मुंबई : पालघर जिल्हयातील खावडा अतिउच्च दाब विद्युत वाहिन्यांच्या उभारणीसाठी सुरू असलेल्या कामामध्ये प्रकल्पबाधीत शेतकऱ्यांना तुलनात्मकरित्या जास्त असलेला मोबदला देण्यात यावा. स्थानिक प्रशासन आणि संबधित कंपन्यांनी समन्वयाने प्रश्न मार्गी लावावा असे निर्देश वन मंत्री गणेश नाईक यांनी दिले.

पालघर जिल्ह्यातील खावडा अतिउच्च दाब विद्युत वाहिन्यांच्या उभारणीतील दर निश्च‍िती व अन्य विषयांच्या अनुषंगाने मंत्रालयात बैठक पार पडली. यावेळी खासदार डॉ. हेमंत सावरा, पालघरच्या जिल्हाधिकारी डॉ. इंदूमणी जाखड, दूरदृश्य प्रणालीद्वारे जिल्हा पोलीस अधिक्षक पालघर यतिश देशमुख, रेझोनियाचे कार्यकारी संचालक निनाद पितळे, ‘महापारेषण’चे कार्यकारी अभियंता उल्हास ताकपिरे, महाप्रबंधक के.बी.सुब्रमण्यम, अदानी पावर, रेझोनिया, पावरग्रीड कॉरपोरेशन ऑफ इंडिया लि. यासह इतर अधिकारी या बैठकीला उपस्थित होते.

वन मंत्री नाईक म्हणाले की, पालघर जिल्ह्यातील खावडा अतिउच्चदाब विद्युतवाहिन्या उभारणीचे काम अदानी पावर, रेझोनिया, पावरग्रीड कॉरपोरेशन ऑफ इंडिया लि., महापारेषण या कंपन्यांतर्फे सुरू आहे. जिल्हा प्रशासन व या कंपन्यांनी शेतकऱ्यांना व स्थानिक नागरिकांना विश्वासात घेवून काम करावे. या प्रकल्पासाठी सर्वांचे सहकार्य आवश्यक आहे. शेतकऱ्यांना देय मोबदला मूल्यांकन तुलनात्मकरित्या जास्तीत जास्त देण्यासाठी प्रशासन व खासगी कंपन्यांनी प्राधान्य द्यावे. शासनाच्या मार्गदर्शक सूचनांचा अवलंब करून हा प्रश्न सोडवावा. या प्रकल्पाची कामे गतीने करण्यासाठी जिल्हा प्रशासनाने नोडल अधिकारी नेमले असून पालघर जिल्हाधिकारी देखील हे काम गतीने करत आहेत. कामाची अशाच प्रकारे गती ठेवल्यास हे प्रकल्प विहित वेळेत पूर्ण होतील असेही मंत्री नाईक म्हणाले.

The post खावडा प्रकल्पबाधीत शेतकऱ्यांना जास्तीत जास्त मोबदला द्यावा – वन मंत्री गणेश नाईक appeared first on थोडक्यात घडामोडी.

पुणे : रिंगरोड प्रकल्पासाठी जमीन संपादनाची प्रक्रिया अन्यायकारक असल्याचे म्हणत अपुरा मोबदला दिला जात असल्याच्या विरोधात शेतकरी आवाज उठवत आहेत. आपल्या जमिनीला बाजारभावापेक्षा पाचपट अधिक भाव मिळावा या मागणीसाठी शेतकरी हक्क समिती या शेतकरी संघटनेने जिल्हाधिकारी कार्यालयासमोर धरणे आंदोलन सुरू केले आहे.

शेतकऱ्यांचा विकासाला पाठिंबा आहे, मात्र भूसंपादन प्रक्रियेतील विसंगती ते अधोरेखित करत आहेत. प्राथमिक सूचनेमध्ये हंगामी बागायती जमिनीचा उल्लेख करण्यात आला होता, परंतु अंतिम नोटीसमध्ये खरीप हंगामाचा संदर्भ देण्यात आला, ज्यामुळे नुकसान भरपाई कमी झाली. अशा बाबींशी संबंधित शासन निर्णय (GR) मध्ये नमूद केल्याप्रमाणे त्यांना बाजारभावापेक्षा पाचपट अधिक नुकसान भरपाई मिळावी, असा शेतकऱ्यांचा युक्तिवाद आहे. त्यासाठी आंदोलन सुरू असून आंदोलनात हवेली तालुक्यातील कल्याण, रांजे, राठवडे, वरदाडे, वसावेवाडी, सांगरुण, मांडवी, तावडी, बाहुली, आदींसह विविध गावातील शेतकरी सहभागी झाले आहेत.

The post रिंगरोड प्रकल्पासाठी जमीन संपादनाची प्रक्रिया अन्यायकारक, शेतकऱ्यांचे जिल्हाधिकारी कार्यालयासमोर आंदोलन appeared first on थोडक्यात घडामोडी.

बहादूरगड : नोव्हेंबर २०२० पासून दिल्लीच्या सीमेवर केंद्र सरकारने लागू केलेल्या तीन कृषी कायद्यांविरोधात शेतकऱ्यांचं आंदोलन सुरू आहे. या आंदोलनात वेगवेगळ्या कारणांनी आत्तापर्यंत जवळपास २०० हून अधिक शेतकऱ्यांचा मृत्यू झाला आहे. त्यातच आता हरियाणाच्या बहादूरगडमध्ये पुन्हा एक मोठा अपघात झाला आहे. गुरुवारी पहाटे भरधाव ट्रकने तीन आंदोलनकर्त्या महिलांना चिरडल्याची दुर्दैवी घटना घडली. ट्रकने चिरडल्यामुळे तीन महिलांचा मृत्यू झाला तर इतर तीन महिला गंभीर जखमी झाल्या आहेत.

सकाळी ६.०० वाजल्याच्या सुमारास झज्जर रोडवर फ्लायओव्हरखाली ही घटना घडली. आंदोलनकर्त्या शेतकऱ्यांच्या निर्धारीत रोटेशननुसार या महिला आंदोलनानंतर आपल्या घरी निघाल्या होत्या. या महिला रस्त्यावरील डिव्हायडरवर बसून घरी जाण्यासाठी रिक्षाची वाट पाहत होत्या. यावेळी एका अनियंत्रित वेगानं येणाऱ्या ट्रकने या महिलांना धडक दिली. घटनेची माहिती मिळताच पोलिसांनी घटनास्थळी धाव घेतली आणि जखमी नागरिकांना रुग्णालयात दाखल केलं.

मिळालेल्या माहितीनुसार, या महिला पंजाबच्या मानसा जिल्ह्याच्या रहिवासी होत्या. अपघातानंतर ट्रक चालक घटनास्थळावरून फरार झाला. पोलिस त्याचा शोध घेत आहेत. मृत्युमुखी पडलेल्या दोन महिलांनी जागेवरच प्राण सोडले तर गंभीर जखमी झालेल्या एका महिलेने रुग्णालयात अखेरचा श्वास घेतला. छिंदर कौर (६० वर्ष), अमरजीत कौर (५८ वर्ष), आणि गुरमेल कौर (६० वर्ष) अशी मृत्युमुखी पडलेल्या महिलांची नावं आहेत. जखमी झालेल्या इतर तीन महिलांची प्रकृती देखील गंभीर आहे.

The post हरियाणात भरधाव वेगाने जाणाऱ्या ट्रकने शेतकरी आंदोलनकर्त्या महिलांना चिरडलं, 3 महिलांचा मृत्यू, 3 गंभीर जखमी appeared first on थोडक्यात घडामोडी.

नवी दिल्ली : राष्ट्रपती रामनाथ कोविंद यांच्या अभिभाषणाबाबत धन्यवाद प्रस्तावावर चर्चा पूर्ण झाली. पंतप्रधान नरेंद्र मोदी यांनी लोकसभेतील भाषणात कृषी कायद्यांचं समर्थने केलं. यावेळी पंतप्रधानांच्या भाषणादरम्यान विरोधकांनी जोरदार घोषणाबाजी केली. यानंतर संतापलेल्या पंतप्रधानांनी काँग्रेस खासदार अधिर रंजन चौधरी यांना समज दिली.

पंतप्रधान मोदी म्हणाले कि, हे जास्त होतंय, मी तुमचा आदर करणारा माणूस आहे. मोदींनी विरोधकांना सांगितले की आतापर्यंत छोट्या शेतकऱ्यांकडे दुर्लक्ष झालं आहे. जर छोटे शेतकरी जागे झाले तर तुम्हाला देखील उत्तर द्यावे लागेल.

हे सभागृह आणि सरकार आंदोलक शेतकऱ्यांचा आदर करतं असं पंतप्रधान मोदी यांनी आपल्या भाषणात सांगितलं. सोबतच दिल्लीच्या सीमेवर बसलेल्या आंदोलकांमध्ये अफवा परवल्या गेल्याचा आरोपही त्यांनी केला. मोदी म्हणाले की, “सातत्याने शेतकऱ्यांशी चर्चा सुरु आहे. जिथे बदलाची गरज आहे त्यावर विचारही केला. शेतकऱ्यांचा फायदा व्हावा हाच आमचा शुद्ध हेतू आहे.”

दरम्यान, पंतप्रधानांच्या भाषणादरम्यान काँग्रेस खासदारांनी जोरदार गोंधळ घातला. सुरुवातीला काँग्रेस खासदारांकडे दुर्लक्ष करणाऱ्या पंतप्रधान मोदींनी नंतर मात्र त्यांना चांगलीच समज दिली. हे योग्य नाही, आता गोंधळ थांबवा, असं मोदींनी काँग्रेस खासदार अधिर रंजन चौधरी यांना सांगितलं. तसंच माझ्या भाषणात अडथळे निर्माण करणं ही सुनियोजित रणनीती असल्याचं त्यांनी सांगितलं.

दरम्यान पतंप्रधान मोदींचं भाषण सुरु असतानाच काँग्रेस खासदारांनी सभात्याग केला. यानंतर मोदींनी काँग्रेसला टोला लगावला. “काँग्रेस न स्वत:चं भलं करु शकते ना देशाचं. काँग्रेस खासदारांची राज्यसभेत वेगळी भूमिका असते आणि लोकसभेत वेगळी भूमिका असते,” असंदेखील पंतप्रधान मोदी यावेळी म्हणाले.

The post हे जास्त होतंय, गोंधळ घालणाऱ्या काँग्रेस खासदारांवर संतापले पंतप्रधान मोदी… appeared first on थोडक्यात घडामोडी.

सातारा : शेतकरी आंदोलनाला समर्थन देणाऱ्या परदेशातील सेलिब्रिटींविरोधात मास्टरब्लास्टर सचिन तेंडुलकरने ट्वीट केलं होतं. यावर प्रतिक्रिया देताना राष्ट्रवादी काँग्रेसचे अध्यक्ष शरद पवार यांनी ‘ज्यांना ज्या क्षेत्रातलं कळतं त्यातलं त्यांनी बोलावं’ असा सल्ला सचिनला दिला होता. यावरून आता सदाभाऊ खोत यांनी शरद पवार यांच्यावर टीका केली आहे. साताऱ्यातील पत्रकार परिषदेत बोलताना सदाभाऊ खोत म्हणाले कि, शरद पवार कधी क्रिकेट खेळले होते का, तरी ते अध्यक्ष होते.

पॉप गायिका रिहानाने शेतकरी आंदोलनाला पाठिंबा दर्शवला होता, त्यानंतर मास्टरब्लास्टर सचिन तेंडुलकरने ट्वीट करत म्हटलं होतं कि, “भारताच्या सार्वभौमत्वाशी तडजोड केली जाऊ शकत नाही. बाह्य शक्ती प्रेक्षक असू शकतात परंतु यात सहभागी होऊ शकत नाहीत. भारतीयांना भारत माहित आहे आणि त्यांनी भारतासाठी निर्णय घ्यावा. चला एक राष्ट्र म्हणून एकजूट राहू या.”

India’s sovereignty cannot be compromised. External forces can be spectators but not participants.
Indians know India and should decide for India. Let’s remain united as a nation.#IndiaTogether #IndiaAgainstPropaganda

— Sachin Tendulkar (@sachin_rt) February 3, 2021

सचिनने केलेल्या ट्विटनंतर अनेक जणांनी वेगवेगळ्या प्रतिक्रिया दिल्या. त्यातच शरद पवार यांनी देखील सचिनला सल्ला दिला कि, आपलं क्षेत्र सोडून इतर गोष्टी बोलताना काळजी घ्यावी.

या पार्श्वभूमीवर शरद पवार यांच्यावर आता सदाभाऊ खोत यांनी टीका केली आहे. ते म्हणाले की, “शरद पवार कधी क्रिकेट खेळले होते का? तरी ते अध्यक्ष होते. ते कोणत्या फडात कुस्ती खेळले? तरीही ते कुस्तीगीर परिषदेचे अध्यक्ष आहेत. अनेकांना वाटतं मला सोडून दुसऱ्याला कळत नाही. अशी कमी लेखण्याची पद्धत काही लोकांनी राज्यात लावली आहे. हे योग्य नसून नवीन नेतृत्वाला हानीकारक आहे.”

The post शरद पवार कधी क्रिकेट खेळले होते का तरी ते अध्यक्ष होते, सचिनला दिलेल्या ‘त्या’ सल्ल्यावरून सदाभाऊ खोत यांची टीका appeared first on थोडक्यात घडामोडी.

नवी दिल्ली : सोमवारी, राज्यसभेत पंतप्रधान नरेंद्र मोदी यांनी राष्ट्रपतींच्या अभिभाषणावर धन्यवाद प्रस्तावाला उत्तर दिलं. पंतप्रधान मोदी म्हणाले, 21 वं शतक भारतासाठी प्रेरणादायी आहे. सर्वात मोठी कोरोना लसीकरण मोहिम भारतात राबवली जात आहे. भारतानं अनेक देशात कोरोना लस पाठवली आहे. संपूर्ण जगाला याचा अभिमान वाटतो. यासाठी सर्वांनी एकत्रितपणे काम केले आहे. कोरोना काळात नागरिकांचे मनौधैर्य वाढवणाऱ्या उपक्रमाची चेष्टा करण्यात आली, दिवा लावण्याच्या उपक्रमाची अनेकांनी खिल्ली उडवली, अशा संकटाच्या काळात तरी विरोधकांनी राजकारण करू नये.

राष्ट्रपतींचं अभिभाषण मार्ग दाखवणारं ठरलं आहे. संपूर्ण विश्व संकटांचा सामना करत आहे. कोरोना संकटाचा कुणी विचारही केला नसेल अशा काळात आपण कोरोनाविरुद्धची लढाई जिंकली आहे. विरोध जरूर करावा त्यासाठी अनेक मुद्दे आहे. मात्र देशाचं मनोबल तोडणारा विरोध नको”, असे सांगत पंतप्रधान नरेंद्र मोदी यांनी विरोधकांवर जोरदार निशाणा साधला आहे.

काँग्रेस देशाला नेहमी निराश करते. भारताची लोकशाही स्वार्थी आणि आक्रमक नाही. भारतात विदेशातून विक्रमी गुंतवणूक होत आहे. गरिबीमुक्त भारतासाठी प्रयत्नशील आहे. सर्जिकल स्ट्राईक, एअर स्ट्राईक जगानं पाहिलं. अल्पभूधारक शेतकऱ्यांची संख्या वाढली असून त्यांना कर्जमाफी मिळत नाही’. निवडणुका आल्यावर कर्जमाफीचा मुद्दा येतो. कृषी मंत्र्यांनी केलेल्या प्रश्नाला कुणी उत्तर देत नाही. शेतकरी आंदोलनाच्या प्रश्नावर सर्वांचं मौन आहे, असं म्हणत पंतप्रधान नरेंद्र मोदींनी कायद्याच्या मूळ मुद्द्यांवर चर्चा करण्याची गरज असल्याचं म्हटलं आहे.

कृषिमंत्री सतत शेतकऱ्यांशी बोलत असतात. एकमेकांच्या बोलण्याला समजून घेण्याचा प्रयत्न सुरू आहे. आंदोलन करणार्‍यांना आम्ही विनंती करतो की आंदोलन करणे हा आपला हक्क आहे. पण वृद्ध लोक तिथे बसले आहेत, ते योग्य नाही. तुम्ही त्यांना घरी घेऊन जा. तुम्ही आंदोलन संपवावं, पुढे जाण्यासाठी आपण एकत्र चर्चा करू. मी सभागृहाच्या माध्यमातून तुम्हाला निमंत्रण देत आहे, असं पंतप्रधान नरेंद्र मोदी यांनी यावेळी म्हटलं.

The post कृषी कायद्याच्या मूळ मुद्द्यांवर चर्चा करण्याची गरज – पंतप्रधान नरेंद्र मोदी appeared first on थोडक्यात घडामोडी.

नवी दिल्ली : नव्या कृषी कायद्यांविरोधात आंदोलनादरम्यान आणखी एका शेतकऱ्यानं सुसाईड नोट लिहून आत्महत्या केली आहे. दिल्लीच्या टिकरी सीमेवर सुरू असलेल्या आंदोलनात सहभागी झालेल्या या शेतकऱ्यानं गळफास घेत आत्महत्या केली. आत्महत्या करणाऱ्या शेतकऱ्याचं नाव कर्मवीर सिंह असल्याचं समजतंय. त्यांचं वय ५० च्या आसपास असून ते जिंदच्या सिंहवाला गावचे रहिवासी होते.

मिळालेल्या माहितीनुसार, कर्मवीर सिंह गेल्या काही दिवसांपूर्वीच शेतकरी आंदोलनात सहभागी झाले होते. टिकरी सीमेवर शहराच्या बायपास रोडवरील एका नव्या बसस्टँडजवळ झाडाला गळफास घेत कर्मवीर यांनी आत्महत्या केली. रविवारी सकाळी कर्मवीर सिंह यांचा मृतदेह काही शेतकऱ्यांच्या नजरेस पडला. मृतदेहाजवळ एक सुसाईड नोट आढळली. सुसाईड नोटमध्ये ‘भारतीय किसान युनियन जिंदाबाद’ असं म्हटलं आहे. हे काळे कायदे कधी रद्द होतील, याचा अंदाज बांधता येऊ शकत नाही. हे काळे कायदे रद्द होणार नाहीत तोपर्यंत आम्ही इथून जाणार नाही, असंही त्यांनी पत्रात म्हटलं. सरकारकडून शेतकऱ्यांना दिल्या जाणाऱ्या वागणुकीमुळे कर्मवीर दरियाव सिंह हे गेल्या काही दिवसांपासून दुःखी होते, असं शेतकऱ्यांचं म्हणणं आहे.

शेतकऱ्यांनी या घटनेची सूचना पोलिसांना देताच पोलीस लगेचच घटनास्थळी उपस्थित झाले आणि त्यांनी मृतदेह ताब्यात घेतला. मृतदेह शवविच्छेदनासाठी रुग्णालयात पाठवण्यात आला आहे. तसंच या घटनेची माहिती मृत शेतकऱ्याच्या कुटुंबीयांनाही देण्यात आली आहे.

The post शेतकरी आंदोलन : आणखी एका शेतकऱ्याची सुसाईड नोट लिहून आत्महत्या appeared first on थोडक्यात घडामोडी.

मुंबई : केंद्र सरकारच्या नव्या कृषी कायद्यांविरोधात शेतकरी संघटनांनी आज ‘चक्का जाम’ आंदोलन पुकारलं आहे. महाविकास आघाडीतील तिन्ही पक्षांनी या ‘चक्काजाम’ला पाठिंबा दिला आहे. त्यावरून भाजपनं शिवसेनेवर जोरदार टीकास्त्र सोडलं आहे. ‘काँग्रेस सोबत जाऊन शिवसेनेच्या बुद्धीचा “चक्काजाम” झालाय का? असा बोचरा सवाल शेलार यांनी केला आहे.

अमेरिकी पॉपस्टार रिहाना व पर्यावरणवादी ग्रेटा थनबर्ग यांनी भारतातील शेतकरी आंदोलनाबद्दल ट्वीट केलं होतं. त्यानंतर माजी क्रिकेटपटू सचिन तेंडुलकर याच्यासह भारतीय सेलिब्रिटींनी त्यांना उत्तर दिलं. त्यावरून शिवसेनेनं भारतातील सेलिब्रिटींच्या भूमिकेवर प्रश्नचिन्ह उपस्थित केलं. रिहाना, थनबर्गच्या ट्वीटला उत्तर देणाऱ्या सेलिब्रिटींना भाजपनं लक्झरी गाडीत बसवून गाझीपूर, सिंघू बॉर्डरला नेलं पाहिजे, असं खासदार संजय राऊत यांनी म्हटलं होतं. शेलार यांनी याच मुद्द्यावरून शिवसेनेला लक्ष्य केलं आहे.

आशिष शेलार यांनी ट्विट करत म्हटलं कि, ‘देशांतर्गत विषयात उगाच ढवळाढवळ करणाऱ्या रिहाना, ग्रेटा थॅनबर्ग, मिया खलिफा या परदेशींच्या तालावर काँग्रेस-शिवसेना ‘पॉप डान्स’ करतेय. या परदेशींना सचिन तेंडुलकर, लतादीदींनी खडसावले, अण्णा हजारेंनी लोकशाहीचा सन्मान केला तर त्यांच्या विरोधात हेच धिंगाणा घालतात. ‘वंदनीय शिवसेनाप्रमुख बाळासाहेब ठाकरे यांनी ज्यांचा सन्मान केला त्या भारतरत्न, महाराष्ट्र भूषण व्यक्तींवर शिवसेना शिंतोडे उडवून महाराष्ट्र द्रोह का करतेय?, काँग्रेस सोबत जाऊन शिवसेनेच्या बुद्धीचा “चक्काजाम” झालाय? सत्तेसाठी महाराष्ट्र धर्मावर “ट्रॅक्टर” फिरवणार का?

देशांतर्गत विषयात उगाच ढवळाढवळ करणाऱ्या रिहाना, ग्रेटा थॅनबर्ग, मिया खलिफा या परदेशींच्या तालावर काँग्रेस-शिवसेनेने “पॉप डान्स” केला.

तर या परदेशींना सचिन तेंडुलकर, लतादीदींनी खडसावले, अण्णा हजारेंनी लोकशाहीचा सन्मान केला तर त्यांच्या विरोधात हेच धिंगाणा घालतात.
1/2

— Adv. Ashish Shelar – ॲड. आशिष शेलार (@ShelarAshish) February 6, 2021

वंदनीय शिवसेनाप्रमुख बाळासाहेब ठाकरे यांनी ज्यांचा प्रचंड सन्मान केला त्या भारतरत्न, महाराष्ट्र भूषण व्यक्तींवर शिवसेना शिंतोडे उडवून महाराष्ट्र द्रोह का करतेय?
काँग्रेस सोबत जाऊन शिवसेनेच्या बुद्धीचा “चक्काजाम” झालाय ?
सत्तेसाठी महाराष्ट्र धर्मावर “ट्रॅक्टर” फिरवणार का?
2/2

— Adv. Ashish Shelar – ॲड. आशिष शेलार (@ShelarAshish) February 6, 2021

The post काँग्रेस सोबत जाऊन शिवसेनेच्या बुद्धीचा “चक्काजाम” झालाय? , आशिष शेलार यांची टीका appeared first on थोडक्यात घडामोडी.

नवी दिल्ली : राष्ट्रीय आणि राज्य महामार्गांवर दुपारी १२ ते ३ या वेळेत चक्का जाम आंदोलन करणार असल्याचे शेतकऱ्यांनी जाहीर केले. दुपारी तीन वाजता शेतकरी त्यांच्या वाहनांचे हॉर्न एक मिनिटासाठी वाजवून शेतकरी एकतेचे प्रदर्शन करतील. दिल्ली एनसीआर, उत्तर प्रदेश आणि उत्तराखंड येथे आंदोलन करणार नसल्याचे शेतकऱ्यांनी सांगितले. मात्र खबरदारीचा उपाय म्हणून राजधानी दिल्लीसह देशभर ‘हाय अलर्ट’ देण्यात आला आहे. पोलीस यंत्रणा सतर्क आहे.

आंदोलनादरम्यान अँब्युलन्स, शाळांच्या बस तसेच अत्यावश्यक सेवेशी संबंधित वाहने अडवणार नाही, असे शेतकऱ्यांनी जाहीर केले. कोणत्याही प्रकारची हिंसा आणि नासधूस करणार नसल्याचेही शेतकऱ्यांनी जाहीर केले आहे.

शेतकऱ्यांशी मागील दोन महिन्यांत ११ वेळा चर्चा झाली आहे. अद्याप शेतकऱ्यांनी अथवा त्यांच्या कोणत्याही संघटनेने कृषी कायद्यांविषयीचा त्यांचा आक्षेप नेमकेपणा सांगितलेला नाही. काही दिवसांपूर्वी शेतकरी आंदोलनप्रश्नी सर्वोच्च न्यायालयात सुनावणी झाली. यावेळीही शेतकरी संघटना अथवा त्यांच्या वकिलाला आक्षेप नेमकेपणाने सांगता आले नाही. प्रश्न सोडवण्यासाठी केंद्र सरकार चर्चेला कायम तयार आहे. मात्र आंदोलन करणाऱ्यांनी कृषी कायद्यांविषयीचे त्यांचे आक्षेप सांगावे असे आवाहन केंद्र सरकारने केले. या आवाहनाला प्रतिसाद देण्याऐवजी शेतकरी संघटनांनी ‘चक्का जाम’ आंदोलन जाहीर केले आहे.

The post राष्ट्रीय आणि राज्य महामार्गांवर शेतकऱ्यांचे चक्का जाम आंदोलन, देशभर हाय अलर्ट appeared first on थोडक्यात घडामोडी.

नवी दिल्ली : २६ जानेवारी रोजी प्रजासत्ताक दिनी नवी दिल्लीत ट्रॅक्टर रॅली दरम्यान झालेल्या हिंसाचाराशी संबंधित याचिकांची सुनावणी आज पार पडली. रॅलीवेळी झालेल्या हिंसाचाराचा तपास न्यायालयाच्या देखरेखीखाली राष्ट्रीय तपास यंत्रणेने करावा, अशी मागणी एका याचिकेत करण्यात आली होती. त्यावर सर्वोच्च न्यायालयानं सुनावणी करताना या प्रकरणात दखल देण्यास नकार दिला आहे.

आंदोलक शेतकऱ्यांकडून काढण्यात आलेल्या ट्रॅक्टर रॅली दरम्यान झालेला हिंसाचार आणि तोडफोड प्रकरणाची न्यायालयीन चौकशी व्हावी, अशी मागणी जनहित याचिकेद्वारे करण्यात आली होती. परंतु, ‘आम्ही या प्रकरणात दखल देणार नाही, सरकारला योग्य ती कारवाई करू द्या. आम्हाला समजलं आहे की सरकार या प्रकरणाची चौकशी करत आहे. कायदा आपलं काम करेल हे पंतप्रधान नरेंद्र मोदींचं वक्तव्यही आम्ही पाहिलं आहे’, असं सर्वोच्च न्यायालयाच्या खंडपीठानं सुनावणी दरम्यान म्हटलं.
२६ जानेवारी रोजी शेतकऱ्यांच्या ट्रॅक्टर रॅली दरम्यान झालेल्या हिंसाचारानंतर सर्वोच्च न्यायालयात काही याचिका दाखल करण्यात आल्या आहेत. हिंसाचारासाठी आणि तिरंग्याचा कथित अपमान केल्याबद्दल जबाबदार असलेल्या व्यक्तींवर गुन्हा दाखल करून योग्य ती कारवाई करण्यात यावी, असं या याचिकेत म्हटलं होतं. आज सर्वोच्च न्यायालयानं या प्रकरणात न्यायालयीन चौकशीला नकार दिला आहे.

The post ब्रेकिंग : लाल किल्ला हिंसाचार प्रकरणात न्यायालयीन चौकशीला सर्वोच्च न्यायालयानं दिला नकार appeared first on थोडक्यात घडामोडी.