॅक्सिन लस दिली जाईल. देशात या वयोगटाची संख्या सुमारे १० कोटी आहे. CoWIN प्लॅटफॉर्मचे प्रमुख डॉ. आर. एस. शर्मा म्हणाले की, नोंदणीसाठी 10वीचे ओळखपत्र देखील ओळखीचा पुरावा म्हणून ग्राह्य धरले जाईल. कारण काही विद्यार्थ्यांकडे आधार कार्ड किंवा इतर कोणतेही ओळखपत्र नसण्याची शक्यता आहे. सरकारच्या मार्गदर्शक तत्त्वानुसार, 15-18 वर्षे वयोगटातील मुलांसाठी CoWIN व्यतिरिक्त, लस स्लॉटचे बुकिंग व्हेरिफायर/वॅक्सीनेटर द्वारे ऑन-साइट देखील केले जाऊ शकते.

मुलांची लसीकरण नोंदणी प्रक्रिया

1. सर्वप्रथम आरोग्य सेतू अॅप किंवा Cowin.gov.in वेबसाइटवर जा.
2. तुम्ही CoWIN वर नोंदणीकृत नसल्यास प्रथम नोंदणीचा ​​पर्याय निवडा.
3. त्यानंतर नोंदणी पृष्ठ दिसेल. त्यावर तुम्हाला फोटो, आयडी प्रकार, नंबर आणि तुमचे पूर्ण नाव टाकावे लागेल. (येथे तुम्ही 10वी ओळखपत्र निवडू शकता). तसेच, येथे लिंग आणि वय प्रविष्ट करा.
4. नोंदणी पूर्ण झाल्यावर, तुमच्या नोंदणीकृत मोबाईल नंबरवर एक पुष्टीकरण संदेश पाठवला जाईल.
5. सदस्य नोंदणी केल्यानंतर, तुम्ही तुमच्या क्षेत्राचा पिन कोड टाका. यानंतर लसीकरण केंद्रांची यादी समोर येईल.
6. आता तुमचा लसीचा स्लॉट तारीख, वेळेसह बुक करा आणि केंद्राला भेट देऊन लसीकरण करून घ्या.
7. लसीकरण केंद्रात, तुम्हाला तुमचा ओळखीचा पुरावा आणि गुप्त कोड प्रदान करावा लागेल. जे तुम्ही नोंदणी केल्यावर तुम्हाला मिळेल.
8. तुम्ही आधीच CoWIN वर नोंदणीकृत असाल तर साइन निवडा आणि तुमचा नोंदणीकृत मोबाइल नंबर प्रविष्ट करा आणि गेट OTP वर क्लिक करा.
9. त्यानंतर तुमच्या मोबाईल नंबरवर प्राप्त झालेला OTP टाका आणि Verify बटणावर क्लिक करा.
10. आता तुमच्या क्षेत्राचा पिन कोड टाका आणि केंद्रानुसार तुमचा लसीचा स्लॉट बुक करा आणि लसीकरण करून घ्या.

आरोग्य सेतू अॅपद्वारे बुकिंग करत असल्यास
CoWIN टॅबवर जा आणि Vaccine टॅबवर क्लिक करा. नंतर proceed वर क्लिक करा आणि वर नमूद केल्याप्रमाणे लस स्लॉट बुक करा.
एका मोबाईल नंबरवरून जास्तीत जास्त चार लोकांना लसीकरणासाठी नोंदणी करता येते.

The post मुलांच्या कोरोना लसीकरणासाठी आजपासून स्लॉट बुकिंग सुरू, जाणून घ्या नोंदणी प्रक्रिया appeared first on थोडक्यात घडामोडी.

जागतिक आरोग्य संघटना (WHO) च्या टेक्निकल अॅडव्हायझरी ग्रुप (TAG) ने कोवॅक्सिन लसीला पुन्हा एकदा झटका दिला आहे. मिळालेल्या माहितीनुसार, तांत्रिक सल्लागार गटाने (TAG) भारत बायोटेक कंपनीकडून आपत्कालीन वापरासाठी मंजूर यादीत (EUL) कोवॅक्सिन लसीचा समावेश करण्याबाबत विचार करण्यासाठी अधिक डेटा मागवला आहे. विशेष म्हणजे, सल्लागार गट लसीचे धोके आणि फायदे यांचे मूल्यांकन करत आहे. कोवॅक्सिनच्या मुद्द्यावर विचार करण्यासाठी सल्लागार गटाची आता 3 नोव्हेंबरला पुन्हा बैठक होणार आहे.

यापूर्वी डब्ल्यूएचओच्या प्रवक्त्याने अशी शक्यता व्यक्त केली होती की जर समूह डेटावर समाधानी असेल तर ते 24 तासांच्या आत लसीसाठी त्यांच्या शिफारसी देईल. WHO चा तांत्रिक सल्लागार समूह भारत बायोटेकची अँटी-कोरोनाव्हायरस लस आपत्कालीन वापरासाठी मंजूर यादीत (EUL) समाविष्ट करण्याचा विचार करत आहे.

हैदराबादस्थित भारत बायोटेक कंपनीने 19 एप्रिल रोजी EUL साठी WHO कडे मंजुरीसाठी अर्ज केला होता. कोवॅक्सिन लस कोरोना विरूद्ध 77.8 टक्के प्रभावी असून सर्वात धोकादायक डेल्टा प्रकारांवर 65.2 टक्के प्रभावी असल्याचे आढळून आले आहे. कंपनीने जूनमध्येच तिसऱ्या टप्प्यातील निकालांचे अंतिम मूल्यांकन पूर्ण केले आहे. EUL मध्ये कोवॅक्सिनचा समावेश करण्यावर विचार करण्यासाठी मंगळवारी TAG ची बैठक झाली.

WHO ने सांगितले की या आठवड्याच्या अखेरीस कंपनीकडून अतिरिक्त माहिती मिळण्याची अपेक्षा आहे. कोवॅक्सिनचा विचार करण्यासाठी पुढील बैठक 3 नोव्हेंबर रोजी होईल. केंद्रीय आरोग्य मंत्रालयाच्या म्हणण्यानुसार, मंगळवारपर्यंत देशात कोरोना लसीचे 103 कोटीहून अधिक डोस देण्यात आले आहेत.

The post WHO कडून अद्याप कोवॅक्सिन लसीला मान्यता नाहीच, मागवला आणखी डेटा appeared first on थोडक्यात घडामोडी.

हैदराबाद : कोवॅक्सिन निर्माता ‘भारत बायोटेक’च्या 50 कर्मचार्‍यांना कोरोनाची लागण झाली आहे. ‘भारत बायोटेक’च्या सहव्यवस्थापकीय संचालक सुचित्रा एला यांनी ट्विटमध्ये ही माहिती दिली आहे. त्यामुळे नागरिकांकडून लसीच्या परिणामकारकतेवर संमिश्र प्रतिक्रिया व्यक्त होत आहेत. तर काहीजण प्रश्न उपस्थित करत आहेत की स्टाफमधील कर्मचाऱ्यांचे लसीकरण का केले गेले नाही.

कोरोना लस कोव्हॅक्सिनच्या पुरवठ्यावर काही राजकीय नेत्यांनी टिपण्णी केली होती, त्याचा संदर्भ देत एला यांनी बुधवारी ट्विट केले की, “काही राज्यांनी आमच्या हेतूंबद्दल शंका उपस्थित करून आम्हाला खूप निराश केले. आमचे ५० कर्मचारी कोविडमुळे काम करू शकत नाहीयेत, तरीही आम्ही कोरोनाच्या काळात लॉकडाऊनमध्ये २४ तास तुमच्यासाठी काम करत आहोत. ”

Covaxin dispatched 10/5/21.18 states have been covered thou in smaller shipments. Quite disheartening to the teams to hear Some states complaining about our intentions. 50 of our employees are off work due to covid, yet we continue to work under pandemic lockdowns 24×7 for U ?? pic.twitter.com/FmQl4vtqXC

— suchitra ella (@SuchitraElla) May 11, 2021

The post ‘भारत बायोटेक’च्या 50 कर्मचार्‍यांना कोरोनाची लागण appeared first on थोडक्यात घडामोडी.

नवी दिल्ली : भारतीय लस कोवॅक्सिन ही कोरोनाच्या 617 व्हॅरिएंटवर गुणकारी असल्याचं स्पष्ट झालं आहे. भारतासाठी ही अतिशय आनंदाची आणि अभिमानास्पद बातमी आहे. ही माहिती व्हाईट हाऊसचे मुख्य वैद्यकीय सल्लागार आणि अमेरिकेचे ख्यातनाम वैद्यकीय तज्ज्ञ डॉ. अॅन्थोनी फाऊची यांनी दिली आहे. भारतात कोरोनामुळे हाहाकार माजलेला असताना कोवॅक्सिन लस 617 प्रकारच्या कोरोना प्रजातींवर गुणकारी असल्याचा अमेरिकेचा अभ्यास काहीसा दिलासादायक आहे.

व्हाईट हाऊसचे मुख्य वैद्यकीय सल्लागार डॉ. अॅन्थोनी फाऊची यांनी सांगितलं की, आम्ही कोरोनासंबंधी रोज डेटा गोळा करतोय. जे लोक भारतीय कोवॅक्सिन लस घेत आहेत त्यांचा अभ्यास केल्यानंतर ती लस कोरोनाच्या 617 प्रजाती अर्थात व्हेरिएन्टवर गुणकारी आहे असं समोर आलं आहे. ही लस घेतल्यानंतर संबंधिताच्या शरीरात कोरोना विषाणूच्या विरोधात अॅन्टीबॉडीज् तयार होत आहेत. भारतीय कोवॅक्सिन लस ही जगातील कोरोनाच्या 617 प्रकारांच्या व्हेरिएंटना पुरून उरतेय.

हैदराबादची कंपनी भारत बायोटेक स्वदेशी लस कोवॅक्सिनची निर्मिती नॅशनल इन्स्टिट्यूट ऑफ व्हायरॉलॉजीच्या मदतीने करत आहे. स्वदेशी लस म्हणून ओळखली जाणारी भारत बायोटेकची कोव्हॅक्सिन या लसीचा फेज 3 चाचणीचा अंतरिम निकाल जाहीर केला आहे. यात ही लस डबल म्युटेंटसह कोरोनाच्या सर्व प्रकारांवर 78 टक्के कार्यक्षम असल्याचा अहवाल आयसीएमआरनं दिला आहे. सर्वात महत्वाचं म्हणजे कोव्हॅक्सिन लस सध्या घातक असलेल्या कोरोनाच्या डबल म्युटेंटवर प्रभावी असल्याचे आढळले आहे. गंभीर स्वरुपाच्या कोविड विरुद्ध कोव्हॅक्सिन 100 टक्के कार्यक्षम असल्याचं म्हटलं आहे.

The post मोठी बातमी : भारताची ‘ही’ कोरोना लस कोरोनाच्या ६१७ प्रजातीवर गुणकारी appeared first on थोडक्यात घडामोडी.

कोविशील्ड लस (Covishield vaccine) आणि कोवॅक्सिन (Covaxin) यांनी जारी केलेल्या फॅक्टशीटमध्ये कोणत्या लोकांना ही लस घेऊ नये, याबाबत स्पष्ट करण्यात आले आहे.

कोवॅक्सिन बनवणाऱ्या भारत बायोटेकने गर्भवती आणि स्तनपान देणाऱ्या महिला तसेच तीव्र ताप, रक्तस्त्राव विकार असलेल्या व्यक्तींना फॅक्टशीटमध्ये ही लस न घेण्याचा सल्ला दिला आहे. तर कोविशील्डची निर्मिती करणार्‍या सीरम इन्स्टिट्यूटने आपल्या फॅक्टशीटमध्ये अशा व्यक्तींना लस न घेण्याचा सल्ला दिला आहे, ज्यांना लसीच्या कोणत्याही घटकापासून गंभीर ऍलर्जीची समस्या आहे.

कोवॅक्सिन लस कोणी घेऊ नये :

1. ज्या व्यक्ती रोग प्रतिकारशक्तीवर परिणाम करणारी औषधे घेतात
2. ज्यांना ऍलर्जीचा इतिहास आहे
3. ताप आहे
4. रक्तस्त्राव डिसऑर्डर असेल किंवा रक्त पातळ आहे, अशा लोकांनी कोवॅक्सिन लस घेऊ नये.
5. गर्भवती आणि स्तनपान देणाऱ्या महिलांनाही कोवॅक्सिन लस घेऊ नये, कारण त्यांच्यावर लसीचा अभ्यास केलेला नाही.
6. याशिवाय कोरोना विषाणूची दुसरी लस घेतलेल्या लोकांनीही कोवॅक्सिन घेऊ नये. लस घेण्यापूर्वी हेल्थकेअरने नमूद केलेल्या इतर गंभीर आरोग्य समस्यांविषयी जाणून घ्या.

कोविशील्ड कोणी घेऊ नये :

1. ज्या लोकांना कोविशील्डच्या कोणत्याही घटकापासून गंभीर ऍलर्जीची समस्या आहे, त्यांनी ही लस घेऊ नये. या लसीमध्ये एल-हिस्टिडाइन, एल-हिस्टिडाइन हायड्रोक्लोराइड मोनोहायड्रेट, डिसोडियम एसीटेट डायहाइड्रेट (EDTA) आणि इंजेक्शनसाठी पाणी हे घटक आहेत.
2. कोविशील्डचा प्रथम डोस घेतल्यानंतर ऍलर्जीची समस्या आल्यास दुसरा डोस घेणे टाळा.

दोन्ही औषध कंपन्यांच्या फॅक्टशीटमध्ये म्हटले आहे की आरोग्याशी संबंधित सर्व माहिती जसे की वैद्यकीय स्थिती, ऍलर्जीची समस्या, ताप, इम्युनो-कॉम्प्रोमाइज्ड किंवा इतर कोणतीही लस घेतलेली असेल तर या सर्व गोष्टी सांगा.

सीरम संस्था आणि भारत बायोटेक या दोघांनीही त्यांच्या कोरोना विषाणूच्या लसीचा धोका आणि दुष्परिणाम नोंदवले आहेत. यात इंजेक्शनच्या ठिकाणी सूज, वेदना, लालसरपणा आणि खाज सुटणे या लक्षणांचा समावेश आहे. याशिवाय लस घेतलेला हात अकडने, वेदना, डोकेदुखी, ताप, अस्वस्थता, थकवा, पुरळ, मळमळ आणि उलट्या असे काही सामान्य दुष्परिणाम जाणवू शकतात.

भारत बायोटेकने आपल्या फॅक्टशीटमध्ये म्हटले आहे कि, क्लिनिकल चाचण्यांमध्ये कोवॅक्सिनने चार आठवड्यांनंतर दिल्या गेलेल्या दुसर्‍या डोसने संसर्गाविरूद्ध प्रतिकारशक्ती निर्माण केली आहे. तथापि, कोवॅक्सिनची क्लिनिकल कार्यक्षमता अद्याप जारी केली गेली नाही, कारण त्यावरील तिसऱ्या फेजचा अभ्यास अद्याप चालू आहे.

सीरम संस्थेने आपल्या फॅक्टशीटमध्ये म्हटले आहे कि, ४ ते 12 आठवड्यांच्या दरम्यान देण्यात आलेल्या लसीच्या दोन डोसमुळे कोरोनापासून संरक्षण मिळू शकते. ही लस किती काळ संरक्षण देईल याबद्दल माहिती नाही, परंतु कोविशील्डच्या दुसर्‍या डोसनंतर संरक्षणात्मक इम्यूनोलॉजिकल रिस्पॉन्स 4 आठवड्यांपर्यंत मिळू शकतो.

The post ‘या’ समस्या असतील तर कोविशील्ड आणि कोवॅक्सिन लस घेऊ नका, सीरम आणि भारत बायोटेकने दिली माहिती appeared first on थोडक्यात घडामोडी.

भारत बायोटेकने स्वदेशी लस-कोवॅक्सिनच्या फेज -२ च्या क्लिनिकल चाचण्यांचा निकाल जाहीर केला आहे. त्यानुसार ही लस कमीतकमी 12 महिन्यांपर्यंत कोरोनापासून सुरक्षित ठेवण्यास सक्षम आहे. सर्वात महत्वाची बाब म्हणजे ही लस सर्व वयोगटातील आणि स्त्रिया आणि पुरुषांसाठी एकसारखीच प्रभावी असल्याचे सिद्ध झाले आहे. सध्या या लसीची फेज-३ ट्रायल सुरू आहे. कंपनीने आपल्या लसीसाठी औषध नियामकांकडून तातडीची मान्यताही मागितली आहे.

अहवालानुसार, अ‍ॅस्ट्राजेनेका आणि ऑक्सफोर्ड विद्यापीठाच्या व्हॅक्सीन-कोव्हीशील्डला डिसेंबरअखेर आपत्कालीन मंजुरी मिळू शकेल. यासाठी ड्रग रेग्युलेटरच्या सब्जेक्ट एक्सपर्ट कमिटीने मागविलेली आकडेवारी सीरम इन्स्टिट्यूट ऑफ इंडियाने (SII) सादर केली आहे, जी भारतात लसीची चाचणी घेत आहे. विषय तज्ज्ञ समितीने भारत बायोटेककडून देखील देशभरात सुरू असलेल्या लसच्या फेज-3 चाचणीच्या सुरुवातीच्या निकालांचा डेटा मागविला आहे.

दरम्यान, भारत बायोटेकने बुधवारी कोवॅक्सिन म्हणजेच BBV152 चे फेज-2 चे निकाल जाहीर केले आहे. यामुळे दीर्घ कालावधीत शरीरात अँटीबॉडी आणि टी-सेल मेमरीचा चांगला प्रतिसाद दिसून आला आहे. फेज -1 स्वयंसेवकांमध्ये, लसीच्या दुसर्‍या डोसच्या तीन महिन्यांनंतरही ही लस प्रभावी असल्याचे दिसून आले आहे. त्याच वेळी, फेज -2 चाचण्यांमध्ये, लसीने वाढीव ह्यूमरल आणि सेल-मध्यस्थ प्रतिकारशक्ती दिसून आली आहे.

कोवॅक्सिनचे फेज-2 चे परिणाम :

• भारत बायोटेकच्या कोवॅक्सिन ट्रायल्स 380 निरोगी मुले आणि प्रौढांवर रॅन्डमली केली गेली. 3 µg आणि 6 µg चे दोन फॉर्म्युले निश्चित केले गेले होते. दोन गट तयार केले गेले आणि दोन इंट्रामस्क्युलर डोस चार आठवड्यांत दिले गेले.
• फेज -१ चाचणीच्या पाठपुराव्यामध्ये, कोवाक्सिनने उच्च-स्तरीय न्यूट्रलायझिंग अँटीबॉडी तयार केल्या. दुसर्‍या लसीकरणाच्या तीन महिन्यांनंतरही सर्व स्वयंसेवकांमध्ये अँटीबॉडीजची संख्या वाढलेली दिसली. या निकालांच्या आधारे, कंपनी दावा करते की कोवॅक्सिनने शरीरात तयार झालेल्या अँटीबॉडीज 6-12 महिने टिकतात.
• फेज -1 च्या अभ्यासापेक्षा फेज -२ च्या अभ्यासात न्यूट्रलायझिंग अँटीबॉडीजची संख्या जास्त असल्याचे दिसून आले आहे. सर्वात चांगली गोष्ट म्हणजे ही लस दिल्यानंतर दिसणारे लोकल आणि प्रणालीगत दुष्परिणाम 24 तासांच्या आत बरे झाले. कोणतेही गंभीर दुष्परिणाम आढळलेले नाहीत.

The post मोठी बातमी : कोवॅक्सिनच्या फेज -२ च्या चाचण्यांचा निकाल जाहीर; कोरोनापासून एक वर्षासाठी मिळणार संरक्षण appeared first on थोडक्यात घडामोडी.

चंदीगड : हरियानाचे आरोग्यमंत्री अनिल विज यांनी कोरोना लसीच्या तिसऱ्या टप्प्याच्या चाचणीसाठी डोस घेतला होता. तरीही अनिल विज कोरोना पॉझिटिव्ह आढळले आहेत. त्यामुळे भारत बायोटेकच्या कोवॅक्सिन लसीबाबत साशंकता निर्माण झाली होती. मात्र लसीचा डोस घेऊनही अनिल विज यांना कोरोनाची लागण कशी झाली याबाबत आता भारत बायोटेकने स्पष्टीकरण दिलं आहे.

भारत बायोटेकने याबाबत ट्वीट करत माहिती दिली की, कोवॅक्सिन लसीची क्लिनिकल ट्रायल दोन डोसवर आधारित आहे. त्यासाठी 28 दिवसांचा कालावधी आहे. लसीचा परिणाम दुसरा डोस घेतल्यानंतर 14 दिवसांनी निश्चित होणार आहे. कोवॅक्सिन लस दोन डोस दिल्यानंतर प्रभावी ठरते. तिसऱ्या टप्प्यातील चाचणीत 50 टक्के स्वयंसेवकांना कोवॅक्सिन लस तर इतरांना प्लेसबो (डमी लस) देण्यात आला होता.

चाचणीमध्ये निम्म्या स्वयंसेवकांना लस आणि निम्म्या स्वयंसेवकांना प्लेसबो देण्यात आला. मात्र स्वयंसेवकांना याबाबत माहिती दिली जात नाही. तसेच लसीचे दोन डोस घेणे आवश्यक असते. त्यानंतर शरीरात अँटिबॉडीज् तयार होत असतात.

The phase 3 trial is a double-blind study where volunteers have a 50% chance of receiving either vaccine or placebo.#BharatBiotech #COVAXIN #clinicaltrials #COVID19

— BharatBiotech (@BharatBiotech) December 5, 2020

The post कोवॅक्सिन लस घेऊनही अनिल विज यांना कोरोनाची लागण.. भारत बायोटेकनं सांगितलं कारण appeared first on थोडक्यात घडामोडी.