पुणे : पुण्याच्या मध्यवर्ती भागात मंगळवारी संध्याकाळी १७ वर्षीय तरुणाची चाकूने वार करून हत्या करण्यात आली. ही धक्कादायक घटना बाजीराव रोडवरील महाराणा प्रताप गार्डनजवळ घडली असून, या प्रकरणी पोलिसांनी तात्काळ कारवाई करत तीन अल्पवयीन आरोपींना ताब्यात घेतले आहे. जुन्या वादातून ही हत्या झाल्याचं समोर आलं आहे.

खडक पोलिस ठाण्याच्या माहितीनुसार, मृत तरुण हा आपल्या मित्रासोबत मोटारसायकलवरून जात असताना अचानक तीन किशोरवयीन मुलांनी त्याच्यावर हल्ला चढवला. आरोपींनी धारदार चाकूंसह हल्ला करून तरुणाला गंभीर दुखापत केली. त्यातच त्याचा मृत्यू झाला. प्राथमिक चौकशीतून असे समोर आले आहे की, मृत तरुण आणि आरोपी हे सर्वजण पर्वती परिसरातील रहिवासी असून, त्यांच्यात काही दिवसांपूर्वी किरकोळ कारणावरून वाद झाला होता. त्याच वादाचा राग मनात धरून आरोपींनी सूडाच्या भावनेतून ही हत्या केल्याची शक्यता पोलिसांनी व्यक्त केली आहे.

“या घटनेत सहभागी असलेल्या तिन्ही अल्पवयीन मुलांची ओळख पटली असून त्यांना ताब्यात घेतले आहे. हत्येसाठी वापरलेले धारदार शस्त्र देखील जप्त करण्यात आले आहे. पुढील तपास सुरू आहे,” अशी माहिती खडक पोलिस ठाण्याच्या अधिकाऱ्याने दिली.

या घटनेमुळे परिसरात तणावाचे वातावरण निर्माण झाले असून, पोलिसांनी खबरदारीचा उपाय म्हणून परिसरात अतिरिक्त बंदोबस्त तैनात केला आहे. तसेच, अल्पवयीन आरोपींच्या पालकांना चौकशीसाठी पोलिस ठाण्यात बोलावण्यात आले आहे.

The post पुण्यात १७ वर्षीय मुलाची चाकूने वार करून हत्या, तीन अल्पवयीन आरोपी पोलिसांच्या ताब्यात appeared first on थोडक्यात घडामोडी.

पुणे : किरकोळ वादातून १५ वर्षीय भाच्याला त्याच्या मामाने चाकूने भोसकून ठार मारले. शुक्रवारी रात्री सिंहगड रस्त्यावरील नऱ्हे भागात शुक्रवारी रात्री ही घटना घडली. त्यानंतर पसार झालेल्या मामाला सिंहगड पोलिसांनी अटक केली.

गजानन गजकोश (वय १५, रा. धारावी, कोळीवाडा, मुंबई) असे खून झालेल्या मुलाचे नाव आहे. याप्रकरणी मेघनाथ अशोक तपासे (वय ४१, रा. मानाजीनगर, नऱ्हे) याला अटक करण्यात आली. याबाबत आरोपी मेघनाथचा मेहुणा मंगेश दत्तात्रय ओव्हाळ (वय ३१, रा. कृष्णाईनगर, मानाजीनगर गणपती मंदिराजवळ, नऱ्हे) यांनी सिंहगड रस्ता पोलीस ठाण्यात फिर्याद दिली आहे.

मिळालेल्या माहितीनुसार, गजानन हा मामा मेघनाथ याच्याकडे राहण्यासाठी आला होता. शुक्रवारी रात्री त्याचा मामाच्या मुलाशी वाद झाला. त्यानंतर रागाच्या भरात मेघनाथने भाचा गजाननला पट्ट्याने बेदम मारहाण केली. त्यानंतर चाकूने त्याच्या छातीवर वार केला. चाकूने भाेसकल्याने त्याचा मोठ्या प्रमाणावर रक्तस्त्राव झाला. गंभीर जखमी झालेल्या गजाननला तातडीने रुग्णालयात दाखल करण्यात आले. मात्र, उपचारांपूर्वीच त्याचा मृत्यू झाला. या घटनेची माहिती मिळताच परिमंडळ तीनचे पोलीस उपायुक्त संभाजी कदम यांनी घटनास्थळी भेट दिली.

रात्री उशिरा आरोपी मेधनाथला अटक करण्यात आली. प्राथमिक तपासात असे दिसून आले की, आरोपीने किरकोळ वादातून त्याच्या भाच्याचा चाकूने वार करून खून केला. वरिष्ठ पोलिस निरीक्षक दिलीप दाईंगडे यांच्या मार्गदर्शनाखाली तपास सुरू आहे.

The post पुणे : मामाने भाच्याला चाकूने भोसकून ठार मारले, किरकोळ वादातून भयंकर कृत्य appeared first on थोडक्यात घडामोडी.

नागपूर : नागपूरच्या रामनगर चौकात दिवसाढवळ्या हत्येची भयंकर घटना घडली आहे. फुटपाथवरील दुकान थाटण्यावरून सुरु झालेला वाद एका व्यक्तीच्या जीवावर बेतला आहे. भररस्त्यात भाजी विक्रेत्याने त्याच्या एका साथीदारासह गॅरेज चालकाची हत्या केली. मृत व्यक्तीचे नाव विशाल निकोसे (वय ३७, रा. पांढराबोडी) असे आहे. पोलिसांनी याप्रकरणी एकाला ताब्यात घेतलं असून या प्रकरणाचा पुढील तपास सुरू आहे.

मिळालेल्या माहितीनुसार, नागपुरातील अंबाझरी पोलीस ठाण्यांतर्गत असलेल्या रामनगर चौकात ही घटना घडली. आरोपींमध्ये किशन रमेश तिवारी आणि त्याचा मित्र निलेश सरोदे यांचा समावेश आहे. विशाल हा गेल्या १८ वर्षांपासून रामनगर येथील फूटपाथवर गॅरेज चालवत होता, तर आरोपी किशन तिवारी हा गेल्या ७ वर्षांपासून त्याच्या शेजारी भाजीचं दुकान चालवत होता. मात्र, गेल्या वर्षभरापासून दोघांचाही जागेवरून वाद सुरू होता. शुक्रवारी दुपारीही त्यांच्यात वाद झाला आणि याच वादातून किशनने त्याचा मित्र नीलेश याच्यासोबत मिळून लोखंडी रॉडने विशालवर हल्ला केला. यात विशालच्या डोक्याला गंभीर दुखापत झाली. विशाल घटनास्थळी रक्तबंबाळ झाला आणि यातच त्याचा जागीच मृत्यू झाला. पोलिसांनी तात्काळ कारवाई करत एकाला ताब्यात घेतलं असून या प्रकरणाचा तपास सुरू केला आहे.

या घटनेने परिसरात खळबळ उडाली आहे. हा प्रकार कायदा आणि सुव्यवस्था राखण्यासाठी एक गंभीर इशारा आहे.

The post नागपुरात दिवसाढवळ्या हत्येची घटना, फुटपाथवर दुकान थाटण्यावरून झालेल्या वादातून भयंकर कृत्य appeared first on थोडक्यात घडामोडी.

नाशिक :  पतीने आपल्या १९ वर्षीय गर्भवती पत्नीची हत्या केल्याची हृदयद्रावक घटना उघडकीस आली आहे. नाशिक शहराच्या एका रहिवासी भागात ही घटना घडली असून, संपूर्ण परिसरात खळबळ उडाली आहे. हे प्रकरण उघडकीस येऊ नये म्हणून पतीने पोलीस ठाण्यात पत्नी हरवल्याची तक्रार देखील दाखल केली होती. मात्र, पोलीस तपासात संपूर्ण सत्य बाहेर आले आणि पतीचे बिंग फुटले.

मिळालेल्या माहितीनुसार, मृत अमृताकुमार आणि आरोपी पती विकीरॉय हे सातपूर परिसरात राहत होते. पती बिगारी कामगार आहे. परिस्थिती हलाखीची असल्याने आणि महिला गरोदर असल्यामुळे ती आपल्या वडिलांकडून पैसे आणायची. मात्र, या गोष्टीवरून त्यांच्यात कायम वाद व्हायचा. पतीला आपल्या पत्नीच्या वागण्यावर आणि घरी येणाऱ्या जाणाऱ्यांवर शंका आली होती. काही दिवसांपासून त्याच्या मनात संशय निर्माण झाला होता. त्यातूनच आरोपीच्या मनात राग धगधगत होता. २८ फेब्रुवारीआधी एका रात्री ते दोघेच घरात असताना रागाच्या भरात पतीने तिच्यावर हल्ला केला. त्याने पत्नीला गंगापूर रोडलगत असलेल्या शहीद अरुण चित्ते पुलाजवळ नेत तिचा गळा आवळला आणि पत्नीची हत्या केली.

गंगापूर रोडवरील आसाराम बापू आश्रमासमोरील नदीपात्रालगत झाडाझुडपात मंगळवारी एका महिलेचा कुजलेल्या अवस्थेत मृतदेह आढळून आला होता. दरम्यान, हे प्रकरण उघडकीस येऊ नये म्हणून नवऱ्याने पोलीस ठाण्यात जाऊन पत्नी हरवली असल्याची तक्रार दाखल केली. नाशिक तालुका पोलिसांनी मृतदेहाचे फोटो शहर आणि ग्रामीण पोलिसांना पाठवले. त्याचे वर्णन पंचवटी पोलीस ठाण्यात बेपत्ता नोंद असलेल्या महिलेशी तंतोतंत जुळले. मृतदेहावरील कपडे आणि टॅटू पाहून मृतदेह पत्नीचा असल्याचं पतीने सांगितलं. त्यानंतर पोलिसांनी कसून चौकशी केली तेव्हा पतीने पत्नीची गळा आवळून हत्या केल्याचे कबूल केले. पोलिसांनी आरोपी पतीला अटक केली आहे. न्यायालयाने आरोपीला तीन दिवसांची पोलीस कोठडी सुनावली आहे.

The post हृदयद्रावक! चारित्र्याच्या संशयावरून पतीने केली गर्भवती पत्नीची हत्या appeared first on थोडक्यात घडामोडी.

पुणे : पुण्यात पाच वर्षांपूर्वी घडलेल्या हत्या प्रकरणाचा अखेर उलगडा झाला आहे. मृत व्यक्तीच्या बहिण-भावानेच त्याची हत्या केल्याचं पोलीस तपासात निष्पन्न झालं. एक खोली नावावर करण्याच्या वादातून बहिण-भावाने त्यांच्या मित्रांच्या मदतीने २३ वर्षांच्या सख्ख्या लहान भावाला बेदम मारहाण केली. त्यानंतर त्याला कॅनॉलमध्ये ढकलून त्याचा खून केल्याचे गुन्हे शाखेच्या युनिट तीनने उघडकीस आणले आहे. पोलीसांनी वेगवेगळ्या पद्धतीने केलेल्या तपासानंतर आणि प्रचंड मेहनतीनंतर या प्रकरणाचा उलगडा झाला आहे.

मिळालेल्या माहितीनुसार, पंकज चंद्रकांत दिघे (वय २३, एरंडवणा) असे खून झालेल्या तरुणाचे नाव आहे. याप्रकरणी त्याला  कॅनोलमध्ये ढकलून देणारा मित्र महेश बाबुराव धनावडे (वय ३७, शिवणे) याला अटक करण्यात आली आहे. याप्रकरणी हडपसर पोलीस ठाण्यात पंकजचा भाऊ सुहास चंद्रकांत दिघे (वय २९), बहिण अश्विनी आडसुळ यांच्यासह तिघांवर गुन्हा दाखल करण्यात आला आहे. याबाबत पोलीस अंमलदार राजेंद्र मारणे यांनी तक्रार दाखल केली आहे.

पंकज, सुहास आणि अश्विनी हे सख्खे भाऊ बहिण आहेत. त्यांच्या आईचे आजाराने निधन झालेले आहे. दिघे कुटूंब एरंडवणा परिसरात राहत होते. पंकज काही काम करत नव्हता. तो राहत्या घरातील एक खोली माझ्या नावावर करा, असे म्हणून वाद घालत होता. त्यामुळे सुहास व अश्विनी यांनी त्याला ठार मारण्याचा कट रचला. त्यानुसार, १४ मार्च २०१७ रोजी सायंकाळी त्याला मित्र महेश व प्रशांत यांच्या मदतीने चौघांनी बेदम मारहाण केली. त्यानंतर त्याला महेशच्या तवेरा गाडीतून डेक्कनमधील कॅनॉल येथे नेऊन कॅनॉलच्या पाण्यात ढकलून दिले.

दरम्यान, पोलिसांची दिशाभूल करण्याच्या हेतूने पाच दिवस याबाबत काहीएक न बोलता ते शांत राहिले. त्यानंतर १९ मार्च २०१७ रोजी पंकजचा भाऊ सुहासने पंकज बेपत्ता असल्याची तक्रार डेक्कन पोलीसांकडे दिली. दरम्यान, १८ मार्च रोजी पंकजचा मृतदेह कॅनोलमध्ये वाहून हडपसरमध्ये मिळून आला. त्याबाबत हडपसर पोलीसांनी आकस्मिक मृत्यूची नोंद केली. दरम्यान, गुन्हे शाखेच्या युनिट तीनचे पोलीस अंमलदार राजेंद्र मारणे यांना या घटनेची माहिती मिळाली. त्यांनी पोलीस निरीक्षक अनिता मोरे यांना याबाबत माहिती देत तपासाला सुरूवात केली.

प्रथम त्यांनी पंकजचा मिसींग रिपोर्ट कुठे दाखल आहे, याचा शोध घेतला. त्यानंतर कुठे मृतदेह आढळून आला आहे का, याची माहिती घेतली असता त्यांना हडपसरमध्ये मृतदेह आढळल्याचे समजले. परिसरात माहिती घेतल्यानंतर त्यांना एक प्रत्यक्षदर्शी देखील सापडला. त्यानंतर आरोपी महेश धनावडे याला ताब्यात घेऊन सखोल तपास केल्यानंतर त्याने घटनेची माहिती दिली आणि या खूनाचा उलगडा झाला. पंकजच्या एका हातावर आई आणि दुसऱ्या हातावर पंकज असे गोंदलेले होते. त्यावरून त्याच्या मृतदेहाची ओळख पटली.

The post पुणे : पाच वर्षांपूर्वीच्या ‘त्या’ हत्या प्रकरणाचा अखेर उलगडा, बहिण-भावानेच केली लहान भावाची हत्या appeared first on थोडक्यात घडामोडी.

हिंगोली : शेतकरी देवानंद मुधोळ (वय 20) यांचा मागील आठवड्यात खुन झाला होता. आता या प्रकरणाचा उलगडा झाला आहे. कळमनुरी तालुक्यातील गौळ बाजार येथे शेतात पाणी देण्यासाठी गेलेल्या तरुण शेतकऱ्याची हत्या करण्यात आली होती. ही हत्या देवानंद यांच्या वडिलांनीच केल्याचे पोलिस चौकशीत निष्पन्न झाले आहे. पोलिसांनी आरोपी वडिलांना आज (२७ मे) दुपारी ताब्यात घेतले आहे.

मिळालेल्या माहितीनुसार, कळमनुरी तालुक्यातील गौळ बाजार येथील संतोष मुधोळ यांचे गावापासून काही अंतरावर १२ एकर शेत आहे. संतोष मुधोळ यांचा मुलगा देवानंद हा शनिवारी (२१ मे) रात्रीच्या वेळी शेतात पाणी भरण्यासाठी गेला होता. मात्र, रविवारी सकाळी तो घरी परतला नाही. त्यानंतर सकाळी ९.३० वाजता त्यांची हत्या झाल्याचे उघडकीस आले. या प्रकरणी कळमनुरी पोलिस ठाण्यात गुन्हा दाखल करण्यात आला होता. पोलिसांनी तपास सुरु केला, मात्र पोलिसांना हत्या करण्याचे कोणतेही कारण सापडत नव्हते. घटनास्थळी कुठल्याही प्रकारचा पुरावा मिळत नव्हता. त्यामुळे पोलिसांसमोर या खुनाचा उलगडा करण्याचे मोठे आव्हान होते.

मागील दोन वर्षापासून देवानंद हा शेती करत होता. तो होतकरू होता आणि वडिलांनी घेतलेले कर्जही त्याने फेडले होते. तसेच वडिलांना यापुढे कोणीही पैसे देऊ नये, असे त्याने सर्वांना सांगितलेले होते. काही दिवसांपूर्वीच संतोष मुधोळ याने बकरा विकला होता, त्यावरून दोघांमध्ये वाद झाला होता. देवानंद रात्रीच्या वेळी शेतात पाणी भरण्यासाठी गेला होता. तसेच मृत देवानंद याचे कोणाशी शत्रुत्वही नव्हते. त्यामुळे पोलिसांना संशय आला आणि त्यांनी देवानंद यांचे वडील संतोष मुधोळ यांना ताब्यात घेऊन चौकशी सुरू केली. तेव्हा त्यानेच मुलाची हत्या केल्याची कबुली दिली.

देवानंद याच्या डोक्यात कुऱ्हाडीने घाव घालून खून केल्याची माहिती वडील संतोष मुधोळ यांनी पोलिसांना दिली. त्यानंतर हत्या करण्यासाठी वापरलेली कुऱ्हाड जप्त करण्यासाठी पोलिसांचे पथक गौळ बाजारकडे रवाना झाले. पोलिस अधीक्षक राकेश कलासागर यांच्या मार्गदर्शना खाली यातिष देशमुख, कळमनुरीचे पोलिस निरीक्षक सुनील निकाळजे, सहायक निरीक्षक रोयलावार, उपनिरीक्षक सोनुळे, जमादार घ्यार, एस. पी. सांगळे यांच्या पथकाने तपास सुरू केला व खूनाचा उलगडा केला.

The post धक्कादायक! हिंगोलीतील तरुण शेतकऱ्याच्या हत्या प्रकरणाचा अखेर उलगडा, वडिलांनीच केली निर्घृण हत्या… appeared first on थोडक्यात घडामोडी.

जालना : जालना शहरातील सोनलनगर भागात चारित्र्यावर संशय घेत मायलेकीचा खून केल्याची घटना सोमवारी सकाळी समोर आली आहे. पती, सवत व तिच्या मुलाने मारहाण करून भारती गणेश ऊर्फ संजू सातारे (३६) आणि वर्षा सातारे (१७) यांचा खून केला.

मिळालेल्या माहितीनुसार, मृत भारती सातारे यांची बहीण पंचशीला कदम यांनी पोलिस ठाण्यात खुनाचा गुन्हा दाखल केला आहे. त्यांनी म्हटले आहे की, भारती सातारे आणि वर्षा सातारे यांच्या चारित्र्यावर संशय घेऊन गणेश ऊर्फ संजू सातारे, सवतीसह तिचा १६ वर्षांचा मुलगा या तीन जणांनी मारहाण केली होती. १५ दिवसांपासून ते या दोघींना मारहाण करत होते. या मारहाणीतच त्या दोघी मायलेकींचा मृत्यू झाला.

भारती ही गणेश सातारे याची दुसरी पत्नी होती. तिचे पूर्वी लग्न झालेले होते. पहिल्या पतीपासून तिला दोन मुली होत्या. एकीचे लग्न झालेले आहे, तर दुसरी मुलगी वर्षा होती. भारती यांचे गणेश सातारे याच्यासोबत लग्नापूर्वीपासूनच प्रेमसंबंध असल्याचे समजल्याने त्यांच्यापासून पहिल्या पतीने १५ वर्षांपूर्वीच घटस्फोट घेतला होता. त्यानंतर गणेश सातारे याने भारतीसोबत लग्न केले होते. भारती यांना गणेश सातारे याच्यापासून आठ वर्षांचा एक मुलगा आहे. आरोपी गणेश ऊर्फ संजू सातारे, त्याची पहिली पत्नी व तिचा १६ वर्षांचा मुलगा या तीन जणांना पोलिसांनी ताब्यात घेतले आहे.

The post जालन्यात खळबळ! चारित्र्यावर संशय घेत मायलेकीचा मारहाण करून खून appeared first on थोडक्यात घडामोडी.

नांदेड, 01 मे : नांदेड शहरात गेल्या दोन दिवसात दोन जणांचा खून झाला आहे. दोन दिवसात झालेल्या दोन खुनांच्या घटनेमुळे शहरात खळबळ उडाली आहे. पहिला खून जुन्या नांदेड शहरात झाला आहे. एका 23 वर्षीय तरुणाचा धारदार शस्त्राने वार करुन खुन करण्यात आला आहे. तर दुसरा खून मिलगेट परिसरात संपादकावर तीक्ष्ण चाकूनं वार करून केला आहे. या दोन्ही खुनांमुळे शहरात खळबळ उडाली आहे.

यामध्ये पहिल्या घटने 23 वर्षीय अमोल साबणे याची हत्या करण्यात आली. ही घटना शुक्रवारी रात्री शहरातल्या देगलूर नाका भागात घडली. अमोल हा शुक्रवारी सकाळी शौचास पशुवैद्यकीय दवाखान्याच्या परिसरात गेला होता त्यानंतर तो परत आलाच नाही. रात्र झाली तरी तो परत न आल्यानं त्याचे मित्र आणि कुटुंबियांनी त्याचा शोध घेण्यास सुरुवात केली. त्यानंतर अमोलचा मृतदेह एका झुडपात आढळून आला आहे. अज्ञात आरोपींनी त्याच्यावर धारदार शस्त्रानं वार करुन त्याचा खून केला. या प्रकरणी मृत अमोल याचा भाऊ श्याम साबणे यांनी पोलीस स्टेशनमध्ये तक्रार दाखल केली. या तक्रारीवरुन इतवारा पोलीस ठाण्यात अज्ञात आरोपींविरोधात खुनाचा गुन्हा दाखल करण्यात आला आहे.

दुसऱ्या घटनेतील मृताचे नाव प्रेमानंद जोंधळे असं आहे. शनिवारी रात्री 10 च्या सुमारास मिल गेट रस्त्यावर 35 वर्षीय प्रेमानंद जोंधळे भररस्त्यात चाकूनं भोसकून खून करण्यात आला. प्रेमानंद जोंधळे हे शहरातील सोमेश कॉलनी येथील रहिवासी होते. त्यांच्या घरासमोर कृष्णा हातागळे याचं घर आहे. काही दिवसांपूर्वी दोघांच्या कुटुंबीयांचा वाद झाला होता. याच कारणातून कृष्णा हातागळे याने प्रेमानंद जोंधळे यांच्यावर चाकूनं सात ते आठ वार केले. यात प्रेमानंद यांचा मृत्यू झाला. या घटनेनंतर आरोपी फरार झाला आहे. वजीराबाद पोलीस आरोपीचा शोध घेत आहेत.

The post नांदेडमध्ये खळबळ! २४ तासात दोन तरुणांची निर्घृण हत्या appeared first on थोडक्यात घडामोडी.

नवी दिल्ली : माजी केंद्रीय मंत्र्याच्या पत्नीची निर्घृण हत्या करण्यात आली आहे. माजी केंद्रीय मंत्री दिवंगत पीआर कुमारमंगलम यांच्या पत्नी किट्टी कुमारमंगलम (वय 67) यांची त्यांच्या राहत्या घरात हत्या करण्यात आली आहे. देशाची राजधानी दिल्लीत ही धक्कादायक घटना घडली आहे. किट्टी यांचे पती पी रंगराजन कुमारमंगलम वाजपेयी सरकारमध्ये मंत्री होते. त्यांचा कॅन्सरने मृत्यू झाला होता.

मिळालेल्या माहितीनुसार, किट्टी कुमारमंगलम दिल्लीतील वसंत विहार परिसरात राहत होत्या. मंगळवारी (६ जुलै) रात्री ही घटना घडली आहे. रात्री 9 वाजण्याच्या सुमारास त्यांच्याकडे कामाला असणाऱ्या मोलकरणीने दार उघडलं, तेव्हा धोबी आला होता. या धोब्याने मोलकरणीला बळजबरीने बाजूच्या खोलीत नेलं आणि बांधून ठेवलं. त्यानंतर आणखी दोघेजण आले. या सर्वांनी मिळून किट्टी यांचं तोंड उशीने दाबलं, त्यामुळे गुदमरून त्यांचा मृत्यू झाला.

काही वेळाने मोलकरणीने स्वत:ला सोडवून आरडाओरड करण्यास सुरुवात केली, त्यानंतर हा सर्व प्रकार समोर आला. त्यानंतर रात्री 11 च्या सुमारास पोलिसांना या घटनेची माहिती देण्यात आली. पोलिसांनी मोलकरणीचा जबाब नोंदवून घेतला, त्यानंतर वसंत विहार परिसरातच राहणाऱ्या राजू नावाच्या धोब्याला पोलिसांनी ताब्यात घेतलं. त्यांच्या अन्य दोन साथीदारांचा शोध अद्याप सुरू आहे. अद्याप या हत्येमागचे कारण समोर आलेले नाही.

The post दिल्लीत माजी केंद्रीय मंत्री कुमारमंगलम यांच्या पत्नीची निर्घृण हत्या appeared first on थोडक्यात घडामोडी.

बिहार : पाच जणांनी अल्पवयीन मुलीवर सामूहिक बलात्कार करून तिची हत्या केल्याची संतापजनक घटना उघडकीस आली आहे. रात्रीच्या वेळी पाच जणांनी खिडकी फोडून घरात प्रवेश केला आणि ते अल्पवयीन मुलीला जबरदस्तीने घेऊन गेले. या नराधमांनी पहिल्यांदा तिच्यावर सामूहिक बलात्कार केला, त्यानंतर मुलीची हत्या करून त्यांनी तिचा मृतदेह झाडीत फेकून दिला. ही घटना वैशाली जिल्ह्यातील भगवानपूर रत्ती गावात घडली आहे.

मिळालेल्या माहितीनुसार, 29 जून रोजी रात्रीच्या सुमारास ही घटना घडली. काल (३० जून) सायंकाळी उशिरा या मुलीचा मृतदेह सापडला. मृत मुलीचे नातेवाईक जवळच्या गावात लग्नासाठी गेले होते. ही 14 वर्षाची अल्पवयीन मुलगी घरी तिच्या आजोबांबरोबर थांबली होती. ही मुलगी अकरावीची विद्यार्थिनी होती. रात्री मुलगी घरात झोपली होती, तर तिचे आजोबा घराच्या बाहेर दरवाजाजवळ झोपले होते. दरम्यान, पाच तरुणांनी खिडकी फोडून घरात प्रवेश केला आणि मुलीला जबरदस्तीने पळवून नेले. यानंतर तिच्यावर सामूहिक बलात्कार केला. परंतु, त्यानंतर हे प्रकरण उघडकीस येईल, या भीतीने त्यांनी पीडित मुलीची हत्या केली आणि तिचा मृतदेह झाडीत फेकून दिला.

सकाळी बराच उशीर झाला तरी मुलगी बाहेर आली नाही तेव्हा तिच्या आजोबांना चिंता वाटायला लागली. तिच्या आजोबांनी शेजाऱ्यांना याबद्दल सांगितले. शेजार्‍यांनी घराचा दरवाजा ठोठावला पण आतून प्रतिसाद मिळाला नाही, त्यानंतर त्यांनी पाहिले की घराची खिडकी फोडलेली होती आणि आत कोणीच नव्हते. त्यानंतर सर्वांनी गावात सर्वत्र मुलीचा शोध सुरू केला. थोड्या वेळाने त्यांना या मुलीचा मृतदेह झुडपात पडलेला आढळला. ग्रामस्थांनी तात्काळ घटनेची माहिती पोलिसांना दिली. माहिती मिळताच पोलिस घटनास्थळी दाखल झाले आणि त्यांनी मुलीचा मृतदेह ताब्यात घेऊन पोस्टमार्टमसाठी पाठविला. पोस्टमार्टम अहवालात स्पष्ट झाले की अल्पवयीन मुलीची सामूहिक बलात्कारानंतर हत्या करण्यात आली आहे.

दरम्यान, मुलीच्या आजोबांनी पोलिस ठाण्यात तक्रार दाखल केली. गुन्हा दाखल केल्यानंतर तपासात पाच जणांची नावे समोर आली. पोलिसांनी त्यातील तीन आरोपींना अटक केली असून दोघे फरार आहेत. पोलिस त्यांचा शोध घेत आहेत.

The post अल्पवयीन मुलीवर सामूहिक बलात्कार करून हत्या, खिडकी फोडून घरात घुसले आरोपी… appeared first on थोडक्यात घडामोडी.