नागपूर : संत मुक्ताई मंदिर तीर्थक्षेत्राचा सर्वांगीण विकास करण्यासाठी शासन कटिबद्ध आहे. शिखर समितीकडून मान्यता मिळताच उर्वरित कामे पूर्ण करण्यात येणार असल्याचे ग्रामविकास मंत्री जयकुमार गोरे यांनी सांगितले.

विधानपरिषद सदस्य एकनाथ खडसे यांनी उपस्थित केलेल्या प्रश्नांना उत्तर देताना ते बोलत होते.

जळगाव जिल्ह्यातील कोथळी येथील संत मुक्ताई मंदिर तिर्थक्षेत्राच्या विकासासाठी निधी उपलब्ध करून देण्याचा प्रस्ताव शिखर समितीकडे पाठविण्यात आला असल्याचे मंत्री गोरे यांनी दिले.

संत मुक्ताई मंदिर विकासासाठी सुरुवातीला 9.8 कोटी रुपयांचा प्रस्ताव सादर करण्यात आला होता. त्याला मान्यता मिळाल्यानंतर निधी वितरित करण्यात आला असून त्या कामांना सुरुवातही झाली आहे. कामास गती न मिळाल्याने खर्चात वाढ झाली असल्याचे मंत्री गोरे यांनी स्पष्ट केले.

मंत्री गोरे म्हणाले की, पूर्वी शासनाने 25 कोटींच्या आराखड्यालाच मान्यता दिली होती. परंतु आता बांधकाम विभागाने तयार केलेल्या नव्या विकास आराखड्याला शिखर समितीच्या मान्यतेनंतरच पुढील उर्वरित मंदिराचे काम होणार असल्याचे त्यांनी यावेळी सांगितले.

The post संत मुक्ताई मंदिर तीर्थक्षेत्र विकास आराखड्याला गती देण्यात येणार; निधी उपलब्धेकरीता प्रस्ताव शिखर समितीकडे – ग्रामविकास मंत्री जयकुमार गोरे appeared first on थोडक्यात घडामोडी.

जळगाव: एक धक्कादायक घटना समोर आली आहे. केंद्रीय मंत्री रक्षा खडसे यांच्या मुलीची छेडछाड केली गेली आहे. छेडछाड झाल्यानंतर रक्षा खडसे थेट पोलिस ठाण्यात पोहोचल्या आहेत. काही टवाळखोर मुलांनी तिच्या मनाविरोधात फोटो काढले. छेडछाड करणाऱ्या चार मुलांच्या विरोधात पोलिसांनी गुन्हा दाखल केला आहे. रक्षा खडसे यांच्या मुलीसोबतच इतर मुलींची देखील छेडछाड केली असल्याचे रक्षा खडसे यांनी म्हटले आहे. ज्यांनी छेडछाड केली, त्या मुलावर आधीच चार गुन्हे दाखल आहेत.

या घटनेबद्दल बोलताना एकनाथ खडसे म्हणाले, “मुक्ताईनगर येथील यात्रेतील हा प्रकार अत्यंत निंदनीय आहे. हे टवाळखोर नसून ते गुंड आहेत. त्यांच्या विरोधात आधीही काही गुन्हे दाखल आहेत. त्या मुली ज्यावेळी यात्रेत हजर होत्या, त्यावेळी पोलिस देखील तिथे हजर होते. पोलिसांनी त्या गुंडांना अडवण्याचा प्रयत्न केला, परंतु त्या गुंडांनी पोलिसांनाही मारहाण केली. पोलिसांना शिवीगाळ केली. पोलिसांनी या गुंडांवर 353 चा गुन्हा दाखल केला आहे. हा एक प्रश्न माझ्या घरामध्ये घडलेला नाही, हा एक सामाजिक प्रश्न आहे. महाराष्ट्रात अशा अनेक घटना घडत आहेत. अनेक घटनांची नोंद होत नाही, किंवा महिला त्या ठिकाणी तक्रार करण्यासाठी पुढे येत नाहीत. तक्रार न झाल्यामुळे अशा घटना उघडकीस येत नाहीत. या घटनेत रक्षा खडसे यांची मुलगी स्वतः तक्रार करण्यासाठी पुढे आली, हे फार मोठे आहे. अन्यथा, बहुतेक मुली तक्रार करण्यासाठी पुढे येत नाहीत,” अशी प्रतिक्रिया राष्ट्रवादीचे ज्येष्ठ नेते आमदार एकनाथ खडसे यांनी दिली.

मुक्ताईनगर मतदारसंघात गेल्या चार-पाच वर्षांत जी गुंडगिरी वाढली आहे, त्या बाबत मी अनेक वेळा विधान परिषदेत आवाज उठवला, परंतु याकडे लक्ष दिले गेले नाही, अशी प्रतिक्रिया एकनाथ खडसे यांनी दिली.

The post केंद्रीय मंत्री रक्षा खडसे यांच्या मुलीची छेडछाड, एकनाथ खडसे स्पष्टच बोलले appeared first on थोडक्यात घडामोडी.

मुंबई: राष्ट्रवादी काँग्रेसचे नेते एकनाथ खडसे यांना सक्तवसुली संचलनालयाकडून (ED) नोटीस पाठवण्यात आली आहे. त्यांच्या जप्त केलेल्या मालमत्तांचा ताबा तातडीने सोडण्याचे आदेश देण्यात आले आहेत. येत्या १० दिवसांमध्ये या सर्व मालमत्ता शांततेत रिकाम्या करा, असे ईडीकडून (ED) बजावण्यात आले आहे. ईडीचे उपसंचालक अमित भास्कर यांनी ही नोटीस जारी केली आहे. बेहिशेबी मालमत्ता प्रतिबंधक कायद्यातंर्गत २५ ऑगस्ट २०२१ रोजी एकनाथ खडसे व मंदाकिनी खडसे, गिरीश चौधरी, इन्सिया मुर्तझा बदलावाला आणि उकानी यांच्या वैयक्तिक तसेच संयुक्त मालकीच्या ११ स्थावर मालमत्ता तात्पुरत्या स्वरुपात जप्त करण्यात आल्या होत्या.

गेल्यावर्षी ऑगस्ट महिन्यात ईडीने एकनाथ खडसे यांच्या मालमत्तांवर जप्तीची कारवाई केली होती. या मालमत्तेचे एकूण मूल्य ५ कोटी ७५ लाख इतके आहे. यामध्ये लोणावळ्यातील बंगला, जळगावमधील ३ फ्लॅट आणि ३ मोकळ्या भूखंडांचा समावेश आहे. ही मालमत्ता १० दिवसांत खाली करावी, असे ईडीच्या नोटीसमध्ये म्हटले आहे. तसे न केल्यास कायदेशीररित्या या मालमत्ता रिकाम्या केल्या जातील, असा इशाराही ईडीने दिला आहे. तसेच संबंधित मालमत्ता विक्री किंवा हस्तांतरण करण्याची परवानगी देऊ नये, असेही नोंदणी महानिरीक्षक आणि संबंधित जिल्हाधिकाऱ्यांना कळवण्यात आले आहे. या मालमत्तांचे २५ मे २०२२ रोजी ॲडज्युडिकेशन झाल्यानंतर ३० मे रोजी या मालमत्ता रिकाम्या करण्याची नोटीस ईडीने जारी केली. या नोटिशीनुसार, या जागा रिकाम्या झाल्यानंतर कारवाईची पुढील दिशा निश्चित होईपर्यंत या मालमत्ता पूर्णपणे ईडीच्या ताब्यात राहतील.

The post ईडीकडून एकनाथ खडसे यांना नोटीस; मालमत्ता १० दिवसांत रिकाम्या करा, नाहीतर… appeared first on थोडक्यात घडामोडी.

जळगाव : राष्ट्रवादी काँग्रेसचे नेते एकनाथ खडसे यांची मालमत्ता जप्त करण्यात आली आहे. ईडीकडून एकनाथ खडसे यांची जळगाव आणि लोणावळा येथील 5 कोटी 73 लाख रुपयांची मालमत्ता जप्त करण्यात आली आहे. भोसरी एमआयडीसीतील जमीन खरेदी प्रकरणामुळे एकनाथ खडसे आणि त्यांच्या कुटुंबीयांची गेल्या काही दिवसांपासून चौकशी ईडीकडून सुरु आहे.

2016 मध्ये महसूलमंत्री असताना खडसे आणि त्यांचे जावई गिरीश चौधरी यांनी पुण्यातील भोसरी येथील एक भूखंड विकत घेतला होता. या भूखंडाचा बाजारभाव 31 कोटी रुपये असताना गिरीश यांनी तो अवघ्या तीन कोटी रुपयांना विकत घेतला. हा भूखंड MIDCच्या मालकीचा होता. त्यामुळे इतक्या कमी किंमतीत व्यवहार कसा काय झाला? तसंच गिरीश यांनी तो विकत घेण्यासाठी तीन कोटी रुपये कुठून आणले? या प्रश्नांच्या आधारे ईडीने तपास सुरु केला होता.

काही दिवसांपूर्वी खडसे यांच्या जावयाला ईडीकडून अटक करण्यात आली होती. त्यानंतर आता एकनाथ खडसेंवर ही मोठी कारवाई करण्यात आली आहे. आज एकनाथ खडसे यांची लोणावळा आणि जळगाव येथील 5 कोटी 73 लाख रुपयांची मालमत्ता ईडीकडून जप्त करण्यात आली आहे. एकनाथ खडसे यांच्यासाठी हा मोठा धक्का असल्याचं बोललं जात आहे.

The post एकनाथ खडसे यांची 5 कोटी 73 लाख रुपयांची मालमत्ता जप्त, ईडीची मोठी कारवाई appeared first on थोडक्यात घडामोडी.

मुंबई : राष्ट्रवादी काँग्रेसचे नेते एकनाथ खडसे यांचे जावई गिरीश चौधरी यांना जमीन घोटाळा आणि आर्थिक गैरव्यवहार प्रकरणी गेल्या आठवड्यात ईडीकडून अटक करण्यात आली होती. त्यांच्या कोठडीत वाढ करण्यात आली असून आता १५ जुलैपर्यंत त्यांना कोठडी सुनावण्यात आली आहे.

ईडीने न्यायालयाला सांगितलं की या प्रकरणाशी संबंधित असलेल्या आणखी काही लोकांचे जबाब नोंदवण्याचे काम सध्या सुरु आहे. तसेच चौधरी यांची आणखी चौकशी करणं आवश्यक आहे. त्यामुळे आता गुरुवार (१५ जुलै) पर्यंत त्यांच्या कोठडीत वाढ करण्यात आली आहे.

The post एकनाथ खडसे यांचे जावई गिरीश चौधरी यांच्या कोठडीत वाढ appeared first on थोडक्यात घडामोडी.

मुंबई : ED ने एकदा चौकशी केल्यानंतर पुन्हा समन्स बजावल्यानंतर राष्ट्रवादी काँग्रेसचे ज्येष्ठ नेते एकनाथ खडसे यांनी रिट याचिका करून ED च्या कार्यवाहीला आव्हान दिले. याविषयी मुंबई उच्च न्यायालयात न्या. संभाजी शिंदे व न्या. मनीष पितळे यांच्या खंडपीठासमोर मंगळवारी पुढील सुनावणी झाली. यावेळी पुण्यातील भोसरीमधील जमीन गैरव्यवहार प्रकरणात अचानक ED ने चौकशी सुरू केली. म्हणूनच ED कडून चौकशीच्या नावाखाली अटक होण्याची माझ्या मनात भीती आहे,’ असं खडसे यांच्यातर्फे सांगण्यात आला.

‘भोसरीमधील कथित जमीन गैरव्यवहार प्रकरणात २०१६ मध्ये एफआयआर दाखल करण्यात आली होती. पोलिसांनी याबाबत तपास पूर्ण करून २०१८ मध्ये या आरोपांत तथ्य नसल्याचे म्हणत क्लोजर रिपोर्ट न्यायालयात दाखल केला होता. तोपर्यंत इडीचा या प्रकरणात हस्तक्षेप नव्हता. मात्र, मी भाजप सोडून राष्ट्रवादी काँग्रेसमध्ये प्रवेश करण्याचे ठरवल्यानंतर अचानक या प्रकरणात ED चा प्रवेश झाला. म्हणूनच ED कडून चौकशीच्या नावाखाली अटक होण्याची भीती माझ्या मनात आहे, असं खडसेंकडून सांगण्यात आलं.

पीएमएलए कायद्यातील तरतुदींप्रमाणे चौकशीत सहकार्य न केल्यास अटक करण्याची तरतूद आहे. तसेच आर्थिक स्वरूपाचा गुन्हा असल्याने भारतीय दंड संहितेच्या कलम ४३८ अन्वये अटकपूर्व जामीन मिळवण्यातही अडसर आहे. इडीच्या समन्सविरोधात अपिल करण्याचाही पर्याय नाही. म्हणून याचिकेद्वारे संरक्षण मिळण्यासाठी विनंती केली आहे’, असा युक्तिवाद खडसे यांनी अॅड. आबाद पोंडा यांच्यामार्फत मांडला. वेळेअभावी खंडपीठाने पुढील सुनावणी सोमवारी (१५ मार्च) ठेवली.

The post …म्हणूनच ED कडून अटक होण्याची भीती माझ्या मनात आहे – एकनाथ खडसे appeared first on थोडक्यात घडामोडी.

जळगाव : राष्ट्रावादी काँग्रेसचे ज्येष्ठ नेते एकनाथ खडसे यांना पुन्हा एकदा कोरोनाची लागण झाली आहे. खडसेंना याआधी दोनवेळा कोरोनाची लागण झाल्याची माहिती समोर आली होती. त्यानंतर त्यांना आता पुन्हा कोरोनाची लागण झाली आहे. खडसे यांनी स्वत: ट्वीट करुन याबाबत माहिती दिली आहे. एकनाथ खडसे यांच्या सून खासदार रक्षा खडसे यांनादेखील कोरोनाची लागण झाल्याची माहिती मिळाली आहे.

एकनाथ खडसे यांनी ट्विट करतम्हटलं कि, “माझी कोरोना चाचणी केली असता ती पॉझिटिव्ह आली असून माझी तब्येत चांगली आहे, काळजीचे कारण नाही. गेल्या काही दिवसात माझ्या संपर्कात आलेल्यांनी आपली कोरोना चाचणी करून घ्यावी, अशी मी विनंती करतो.”

माझी कोरोना चाचणी केली असता ती पॉझिटिव्ह आली असून माझी तब्येत चांगली आहे, काळजीचे कारण नाही. गेल्या काही दिवसात माझ्या संपर्कात आलेल्यांनी आपली कोरोना चाचणी करून घ्यावी अशी मी विनंती करतो.

— Eknath Khadse (@EknathGKhadse) February 18, 2021

The post एकनाथ खडसेंना तिसऱ्यांदा कोरोनाची लागण appeared first on थोडक्यात घडामोडी.

जळगाव : जामनेर येथे जयंत पाटील यांच्या उपस्थितीत झालेल्या राष्ट्रवादीच्या कार्यक्रमात खडसे यांनी सीडी लावण्याचा इशारा दिला आहे. ‘तुम्ही माझ्यामागे ईडी लावली तर मी तुमची सीडी लावेन’, असे मागे मी गमतीने बोललो होतो. मात्र, खरोखरच त्यांनी माझ्या मागे ईडी लावली आहे. त्यामुळे आता मला सीडी लावावीच लागेल. सीडी लावण्याचे काम आता बाकी आहे’, अशा शब्दांत राष्ट्रवादी काँग्रेसचे नेते एकनाथ खडसे यांनी भाजपला इशारा दिला.

राज्याचे जलसंपदा मंत्री व राष्ट्रवादी काँग्रेसचे प्रदेशाध्यक्ष जयंत पाटील यांची राष्ट्रवादी परिवार संवाद यात्रा सुरू आहे. सध्या ते जळगाव जिल्ह्यात आहेत. या कार्यक्रमात बोलताना खडसे यांनी ईडी चौकशीवरून जोरदार निशाणा साधला. मी राष्ट्रवादी काँग्रेसमध्ये प्रवेश केला तेव्हा जयंत पाटील यांनी एक शक्यता वर्तवली होती, तुमच्यामागे आता ईडी लागू शकते, असं ते म्हणाले होते. त्यावर त्यांनी ईडी लावली तर मी त्यांची सीडी लावेन असे म्हणालो होते. आता माझी ईडी चौकशी सुरू करण्यात आल्यामुळे मी सीडी लावण्याचे काम करणार आहे, असे सांगत खडसे यांनी गौप्यस्फोटाचे संकेत दिले आहेत.

The post एकनाथ खडसे सीडी लावण्याच्या तयारीत.. गौप्यस्फोटाचे दिले संकेत appeared first on थोडक्यात घडामोडी.

राष्ट्रवादी कॉंग्रेसचे ज्येष्ठ नेते एकनाथ खडसे यांचा कोरोना चाचणीचा अहवाल पॉझिटिव्ह आला आहे. ते 14 दिवस घरात क्वारंटाइन राहणार आहेत. त्यामुळे ईडीला चौकशीसाठी आणखी काही दिवस वाट पाहावी लागणार आहे.

खडसे यांना भोसरी जमीन खरेदी प्रकरणी ईडीची नोटीस मिळाली आहे. चौकशीकरिता ईडी कार्यालयात हजर राहण्यासाठी खडसे मुंबइे येथे गेलेही होते. मात्र, त्यांना सर्दी, खोकला, ताप याचा त्रास जाणवू लागला होता. त्यामुळे त्यांनी कोरोनाची तपासणी करून घेतली होती. त्याचा अहवाल पॉझिटिव्ह आला आहे. याबाबत खडसे यांना ई मेलद्वारे अहवाल पाठविण्यात आला आहे. ते 14 दिवस घरीच विलगीकरण कक्षात राहणार आहेत.

खडसे यांनी या अगोदरच ईडी कार्यालयास आपल्याला कोरोनासदृश लक्षणे असल्याचे कळविले होते. ईडीने त्यांना 14 दिवसांनी चौकशीकरीता हजर राहण्यासाठी मुदत वाढवून दिली आहे.

The post एकनाथ खडसेंचा कोरोना अहवाल पॉझिटिव्ह, ईडी चौकशी लांबणीवर appeared first on थोडक्यात घडामोडी.

राष्ट्रवादीचे नेते एकनाथ खडसे यांना पुन्हा एकदा करोनाची बाधा झाली आहे का? असा प्रश्न त्यांनी केलेल्या ट्विट नंतर उपस्थित झाला आहे. एकनाथ खडसेंना ईडीची नोटीस आल्यानंतर त्यांनी आज आपण ईडी कार्यालयात हजर राहणार, असं सांगितलं होतं. पण आता आपण १४ दिवस विश्रांती घेऊन त्यानंतर ईडी कार्यालयात जाणार असल्याचं एकनाथ खडसे यांनी स्पष्ट केलं आहे.

आपल्याला सर्दी, खोकला आणि ताप आल्याने आपण कोरोनाची चाचणी केल्याचंही त्यांनी म्हटलं आहे. या चाचणीचा अहवाल अद्याप आलेला नाही. मात्र त्यांना १४ दिवस विश्रांती घेण्याचा सल्ला देण्यात आला आहे. त्यामुळे आपण ईडी कार्यालयात १४ दिवसांनी हजर राहू, असं खडसेंनी म्हटलं आहे.

आज ई. डी. कार्यालयात जाणार होतो, मात्र वैद्यकीय अधिकाऱ्यांच्या सल्ल्यानुसार १४ दिवसानंतर जाणार आहे.@NCPspeaks pic.twitter.com/wJJOVmjAJH

— Eknath Khadse (@EknathGKhadse) December 30, 2020

नोव्हेंबर महिन्यात एकनाथ खडसेंना कोरोनाची लागण झाली होती. त्यावेळी उपचारांसाठी मुंबईतल्या रुग्णालयात त्यांना दाखल करण्यात आलं होतं. त्यावेळीही त्यांनी ट्विट करुन कोरोना रिपोर्ट पॉझिटिव्ह आल्याची माहिती दिली होती.

The post एकनाथ खडसे यांना पुन्हा कोरोनाची लागण..? appeared first on थोडक्यात घडामोडी.