जम्मू काश्मीरमध्ये तीन दिवसांत तीन दहशतवादी हल्ले झाल्याची घटना घडली आहे. दहशतवाद्यांनी भाविकांच्या एका बसवर हल्ला केला. यामध्ये १० जणांचा मृत्यू झाला. ही घटना ताजी असतानाच दहशतवाद्यांनी जम्मू काश्मीरच्या डोडा जिल्ह्यातील लष्कराच्या तळावर (टीओबी) गोळीबार केला. यामध्ये काही जवान जखमी झाले आहेत. जम्मू काश्मीरमधील दहशतवादी हल्ल्याच्या घटनांवर बोलताना शिवसेना ठाकरे गटाचे खासदार संजय राऊत यांनी देशाचे गृहमंत्री अमित शाह यांच्यावर हल्लाबोल केला आहे. ‘अमित शाह दुसऱ्यांदा गृहमंत्री झाल्यानंतर जम्मू काश्मीरमध्ये हल्ले वाढले असून देशातील कायदा-सुव्यवस्थेला गृहमंत्र्यांपासून धोका आहे’, असा गंभीर आरोप संजय राऊत यांनी केला.

जम्मू काश्मीरमध्ये दहशतवाद्यांनी एका बसवर हल्ला केला, त्यामध्ये १० लोक ठार झाले. त्यानंतर सातत्याने जम्मू काश्मीरमध्ये हल्ले सुरु आहेत. आजही बातमी आली की, डोडा जिल्ह्यात लष्कराच्या तळावर हल्ला केला. आता एकीकडे ३७० कलम रद्द केल्याचा डंका अमित शाह वाजवत आहेत. मात्र, तेव्हापासून जम्मू काश्मीरमध्ये शांतता नांदलेली दिसत नाही. काश्मिरी पंडित त्यांच्या घरी जाऊ शकलेले नाहीत, हे गृहमंत्र्यांचं अपयश आहे. आता अमित शाह यांना पुन्हा एकदा गृहमंत्रीपद दिल्यानंतर जम्मू काश्मीरमध्ये आणि मणिपूरमध्ये हिंसाचार वाढला आहे”, असा आरोप संजय राऊत यांनी केला.

मणिपूरच्या माजी मुख्यमंत्र्यांच्या ताफ्यावर हल्ला झाला. आमचं म्हणणं आहे की, अमित शाह हे गृहमंत्रीपदाचा वापर हा कायदा आणि सुव्यवस्था अबाधित ठेवण्यासाठी करत नाहीत. ते आपल्या राजकीय विरोधकांचा काटा काढण्यासाठी याचा वापर करतात. ते विरोधकांना संपवू शकतात, पण दहशतवाद्यांना संपवू शकत नाहीत. भष्ट्राचाऱ्यांना आपल्या पक्षात घेतात, पण काश्मिरी पंडितांना त्यांच्या घरी पाठवू शकले नाही. नरेंद्र मोदींनी असे गृहमंत्री पुन्हा एकदा देशाच्या छातीवर बसवून या देशातील शहिदांचा अपमान केला आहे. कायदा सुव्यवस्थेला धोका कोणापासून असेल तर गृहमंत्री अमित शाह यांच्यापासून आहे. कारण ते कायदा आणि सुव्यवस्थेबाबत विचार न करता ते फक्त राजकीय विचार करतात. त्यामुळे जेव्हापासून अमित शाह गृहमंत्री झाले तेव्हापासून जम्मू-काश्मीर आणि मणिपूर अशांत आहे. यावरून नितीश कुमार आणि चंद्रबाबू नायडू यांनी गृहमंत्र्यांचा राजीनामा मागितला पाहिजे”, असा हल्लाबोल संजय राऊत यांनी केला.

The post देशातील कायदा-सुव्यवस्थेला गृहमंत्र्यांपासून धोका, संजय राऊतांचा अमित शाहांवर गंभीर आरोप appeared first on थोडक्यात घडामोडी.

मुंबई: आगामी काळात मिलिंद नार्वेकर यांच्याऐवजी रवी म्हात्रे हेच उद्धव ठाकरे यांचा ‘राईट हँड’ असतील, अशी चर्चा शिवसेनेच्या अंतर्गत वर्तुळात आहे. रवी म्हात्रे हे बाळासाहेब ठाकरे यांच्या काळापासून शिवसेनेत सक्रिय असल्याने शिवसैनिकांशी त्यांचा चांगल्याप्रकारे संपर्क आहे. रवी म्हात्रे बाळासाहेब ठाकरे यांच्या अत्यंत जवळचे होते. त्या काळात बाळासाहेबांकडून येणारे निरोप हे म्हात्रेंकडूनच यायचे. बाळासाहेब ठाकरे यांना फोन केला तर तो आधी रवी म्हात्रे घेत असत. आमदार, खासदार, शाखाप्रमुख आपल्या समस्या बाळासाहेब ठाकरे यांच्यासमोर मांडण्यासाठी रवी म्हात्रे यांच्याशी संपर्क साधायचे. याशिवाय, रवी म्हात्रे हेच बाळासाहेब ठाकरेंच्या सर्व कार्यक्रमांचे नियोजन करत असत. बाळासाहेब ठाकरे यांच्या निधनानंतर रवी म्हात्रे हे उद्धव ठाकरे यांच्यासाठीही काम करत होते. मात्र, शिंदे गटाच्या बंडानंतर आता उद्धव ठाकरे यांचे सहाय्यक म्हणून म्हात्रे प्रामुख्याने दिसत आहेत.

शिवसेना पक्षप्रमुख उद्धव ठाकरे यांच्याभोवती रवी म्हात्रे यांचा वावर होता. रवी म्हात्रे हे शिवसेनाप्रमुख बाळासाहेब ठाकरे यांच्या मर्जीतील व्यक्तींपैकी म्हणून एक ओळखले जातात. मध्यंतरीच्या काळापासून रवी म्हात्रे हे संघटनेत फारसे सक्रिय नव्हते. मात्र, एकनाथ शिंदे यांच्या बंडानंतर रवी म्हात्रे यांचा शिवसेना भवनातील वावर लक्षणीयरित्या वाढला होता. शिंदे गटातील आमदारांनी उद्धव ठाकरे यांची साथ सोडताना चौकडीचा उल्लेख केला होता. मिलिंद नार्वेकर या चौकडीतील प्रमुख सदस्य होते. मिलिंद नार्वेकर आम्हाला उद्धव ठाकरे यांच्यापर्यंत पोहोचू देत नाहीत, असे आरोप आजपर्यंत अनेकांनी केले आहेत. त्यामुळेच की काय शिंदे यांच्या बंडानंतर उद्धव ठाकरे यांच्या वर्तुळात महत्त्वाचे बदल होताना दिसत आहेत. उद्धव ठाकरे यांचे स्वीय सहाय्यक असणारे मिलिंद नार्वेकर यांची जागा आता रवी म्हात्रे यांनी घेतली आहे का, अशी चर्चा रंगू लागली आहे.

गोरेगाव येथे झालेल्या शिवसेना गटप्रमुखांच्या मेळाव्यातही उद्धव ठाकरे यांच्याभोवती हातात फाईल घेतलेले रवी म्हात्रे दिसून आले. त्यांचा शिवसेना भवनातील वावर अगोदरच वाढलेला आहे. त्यामुळे आता मिलिंद नार्वेकर यांची जागा रवी म्हात्रे यांनी घेतल्याचे बोलले जात आहे. उद्धव ठाकरे यांच्यापर्यंत पोहोचण्यासाठी आता रवी म्हात्रे हे महत्त्वाचा दुवा ठरत आहे.

The post उद्धव ठाकरेंचा स्वीय सहाय्यक बदलला? रवी म्हात्रे यांना संधी तर मिलिंद नार्वेकर आऊट? appeared first on थोडक्यात घडामोडी.

मुंबई : मुंबईच्या शिवाजी पार्कवरील प्रतिष्ठित दसरा मेळाव्यासाठी मुंबई नागरी संस्था बृहन्मुंबई महानगरपालिकेने (BMC) माजी मुख्यमंत्री उद्धव ठाकरे आणि मुख्यमंत्री एकनाथ शिंदे यांच्या गटांना परवानगी नाकारली आहे. शिवसेनेचा वार्षिक दसरा मेळावा हा महाराष्ट्रातील एक मोठा राजकीय मुद्दा बनला आहे. त्यादरम्यान ही बातमी मिळाली आहे.

शिवसेनेचे संस्थापक बाळासाहेब ठाकरे यांनी 19 जून 1966 रोजी पक्षाची स्थापना झाल्यानंतर काही महिन्यांनी शिवाजी पार्कवर वार्षिक दसरा मेळाव्याला संबोधित करण्याची परंपरा सुरू केली होती. पक्ष आणि मुख्यमंत्री एकनाथ शिंदे यांच्या बाहेर पडल्याने ‘खरी’ सेना कोणती, असा प्रश्न उपस्थित होत असताना हा मुद्दा मोठा झाला आहे. दरम्यान, शिवाजी पार्कसारख्या संवेदनशील परिसरात दोन्ही गटापैंकी एकाला परवानगी दिल्यास परिसरात कायदा आणि सुव्यवस्थेचा प्रश्न निर्माण होऊ शकतो, असे महापालिकेने म्हटले असल्याची माहिती मिळत आहे.

The post शिवाजी पार्कवर दसरा मेळाव्यासाठी कुणालाही परवानगी नाही, बीएमसीचा मोठा निर्णय appeared first on थोडक्यात घडामोडी.

पुणे : माजी मंत्री आणि आमदार उदय सामंत यांच्या गाडीवर पुण्याच्या कात्रजमध्ये हल्ला झाला आहे. ठाकरे समर्थक शिवसैनिकांनी हा हल्ला केल्याचा आरोप शिंदे गटाचे प्रतोद भरत गोगावले यांनी केला आहे.

उदय सामंत यांचा ताफा कात्रज चौकात पोहोचला. कात्रज मधील आदित्य ठाकरे यांची सभा संपल्यानंतर शिवसैनिक परतत असताना नेमक्या त्याचवेळी तानाजी सावंत यांच्या घराकडे निघालेल्या उदय सामंतांची गाडी तिथं पोहोचली. आक्रमक झालेल्या शिवसैनिकांनी उदय सामंतांच्या गाडीची मागची काच फोडल्याचा आरोप आहे. दुसरीकडे हा हल्ला आमच्या शिवसैनिकांनी केला नाही, असं आदित्य ठाकरे आणि विनायक राऊतांनी म्हटलं आहे.

उदय सामंत हडपसरकडून कात्रज कोंढवा रोडने कात्रज चौकात आले. त्याच वेळी आदित्य ठाकरेंचा ताफा त्याच चौकाकडे येत होता. त्यामुळे शिवसैनिकांची चौकात मोठी गर्दी झाली होती. यातील काही शिवसैनिकांनी उदय सामंतांच्या गाडीला घेराव घातला. गद्दार गद्दार अशा घोषणा देत उदय सामंत त्यांच्या गाडीला घेराव घातल्याने पोलिसांनी त्यांना सुरक्षा देण्याचा प्रयत्न केला.

The post पुण्यात उदय सामंत यांच्या गाडीवर हल्ला, गाडीच्या काचा फुटल्या appeared first on थोडक्यात घडामोडी.

मुंबई : निवडणूक आयोगाने महाराष्ट्राचे मुख्यमंत्री एकनाथ शिंदे आणि माजी मुख्यमंत्री उद्धव ठाकरे यांच्या गटाला नोटीस पाठवली आहे. दोन्ही नेत्यांना शिवसेनेवर अधिकार असल्याच्या दाव्याचे समर्थन करण्यासाठी पुरावे सादर करण्यास सांगितले आहे. निवडणूक आयोगाने दोन्ही गटांना बहुमत सिद्ध करण्यासाठी कागदपत्रे सादर करण्यास सांगितले आहे. निवडणूक आयोगाने दोन्ही गटांकडून ८ ऑगस्टपर्यंत उत्तर मागितले आहे.

शिंदे गटाचा दावा

एकनाथ शिंदे गटाने निवडणूक आयोगाला पत्र लिहून पक्षाचे धनुष्यबाण चिन्ह वाटपाची मागणी केली होती. निवडणूक आयोगाला लिहिलेल्या पत्रात शिंदे गटाने आपली खरी शिवसेना असल्याचा दावा केला असून लोकसभा अध्यक्ष ओम बिर्ला आणि महाराष्ट्र विधानसभा अध्यक्ष राहुल नार्वेकर यांनी दिलेल्या मान्यतेचा उल्लेख केला आहे.

The post शिवसेनेवर कोणाचा अधिकार? 8 ऑगस्टपर्यंत सिद्ध करा…निवडणूक आयोगाची सूचना appeared first on थोडक्यात घडामोडी.

मुंबई : भाजप नेते किरीट सोमय्या यांनी राज्यसभा निवडणुकीदरम्यान शिवसेनेच्या संजय राऊत यांच्या भ्रष्ट कारभाराविरोधात भारतीय निवडणूक आयोगाकडे तक्रार दाखल केली आहे. याबाबत किरीट सोमय्या यांनी माहिती दिली आहे. त्यांनी संजय राऊत यांच्याविरोधात चौकशी आणि कारवाई करण्याची निवडणूक आयोगाला विनंती केली आहे.

किरीट सोमय्या यांनी भारतीय निवडणूक आयोगाकडे तक्रार दाखल केली असून, नुकत्याच झालेल्या राज्यसभा 2022 च्या महाराष्ट्र निवडणुकीत त्यांनी अवलंबलेल्या भ्रष्ट पद्धतींचा तपास सुरू करण्याची आणि शिवसेना नेते संजय राऊत यांची निवडणूक रद्द करण्याची विनंती त्यांनी केली आहे.

Today I filed complaint with Election Commission of India against Corrupt Practices indulge by Sanjay Raut Shivsena during Rajyasabha Election.

Requested EC to initiate Investigation & Action against Sanjay Raut Shivsena @BJP4India @Dev_Fadnavis @ChDadaPatil @BJP4Maharashtra pic.twitter.com/dcPJ2Hgext

— Kirit Somaiya (@KiritSomaiya) June 13, 2022

महाराष्ट्रातील लढतीत भाजपचे तीन उमेदवार – पियुष गोयल, अनिल बोंडे आणि महाडिक – राज्यसभा निवडणुकीत विजयी झाले. सेना (राऊत), राष्ट्रवादी (प्रफुल्ल पटेल) आणि काँग्रेस (इमरान प्रतापगढ़ी) यांनी प्रत्येकी एक जागा जिंकली.

तीन राज्यसभेच्या जागांवर भारतीय जनता पक्षाचा विजय हा “घोडे खरेदीचा जनादेश” असल्याचे वर्णन करून शिवसेना नेते संजय राऊत यांनी शनिवारी निवडणूक आयोगावर (EC) भगव्या आघाडीची बाजू घेतल्याचा आरोप केला. शिवसेना आमदार सुहास कांदे आणि भाजपच्या दोन आमदारांनी हीच चूक केली असली तरी कांदे यांचे मतदान रद्द करण्यात आले तर विरोधी पक्षाचे मत कायम ठेवण्यात आले आहे, असे राऊत म्हणाले.

“दिल्लीत निवडणूक आयोगावर दबाव आणून आमचे (आमदार कांदे यांचे) एक मत अपात्र ठरविण्यात आले. त्यांची मते अवैध ठरवण्यासाठी आम्ही याचिका केली होती, परंतु निवडणूक आयोगाने त्यांची बाजू घेतली. महाराष्ट्र, हरियाणा आणि राजस्थानमध्ये जे काही घडले त्यावर आयोगाच्या कार्यप्रणालीवर प्रश्नचिन्ह निर्माण झाले आहे,” असे राऊत यांनी म्हटले. शिवसेनेचे दुसरे उमेदवार संजय पवार यांचा पराभव हा पक्षाला मोठा धक्का नसल्याचेही त्यांनी सांगितले होते.

संजय राऊत यांनी अर्धा डझन आमदारांची नावे उघड केली आणि त्यांनी आपला विश्वासघात केला आणि त्यांना दिलेल्या आश्वासनानुसार मते दिली नसल्याचं सांगितलं. बहुजन विकास आघाडीचे तीन आमदार, करमाळ्यातील अपक्ष आमदार संजयमामा शिंदे, स्वाभिमानी पक्षाचे आमदार देवेंद्र भुयार, शेकापचे आमदार श्यामसुंदर शिंदे यांनी आश्वासन देऊनही महाविकास आघाडीला मतदान केले नसल्याचा दावा त्यांनी केला होता.

The post संजय राऊतांविरोधात निवडणूक आयोगाकडे तक्रार दाखल, राज्यसभा निवडणुकीदरम्यान भ्रष्ट कारभाराचे आरोप appeared first on थोडक्यात घडामोडी.

मुंबई : शिवसेना नेते आणि राज्याचे परिवहन मंत्री अनिल परब यांना ईडीने नोटीस बजावली आहे. त्यांना 100 कोटींच्या कथित वसुली प्रकरणात समन्स बजावल्याची माहिती मिळाली आहे. ईडीने अनिल परब यांना मंगळवारी (३१ ऑगस्ट) सकाळी ११ वाजता ईडीच्या मुंबईच्या कार्यालयात हजर राहण्याचे आदेश दिले आहेत.

संजय राऊत यांनी याबाबत ट्वीट करत म्हटले कि केंद्र सरकारने सूडबुद्धीने ही कारवाई केली आहे. संजय राऊत यांनी ट्वीटमध्ये म्हटलं की, “शाब्बास! जन आशीर्वाद जत्रेची सांगता होताच अपेक्षे प्रमाणे अनिल परब यांना ईडीची नोटीस बजावण्यात आली. वरचे सरकार कामाला लागले. भुकंपाचा केंद्रबिंदू रत्नागिरीत होता. परब हे रत्नागिरीचे पालक मंत्री आहेत. Chronology कृपया समज लिजीये. कायदेशीर लढाई कायदयानेच लढू. जय महाराष्ट्र.”

शाब्बास!
जन आशीर्वाद जत्रेची सांगता होताच अपेक्षे प्रमाणे अनिल परब यांना ई.डी.ची नोटीस बजावण्यात आली . वरचे सरकार कामाला लागले. भुकंपाचा केंद्रबिंदू रत्नागिरीत होता. परब हे रत्नागिरीचे पालक मंत्री आहेत.
chronology कृपया समज लिजीये.
कायदेशीर लढाई कायदयानेच लढू..जय महाराष्ट्र

— Sanjay Raut (@rautsanjay61) August 29, 2021

The post अनिल परब यांना ईडीची नोटीस, भुकंपाचा केंद्रबिंदू रत्नागिरीत असल्याची संजय राऊत यांची प्रतिक्रिया appeared first on थोडक्यात घडामोडी.

मुंबई : शिवसेना नेते संजय राऊत यांना मुंबई उच्च न्यायालयाकडून मोठा दिलासा मिळाला आहे. राऊत यांच्याविरोधात एका महिलेने गंभीर आरोप करत याचिका दाखल केलेली होती. ही याचिका उच्च न्यायालयाने फेटाळून लावली आहे. राऊत यांनी अज्ञात व्यक्तिच्या माध्यमातून छळ केल्याचा आरोप सदर याचिकेत करण्यात आला होता. मात्र, न्यायालयाने ही याचिका फेटाळून लावल्याने राऊत यांना मोठा दिलासा मिळाला आहे.

काय आहे प्रकरण?
एका महिलेने संजय राऊत यांच्यावर गंभीर आरोप केले होते. एका व्यक्तिच्या माध्यमातून राऊत यांनी आपला छळ केल्याचं या महिलेने म्हटलं होतं. संजय राऊत यांनी आपल्यावर पाळत ठेवण्यासाठी माणसं ठेवली होती. हेरगिरी, शिवीगाळ, धमक्या देणे आणि जीवे मारण्याचे प्रयत्न केले असे अनेक आरोप या महिलेने राऊत यांच्यावर केले होते. महिलेने याचिकेत म्हटले होते कि, “मी सन २०१३ मध्ये माझ्या रेस्टॉरंटबाहेर दुचाकीवरून आलेल्या दोघांनी माझ्यावर केलेल्या हल्ल्याविषयी माहिम पोलिस ठाण्यात आणि २०१८ मध्ये माझ्या कारवर झालेल्या हल्ल्याबाबत वाकोला पोलिस ठाण्यात एफआयआर नोंदवला होता. मात्र, पोलिसांनी याबाबत पुढे कोणतीही कारवाई केली नाही. त्यांनी संजय राऊत यांचा साधा जबाबही नोंदवला नाही. मागील सात वर्षांपासून सुरू असलेल्या या छळवणुकीविषयी गेल्या वर्षी मी मुख्यमंत्री उद्धव ठाकरे व पंतप्रधान नरेंद्र मोदी यांना पत्र लिहून दाद मागितली. तरीही काही उपयोग झाला नाही. त्यामुळे मी राष्ट्रीय महिला आयोगाकडे धाव घेतली. आयोगाने एफआयआर नोंदवून कारवाई करण्याचे आदेश दिले. मात्र, बीकेसी-परिमंडळ ८च्या पोलिस उपायुक्तांनी त्याची दखल घेतली नाही. म्हणून नाईलाजास्तव उच्च न्यायालयात दाद मागावी लागत आहे.” परंतु, आता न्यायालयाने ही याचिका फेटाळून लावली आहे.

The post संजय राऊत यांच्याविरोधातील ‘ती’ याचिका उच्च न्यायालयाने फेटाळली, महिलेने केले होते गंभीर आरोप appeared first on थोडक्यात घडामोडी.

मुंबई : जलसंपदा विभागाच्या कामांची फाइल वित्त विभागाकडे पाठवण्यावरून जलसंपदामंत्री जयंत पाटील यांनी मुख्य सचिव सीताराम कुंटे यांना धारेवर धरले. असेच काम चालणार असेल तर जलसंपदा विभागच बंद करा, असे उद्गारही त्यांनी काढले. दरम्यान यानंतर महाविकास आघाडीत फूट पडल्याची चर्चा सुरु झाली आहे. मात्र, आज याबाबत शिवेसना खासदार संजय राऊत यांनी भाष्य केलं आहे. ते मुंबईत प्रसारमाध्यमांशी बोलत होते.

महाविकास आघाडीत फूट असल्याचा दावा फेटाळून लावत संजय राऊत म्हणाले कि, “कोणत्या मंत्र्याने काय सांगितलं मला माहिती नाही. जलसंपदा मंत्री जयंत पाटील हे प्रदेश राष्ट्रवादी काँग्रेसचे अध्यक्ष आहेत. ते राज्याचे ज्येष्ठ नेते असून महाविकासआघाडी मधले महत्त्वाचे मंत्री, अनुभवी नेते आहेत. कॅबिनेट मध्ये काय घडलं याबाबत बाहेर सांगू शकत नाही. चर्चा झाली असेल काही. बाहेर कितीही कोणीही अफवा पसरविल्या तरी महाविकास आघाडी सरकार हे स्थिर आहे, मजबूत आहे. कॅबिनेटमध्ये भांड्याला भांडे लागले असेल. पण आमची भांडी काचेची नाही ती फुटणार नाही किंवा त्याला तडा जाणार नाही.”

जयंत पाटील काय म्हणाले?

“राजकीय जीवनात काम करताना कुणावरही नाराजी धरायची नसते. तेवढ्यापुरता तो विषय असतो. एका विषयाची नाराजी दुसऱ्या विषयावर धरायची नसते. त्यामुळे कोणावर नाराजी हा प्रश्न उद्भवत नाही. तसेच मंत्रिमंडळातील चर्चा ही बाहेर सांगण्याची प्रथा नसते, त्यामुळे मंत्रिमंडळातील चर्चा बाहेर सांगण्याची आवश्यकता वाटत नाही,” असं सांगत जयंत पाटील यांनी सीताराम कुंटे यांच्या कामकाजावर नाराजी व्यक्त केल्याच्या प्रश्नावर बोलणं टाळलं.

The post महाविकास आघाडीत फूट पडल्याच्या चर्चेला उधाण, ‘त्या’ मुद्द्यावर संजय राऊत म्हणाले… appeared first on थोडक्यात घडामोडी.

मुंबई : परमबीर सिंह यांनी मुख्यमंत्र्यांना पाठवलेल्या ‘त्या’ पत्रानंतर सर्वत्र खळबळ उडाली आहे. त्यानंतर आज शिवसेना खासदार संजय राऊत यांनी प्रसारमाध्यमांशी बोलताना म्हटलं की महाविकास आघाडी सरकारमधील प्रत्येक घटकाने आत्मपरीक्षण करण्याची वेळ आली आहे. आता सरकारमधील मंत्र्यांनी आपले पाय जमिनीवर आहेत का, ते तपासून पाहायला हवे, असे वक्तव्य त्यांनी केले.

प्रसारमाध्यमांशी संवाद साधताना संजय राऊत यांनी अनेक मुद्द्यांवर भाष्य केलं. ते म्हणाले, “पोलीस खाते हे राज्याचा कणा असतो, स्वाभिमानाचे प्रतिक असते. हा कणा राज्यकर्त्यांनी मजबूत ठेवायचा असतो. सध्याची परिस्थिती पाहता काहीतरी दुरुस्त करावं लागेल. मुख्यमंत्री उद्धव ठाकरे यांनी कायम सरकारची प्रतिमा चांगली ठेवण्याचा प्रयत्न केला. मात्र, काही अधिकाऱ्यांच्या माध्यमातून गोष्टी घडल्या. या सगळ्यावर नियंत्रण ठेवणे गरजेचे होते. पण सत्तेपुढे शहाणपण चालत नाही. जगभरात सत्तास्थानी बसल्यावर अनेकांना आपण शहाणं असल्याचं वाटायला लागतं, हे या प्रकरणाच्या निमित्ताने दिसून आलं.”

संजय राऊत यांनी चिंता व्यक्त करत म्हटले की मी चहाला उधार नाही, पण या पत्राने सरकारवर शिंतोडे उडवले ही बाब मी मान्य करतो. हे सरकार स्थापन करण्यात खारीचा वाटा उचलणाऱ्या पण सरकारबाहेर असणाऱ्या माझ्यासारख्या हितचिंतकांसाठी ही धक्कादायक गोष्ट आहे. तसेच याबाबत शरद पवार योग्य भूमिका आणि निर्णय घेतील. मी आज दिल्लीत जाणार आहे. त्यावेळी शरद पवार यांच्याशी या विषयावर बोलण्याचा प्रयत्न करेन, असे राऊत यांनी सांगितले.

The post माझ्यासारख्या हितचिंतकांसाठी ‘ही’ धक्कादायक गोष्ट, मंत्र्यांनी आत्मपरीक्षण करण्याची वेळ- संजय राऊत appeared first on थोडक्यात घडामोडी.