पुणे : 3 जानेवारी 2022 पासून देशभरात 15 ते 18 वयोगटातील मुलांना कोरोनाची लस दिली जात आहे. राज्य सरकारांनी बालकांच्या लसीकरणासाठी स्वतंत्र व्यवस्था केली आहे. मिळालेल्या माहितीनुसार, पहिल्याच दिवशी 30 लाख मुलांना कोरोनाची लस देण्यात आली, तर आतापर्यंत एक कोटीहून अधिक मुलांना कोरोनाची लस देण्यात आली आहे.

लहान मुलांमध्ये लसीकरणाबाबत प्रचंड उत्साह असून ते लस घेत आहेत. दरम्यान, पालकांनीही आपल्या मुलांची काळजी घेणे आवश्यक आहे. कारण जसे लसीकरणाचे काही संभाव्य साईड इफेक्ट 18 आणि 60 पेक्षा जास्त वयोगटातील लोकांमध्ये दिसून आले होते, तसेच ते मुलांमध्ये देखील दिसू शकतात, मात्र त्यामुळे घाबरून जाण्याची गरज नाही. हे सौम्य दुष्परिणाम दर्शवतात की लस घेतल्यानंतर तिने काम सुरु केले आहे.

लसीच्या जागेवर लालसरपणा आणि वेदना
ज्या हातामध्ये लस घेतली आहे, लहान मुलांना त्या ठिकाणी वेदना जाणवू शकतात. सेंटर्स फॉर डिसीज कंट्रोल अँड प्रिव्हेन्शन (CDC) नुसार, लसीकरणाचा लालसरपणा आणि वेदना कमी करण्यासाठी लसीच्या जागेवर थंड, मऊ कापड ठेवण्याचा सल्ला दिला जातो.

हलका ताप
आरोग्य तज्ज्ञ आणि डॉक्टरांच्या म्हणण्यानुसार, लसीकरणानंतर लहान मुलांना हलका तापही दिसून येतो. 18 आणि 60 वर्षांपेक्षा जास्त वयाच्या लोकांना हलका ताप आल्यास गोळी घेण्याचा सल्ला देण्यात आला होता, परंतु जर तुमच्या मुलाला ताप आला असेल, तर त्यासाठी डॉक्टरांच्या सल्ल्याने तुम्ही त्यांनी लिहून दिलेले औषध घेऊ शकता.

थकवा आणि अंगदुखी
लस दिल्यानंतर मुलांना थकवा आणि अंगदुखीचा त्रास होऊ शकतो. जर तुम्हाला मुलांमध्ये अशी लक्षणे दिसली तर घाबरून जाऊ नका, त्यांना आराम करू द्या आणि भरपूर पाणी आणि इतर काही द्रव पदार्थ द्या. यात पॅकिंगचे द्रव सेवन करू नका.

मूर्च्छा येणे
हा लस घेतल्याचा दुष्परिणाम नाही. किशोरवयीन मुलांमध्ये कोणत्याही लसीनंतर मूर्च्छा येणे सामान्य आहे. लसीकरणानंतर काही मुलांना चक्कर येऊ शकते, परंतु घाबरण्याची गरज नाही. मुले रिकाम्या पोटी लस घेतात तेव्हा असे होते. त्यामुळे मुलांनी लस घेण्यासाठी रिकाम्या पोटी जाऊ नये याकडे पालकांनी लक्ष द्यावे.

रोग नियंत्रण आणि प्रतिबंध केंद्रांनुसार, लसीकरणानंतर सुमारे 15 मिनिटे बसणे किंवा झोपणे यामुळे मूर्च्छा टाळण्यास मदत होते. या कारणास्तव, लसीकरणानंतर, लसीकरण केंद्राचे डॉक्टर काही काळ लसीकरण केलेल्या लोकांना त्यांच्या देखरेखीखाली ठेवतात. या व्यतिरिक्त इतर कोणतीही लक्षणे आढळल्यास, जर तुम्हाला ती लक्षणे सौम्य वाटत नसतील, तर डॉक्टरांशी संपर्क साधा.

The post कोरोनाची लस घेतल्यानंतर मुलांमध्ये दिसू शकतात ‘हे’ साईड इफेक्ट appeared first on थोडक्यात घडामोडी.

ब्राझीलमध्ये चुकून दोन नवजात बालकांना कोरोनाची लस दिल्याची घटना समोर आली आहे. या दोन्ही बालकांची प्रकृती खालावल्याने त्यांना रुग्णालयात दाखल करण्यात आले आहे.

2 महिन्यांची मुलगी आणि 4 महिन्यांच्या मुलाला डिप्थीरिया, टिटॅनस, डांग्या खोकला आणि हिपॅटायटीस बी विरुद्ध लसीकरण करण्यासाठी आणले असता त्यांना Pfizer लस देण्यात आली. या मुलांना कोरोनाची लस देणाऱ्या नर्सला निलंबित करण्यात आले आहे. तसेच या प्रकरणाच्या चौकशीचे आदेश दिले आहेत.

The post 2 आणि 4 महिन्यांच्या बाळाला चुकून दिली कोरोनाची लस, दोन्ही बालकांची प्रकृती खालावल्याने रुग्णालयात दाखल appeared first on थोडक्यात घडामोडी.

मुंबई : राज्यातील सर्व पात्र नागरिकांना येत्या ३० नोव्हेंबरपर्यंत कोविड प्रतिबंधात्मक लशीची पहिली मात्रा देण्याचे उद्दिष्ट ठेवले आहे, अशी माहिती सार्वजनिक आरोग्य मंत्री राजेश टोपे यांनी दिली. केंद्रीय आरोग्यमंत्री मनसुख मांडविया यांनी आज सर्व राज्यांचा कोविड प्रतिबंधात्मक लसीकरणाचा आढावा घेतला. या बैठकीत टोपे मंत्रालयातून दूरदृश्यप्रणालीव्दारे सहभागी झाले. त्यावेळी त्यांनी ही माहिती दिली.

टोपे यांनी सांगितले की, राज्यातील जास्तीत जास्त नागरिकांचे लसीकरण करण्यासाठी राज्य शासनाच्या वतीने व्यापक प्रयत्न केले जात आहेत. लसीकरणाची गती वाढावी यासाठी मिशन कवच कुंडल, मिशन युवा स्वास्थ्य सारखे अभियान राबविण्यात आले. याचा लसीकरणाचा वेग वाढविण्यासाठी फायदा झाला. आता लसीकरणाची शिबीर आणि वेळही वाढवली जात आहे. लसीकरणाच्या मोहिमेत आरोग्य, महसूल, नगरविकास, शिक्षण अशा विविध विभागाचे अधिकारी कर्मचारी एकत्रित काम करीत आहेत.

लसीकरणाबाबत नागरिकांच्या मनात असलेल्या शंका दूर करण्यासाठी जनजागृती केली जात आहे. यासाठी ओपिनियन लीडर्स, धर्मगुरु यांच्या माध्यमातून प्रयत्न केले जात आहेत, असेही त्यांनी सांगितले.

कोविड प्रतिबंधात्मक कोवॅक्सीन लशीच्या दोन मात्रांमध्ये २८ दिवसांचे अंतर निश्चित करण्यात आले आहे. त्याचप्रमाणे कोविशिल्ड लशीच्या दोन मात्रांमध्ये ८४ दिवसांचे अंतर निश्चित करण्यात आले आहे. कोविशिल्ड लशीच्या दोन मात्रा मधील अंतर कमी केले तर लसीकरणाच्या वेगाला गती देता येईल. याबाबत विचार केला जावा अशी विनंती टोपे यांनी केंद्रीय आरोग्यमंत्री मांडविया यांना केली.

मुंबईमध्ये लोकल ट्रेन मध्ये प्रवास करायचा असेल तर लशींच्या दोन्ही मात्रा घेणे अनिवार्य करण्यात आले आहे, अशी माहिती आरोग्य मंत्री राजेश टोपे यांनी दिली. यावर ही अतिशय चांगली कल्पना आहे, असे मांडविया यांनी सांगितले. या आढावा बैठकीत केंद्रीय आरोग्य राज्यमंत्री डॉ. भारती पवार, विविध राज्यांचे आरोग्य मंत्री, आरोग्य विभागाचे सचिव, लसीकरण अधिकारी सहभागी झाले होते. यावेळी अपर मुख्य सचिव डॉ प्रदीप व्यास उपस्थित होते.

The post 30 नोव्हेंबरपर्यंत राज्यातील सर्व नागरिकांना कोरोना लशीचा पहिला डोस देण्याचे उद्दिष्ट appeared first on थोडक्यात घडामोडी.

नवी दिल्ली : Covaxin कोरोना लसीसंबंधित मोठी बातमी आली आहे. आता 2 ते 18 वयापर्यंतच्या मुलांना कोवॅक्सिन या लसीने लसीकरण करता येणार आहे. DCGI कडून त्यासाठी मान्यता देण्यात आली आहे. भारत बायोटेक आणि ICMR ने मिळून कोवॅक्सिन लस बनवली आहे. कोवॅक्सिन ही भारतीय कोरोना लस आहे. क्लिनिकल चाचण्यांमध्ये कोवॅक्सिन लस कोरोना विषाणूविरूद्ध सुमारे 78 टक्के प्रभावी असल्याचे सिद्ध झालेले आहे.

मिळालेल्या माहितीनुसार, केंद्र सरकारकडून यासंदर्भात लवकरच गाईडलाईन्स जारी केल्या जातील. मुलांना प्रौढांप्रमाणे कोवॅक्सिनच्या दोन लस दिल्या जातील. आतापर्यंत करण्यात आलेल्या चाचण्यांमध्ये, या लसीमुळे मुलांना कोणतेही नुकसान झालेले नाही.

भारत बायोटेकने सप्टेंबरमध्ये मुलांवर लसीच्या चाचण्या पूर्ण केल्या आणि डेटा सादर केला होता. मूल्यांकनानंतर DCGI ने कंपनीकडून अतिरिक्त डेटा मागितला होता. तो शनिवारी सादर करण्यात आला होता. कालही विषय तज्ज्ञ समितीची (Subject Expert Committee) यासंदर्भात बैठक झाली. त्यानंतर आजच्या बैठकीत 2 ते 18 वयोगटातील मुलांना ही लस देण्याची मान्यता देण्यात आल्याची माहिती मिळाली आहे.

The post मोठी बातमी! आता 2 ते 18 वयोगटातील मुलांना मिळणार लस, DGCI ने दिली कोवॅक्सिन लसीला मान्यता appeared first on थोडक्यात घडामोडी.

नवी दिल्ली : देशात कोविडविरुद्धच्या लढाईला आणखी बळ मिळणार आहे. जॉनसन अँड जॉनसनच्या सिंगल डोस लसीला भारतात मंजूरी मिळाली आहे. केंद्रीय आरोग्यमंत्री मनसुख मांडवीय यांनी ट्वीट करत ही माहिती दिली आहे.

मांडवीय यांनी ट्वीट करत म्हटलं आहे की, भारताने आपली लस बास्केट वाढवली आहे. जॉन्सन अँड जॉन्सनच्या सिंगल-डोस कोविड -19 लसीला भारतात आणीबाणीच्या वापरासाठी मंजुरी देण्यात आली आहे. आता भारताकडे 5 EUA लस उपलब्ध आहे. यामुळे आपल्या देशात कोविडविरुद्धच्या लढाईला आणखी बळ मिळेल, असं आरोग्यमंत्र्यांनी म्हटलं आहे.

India expands its vaccine basket!

Johnson and Johnson’s single-dose COVID-19 vaccine is given approval for Emergency Use in India.

Now India has 5 EUA vaccines.

This will further boost our nation’s collective fight against #COVID19

— Mansukh Mandaviya (@mansukhmandviya) August 7, 2021

The post जॉनसन अँड जॉनसनच्या सिंगल डोस लसीला भारतात मिळाली मंजूरी appeared first on थोडक्यात घडामोडी.

नवी दिल्ली : कोरोनाचा प्राणघातक डेल्टा व्हॅरिएंट आतापर्यंत सुमारे 85 देशांमध्ये आढळून आला आहे. जागतिक आरोग्य संघटनेचे प्रमुख टेड्रोस अधानोम यांनी हा आतापर्यंतचा सर्वात जास्त संसर्गजन्य प्रकार असल्याचे सांगितले आहे. चिंतेची बाब म्हणजे डेल्टा व्हॅरिएंट लसीकरण झालेल्यांना देखील वेगाने संक्रमित करत आहे. त्यामुळे WHO च्या प्रमुखांनी चिंता व्यक्त केली आहे.

जिनेव्हा येथे झालेल्या या पत्रकार परिषदेत टेड्रोस अधानोम म्हणाले की, ‘डेल्टा हा एक अत्यंत संसर्गजन्य प्रकार आहे ज्याने सुमारे 85 देशांना वेढले आहे. एवढेच नाही तर हा व्हॅरिएंट लस घेतलेल्या लोकांना देखील वेगाने संक्रमित करत आहे. डब्ल्यूएचओने इशारा दिला आहे की जेव्हा आपण कोरोनाचे निर्बंध शिथिल करतो, आणि सार्वजनिक आरोग्य आणि सामाजिक अंतर पाळणे या गोष्टीकडे लक्ष देणं कमी करतो, तेव्हा जगभरात कोरोना संसर्गाची प्रकरणे झपाट्याने वाढू लागतात. ते पुढे म्हणाले की संसर्गाची गती वाढल्यामुळे रुग्णालयात दाखल होण्याचे प्रकार वाढू लागतात. आरोग्य यंत्रणा आणि आरोग्य कर्मचाऱ्यांवर याचा ताण पडतो. या कारणांमुळे देशात कोरोनामुळे होणाऱ्या मृत्यूचे प्रमाण वाढते.

नवीन कोरोना व्हॅरिएंट तयार होण्याची शक्यता जास्त आहे आणि ते सतत नोंदवले जात आहेत. व्हायरसच्या बाबतीत हे होत असतं. ते स्वतःच विकसित होत राहतात. परंतु आपण यावर ब्रेक लावून व्हेरिएंट विकसित करण्याची प्रक्रिया थांबवू शकतो.

डेल्टा हा कोरोनाचा एक अतिशय धोकादायक प्रकार आहे आणि अल्फा प्रकारापेक्षा हा जास्त संसर्गजन्य आहे, जो युरोपसह जगातील बर्‍याच देशांमध्ये पसरला होता. त्याची प्रकरणे जगभरात झपाट्याने समोर येत आहेत.

डॉक्टरांच्या म्हणण्यानुसार, डेल्टा व्हॅरिएंटमुळे संक्रमित झालेल्या कोरोना रूग्णांमध्ये ऐकायला येणे कमी होणे, ओटीपोटाचा त्रास, रक्ताच्या गुठळ्या होणे, गॅंग्रिन या सारखी लक्षणे दिसून येत आहेत. आत्तापर्यंत ही लक्षणे कोरोना रूग्णांमध्ये सामान्यत: दिसली नव्हती.

The post लसीकरण झालेल्यांना देखील संक्रमित करतोय डेल्टा व्हॅरिएंट, WHO ने दिली ‘ही’ चेतावणी appeared first on थोडक्यात घडामोडी.

नवी दिल्ली : उद्यापासून 18 वर्षांवरील सर्व नागरिकांना मोफत लस मिळणार आहे. पंतप्रधान नरेंद्र मोदी यांनी 7 जून रोजी ही घोषणा केली होती. आता तुम्हाला शासकीय लसीकरण केंद्रावर मोफत लस मिळणार आहे. यासह आरोग्य मंत्रालयानेही लसीकरणासाठी नवीन मार्गदर्शक सूचना जारी केल्या असून त्या उद्यापासून लागू होणार आहेत.

राज्यांना आता कशाप्रकारे लस मिळेल?
राज्यांना त्यांची लोकसंख्या, कोरोना रुग्णांची संख्या आणि लसीकरणाच्या गतीच्या आधारे यापुढे केंद्र लस पुरवेल. तसेच केंद्र सरकारने राज्यांना इशारा दिला आहे की लस वाया गेली तर पुरवठा कमी केला जाऊ शकतो. म्हणजेच, जास्त लसीचे डोस मिळविण्यासाठी राज्यांना किमान अपव्यय करत अधिक वेगाने लसीकरण करावे लागेल.

18 वर्षांवरील प्रत्येकाला लस विनामूल्य मिळेल का?
होय. उद्यापासून शासकीय लसीकरण केंद्रावर लस घेतल्यास आपल्याला मोफत लस मिळणार आहे. तथापि, आपल्याला खाजगी रुग्णालयांमध्ये लसीसाठी पैसे द्यावे लागतील.

खासगी रुग्णालयांमध्ये लसीची किंमत किती असेल?
खासगी रुग्णालयांमध्ये वेगवेगळ्या लसींचे वेगवेगळे दर असतील. आरोग्य मंत्रालयाच्या म्हणण्यानुसार, कोव्हीशील्ड लस खासगी रुग्णालयात 780 रुपयांमध्ये उपलब्ध असेल. सध्या देशात दिल्या जाणाऱ्या लसींमध्ये ही सर्वात कमी किंमत आहे. या व्यतिरिक्त तुम्हाला कोवॅक्सीनसाठी 1410 रुपये आणि स्पुतनिक-व्हीसाठी 1145 रुपये द्यावे लागतील. लसच्या एका डोसची ही किंमत आहे. तसेच खासगी रुग्णालये तुमच्याकडून सेवा शुल्क म्हणून 150 रुपये आकारू शकतात.

आताही एखाद्या प्रवर्गाला प्राधान्याच्या आधारे लस दिली जाणार आहे का?
केंद्र सरकारने 18 वर्षापेक्षा जास्त वयाच्या लोकांमध्ये लसीची प्राथमिकता ठरविण्याची जबाबदारी राज्यांकडे सोपविली आहे. परंतु काहीजणांसाठी केंद्राने प्राधान्य निश्चित केले आहे. जसे की आरोग्य कर्मचाऱ्यांना प्रथम प्राधान्य देण्यात आले आहे. यानंतर, 45 वर्षांपेक्षा जास्त वयाच्या लोकांना आणि त्यानंतर ज्या लोकांना दुसरा डोस द्यायचा आहे, त्यांना प्राधान्य दिले जाईल. यानंतर 18 वर्षांवरील लोकांना लस मिळेल.

लस घेण्यासाठी अपॉईनमेंट कशी घ्यायची?
शासनाने गाईडलाईन्समध्ये म्हटले आहे की प्रत्येक लसीकरण केंद्रावर ऑन स्पॉट नोंदणी करता येऊ शकते. म्हणजेच, कोविन पोर्टलवर नोंदणी न करता लसीकरणासाठी गेल्यास लसीकरण केंद्रावरच तुमची नोंदणी होईल.

नवीन मार्गदर्शक तत्त्वांमध्ये इतर कोणत्या गोष्टी समाविष्ट केल्या आहेत?
राज्यांना लसीचे किती डोस मिळणार आहेत, हे केंद्र सरकार आधीच सांगेल. त्यानुसार राज्ये त्यांची तयारी करू शकणार आहेत. प्रत्येक जिल्हा आणि लसीकरण केंद्राला त्यांच्याकडे असलेल्या डोसची माहिती सार्वजनिक करावी लागेल, जेणेकरुन लोकांना कोणतीही अडचण येणार नाही.

सरकारने आर्थिक दुर्बल घटकांसाठी ई-व्हाउचर्सची व्यवस्था केली आहे. या व्हाउचरद्वारे खासगी रुग्णालयात गरीबांना मोफत लस दिली जाईल. ते व्हाउचर नॉन ट्रान्सफरेबल असतील. म्हणजेच, व्हाउचर ज्या व्यक्तीच्या नावाने जारी केले जाईल, त्या व्यक्तीलाच त्याचा वापर करता येईल.

ग्रामीण भागातील लसीकरणाला गती देण्यासाठी सरकार लहान शहरे व दुर्गम भागातील खाजगी रुग्णालयांमध्ये लसीचा पुरवठा वाढविण्यात मदत करेल. अशा रुग्णालयांकडून होणाऱ्या लसीच्या मागणीची माहिती राज्यांकडून घेतली जाईल.
सरकारने लोककल्याणाच्या भावनेला चालना देण्यासाठी आवाहन केले आहे की जे आर्थिकदृष्ट्या सक्षम आहेत, त्यांनी खासगी रुग्णालयात पैसे देऊन लस घ्यावी.

The post उद्यापासून 18 वर्षांवरील सर्वांना मोफत लस, नवे नियम आणि आपल्या मनातील प्रश्नांची उत्तरे जाणून घ्या… appeared first on थोडक्यात घडामोडी.

नवी दिल्ली : भारतात कोरोना लसीमुळे 68 वर्षीय व्यक्तीच्या मृत्यूची पुष्टी झाली आहे. सरकारने गठीत केलेल्या समितीने या वृत्तास दुजोरा दिला आहे. वृत्तानुसार, एका 68 वर्षीय व्यक्तीला 8 मार्च रोजी कोरोना लसीचा डोस देण्यात आला होता, त्यानंतर त्याला अ‍ॅनाफिलेक्सिससारखे दुष्परिणाम दिसून आले. त्यानंतर या व्यक्तीचा मृत्यू झाला होता. ही एक प्रकारची ऍलर्जिक रिऍक्शन आहे.

लस घेतल्यानंतर गंभीर आजार होणे किंवा मृत्यू होणे, याला वैज्ञानिक भाषेत अ‍ॅडवर्स इव्हेंट फॉलोइंग इम्युनाइझेशन (AEFI) असे म्हणतात. अशा प्रकारची रिऍक्शन झाल्यास शरीरावर खूप वेगाने पुरळ येतात. केंद्र सरकारने AEFI साठी एक समिती गठीत केली आहे. या समितीने लसीकरणानंतर 31 मृत्यूंचे मूल्यांकन केल्यानंतर पहिल्या मृत्यूची पुष्टी केली आहे.

अहवालानुसार, AEFI समितीचे अध्यक्ष डॉ. एनके अरोरा यांच्या अध्यक्षतेखाली तयार करण्यात आलेल्या अहवालात सांगितले आहे की, लस घेतल्यानंतर आणखी दोन जणांना अ‍ॅनाफिलेक्सिसची समस्या झाली होती. त्यांचे वय सुमारे 20 वर्षे होते. मात्र, रुग्णालयात उपचार घेतल्यानंतर ते दोघेही पूर्णपणे बरे झाले. त्यांना 16 आणि 19 जानेवारी रोजी लस देण्यात आली होती. डॉ. अरोरा यांनी या संदर्भात आणखी काही बोलण्यास नकार दिला आहे.

The post भारतात कोरोना लसीमुळे पहिला मृत्यू, सरकारी समितीने दिला दुजोरा appeared first on थोडक्यात घडामोडी.

नवी दिल्ली : अमेरिकेच्या अध्यक्षांचे वैद्यकीय सल्लागार डॉ. अँथनी फाउची यांनी इशारा दिला आहे की कोरोना लशीच्या दोन डोसमधील अंतर वाढविल्याने कोरोनाची बाधा होण्याची शक्यता वाढू शकते. त्यामुळे त्यांनी दोन डोसमधील अंतर निश्चित असण्याची शिफारस केली आहे.

केंद्र सरकारने गेल्या महिन्यांत दोन डोसमधील अंतर ८४ दिवसांपर्यंत वाढविले आहे. यावर प्रतिक्रिया देताना फाउची म्हणाले कि, “मॉडर्नाच्या दोन डोसमधील अंतर चार आठवडे आणि फायझरच्या दोन डोसमधील अंतर तीन आठवडे आहे. दोन डोसमधील अंतर वाढविले तर तुम्ही कोरोनाच्या विषाणूला बळी पडण्याची शक्यता वाढते. ब्रिटनमध्ये हेच घडले. त्यांनी दोन डोसमधील अंतर वाढविले, त्या काळात कोरोनाच्या व्हेरियंटचा प्रादुर्भाव झाला. त्यामुळे आम्ही दोन डोसमधील अंतर निश्चित असण्याची शिफारस करतो.”

दरम्यान, कोरोनाची लागण होऊन गेलेल्या व्यक्तींना कोरोनाची लस देण्याबद्दल देखील वेगवेगळे दावे करण्यात येत आहेत, त्यावर बोलताना फाउची म्हणाले, की जरी कोरोनाची लागण होऊन गेली असली तरी लस घेणे आवश्यक आहे. यावेळी बोलताना त्यांनी लशीचा पुरवठा अल्प असल्याने दोन डोसमधील अंतर वाढविले असावे, अशी टिप्पणीही केली.

The post लशीच्या दोन डोसमधील अंतर वाढविल्याने संसर्ग होण्याची शक्यता वाढते – डॉ. अँथनी फाउची appeared first on थोडक्यात घडामोडी.

अमेरिका : अमेरिकेची कोरोना लस उत्पादक कंपनी फायझरने 12 वर्षापेक्षा कमी वयाच्या मुलांवर लसीची चाचणी सुरू केली आहे. पहिल्या टप्प्यात काही निरोगी मुलांना कोरोना लस दिली जाईल. चाचणीसाठी फायझरने जगातील चार देशांतील 4,500 हून अधिक मुलांना निवडले आहे. या चार प्रमुख देशांमध्ये अमेरिका, फिनलँड, पोलंड आणि स्पेनचा समावेश आहे.

फायझरने याबाबत माहिती देताना सांगितले की, “चाचणीच्या पहिल्या टप्प्यात १२ वर्षाखालील मुलांना लस दिली जाईल. जर सर्व काही ठीक झाले तर ही चाचणी पुढे सुरु राहील. कंपनीने पुढे म्हटले की लसीकरणाच्या चाचणीसाठी या आठवड्यात 5 ते 11 वर्षे वयोगटातील मुलांना निवडण्याचे काम सुरू केले जाईल. या मुलांना १० मायक्रोग्रामचे दोन डोस दिले जातील. हा डोस प्रौढ आणि वृद्धांना देण्यात येणाऱ्या डोसच्या एक तृतीयांश आहे. यानंतर काही आठवड्यात 6 महिन्यांपेक्षा जास्त वयाच्या मुलांवर लसीची चाचणी सुरू केली जाईल. त्यांना तीन मायक्रोग्राम लस दिली जाईल.

Today begins the Phase 2/3 part of our continuous study of the Pfizer – @BioNTech #COVID19 vaccine in healthy children. This is the next step allowing us to gather data to understand the safety and immunogenicity of the vaccine in this group aged 5–11 years.

— Pfizer Inc. (@pfizer) June 8, 2021

वृत्तानुसार, फायझरशिवाय मॉडर्ना देखील 12 ते 17 वर्षे वयोगटातील मुलांवर लसीची चाचणी घेत आहे. त्याचे निकालही लवकरच बाहेर येऊ शकतात. तसेच, जॉन्सन आणि जॉन्सनकडून अभ्यास केले जात आहेत. गेल्या महिन्यात, अ‍ॅस्ट्रॅजेनेकाने 6 ते 17 वर्षे वयोगटातील मुलांवर यूकेमध्ये अभ्यास सुरू केला. या सर्व कंपन्यांना लवकरच सकारात्मक निकाल मिळण्याची आशा आहे.

चीनने 3 ते 17 वर्षे वयोगटातील मुलांसाठी कोरोना लसीला दिली मान्यता

The post मोठी बातमी : फायझरने 12 वर्षाखालील मुलांवर सुरू केल्या कोरोना लसीच्या ट्रायल appeared first on थोडक्यात घडामोडी.