गुजरात : गुजरातच्या राजकारणात आज मोठ्या घडामोडी पाहायला मिळाल्या. मुख्यमंत्री भूपेंद्र पटेल यांच्या नेतृत्त्वाखालील सध्याच्या मंत्रिमंडळाने अचानक सर्व सदस्यांचे राजीनामे सादर केले. हे राजीनामे केंद्रीय नेतृत्वाच्या आदेशानंतर घेण्यात आले असल्याची माहिती आहे.

मुख्यमंत्र्यांच्या निवासस्थानी झालेल्या बैठकदरम्यान वरिष्ठ नेत्यांनी मंत्र्यांना हा निर्णय समजावून सांगितला. यानंतर सर्व मंत्र्यांनी आपापले राजीनामे मुख्यमंत्री भूपेंद्र पटेल यांच्याकडे सुपूर्द केले. सुरुवातीला अंदाज व्यक्त केला जात होता की, १२ मंत्री राजीनामा देतील, मात्र मुख्यमंत्री वगळता सर्व मंत्र्यांचे राजीनामे घेण्यात आले आहेत.

राज्यातील राजकीय विश्लेषकांच्या मते, या सर्व राजीनाम्यांचा उद्देश कॅबिनेट विस्तार करण्याशी संबंधित आहे. सूत्रांच्या माहितीनुसार, मुख्यमंत्री भूपेंद्र पटेल आज रात्री राज्यपालांची भेट घेऊन मंत्र्यांचे राजीनामे त्यांच्या हाती सुपूर्द करतील.

अद्याप भाजप किंवा मुख्यमंत्री कार्यालयाकडून अधिकृत घोषणा झालेली नाही. मात्र, राजकीय वर्तुळात सांगण्यात येत आहे की, नव्या मंत्रिमंडळाचा शपथविधी उद्या, शुक्रवारी सकाळी साडे ११ वाजता, गांधीनगर येथील महात्मा मंदिर येथे पार पडेल. या कार्यक्रमाला केंद्रीय मंत्री अमित शहा आणि भाजपचे राष्ट्रीय अध्यक्ष जे. पी. नड्डा उपस्थित राहणार आहेत.

विशेष म्हणजे, या शपथविधीनंतर मुख्यमंत्री भूपेंद्र पटेल नवीन मंत्रिमंडळाचा आकार निश्चित करतील आणि आगामी काळात गुजरातमध्ये राजकारणाची दिशा ठरवली जाईल. राजकीय वर्तुळात यासंदर्भात वेगवेगळ्या चर्चा रंगल्या आहेत, मात्र केंद्रीय नेतृत्वाच्या आदेशानुसार हा निर्णय घेण्यात आलेला आहे, असा अंदाज व्यक्त केला जात आहे.

गुजरातमध्ये सध्याच्या मंत्रिमंडळातील सर्व मंत्र्यांचे राजीनामे घेणे ही खूप मोठी आणि ऐतिहासिक घडामोड मानली जात आहे. आता पुढील काही दिवसात नव्या मंत्रिमंडळाच्या सदस्यांची नावे जाहीर होण्याची शक्यता आहे आणि आगामी कॅबिनेट विस्तारावर सर्वांचे लक्ष लागले आहे.

The post गुजरातच्या राजकारणात मोठी घडामोड, मुख्यमंत्री वगळता सर्व मंत्र्यांचे राजीनामे appeared first on थोडक्यात घडामोडी.

अहमदाबाद : अहमदाबाद विमानतळाजवळ एअर इंडियाचे प्रवासी विमान कोसळल्याची धक्कादायक घटना घडली आहे. प्राथमिक माहितीनुसार, या विमानात किमान २४२ प्रवासी होते. विमानाने अहमदाबादहून उड्डाण घेतल्यानंतर काही वेळातच मेघनीनगर परिसरात ते कोसळले. या घटनेने संपूर्ण परिसरात एकच खळबळ उडाली. एअर इंडियाच्या विमान अपघातात किमान ४० जणांचा मृत्यू झाल्याची माहिती मिळत आहे.

विमान धडकल्याने मोठा स्फोट व आगीचे लोळ उसळल्याचे पाहायला मिळाले. आगीमुळे परिसरात धुराचे लोट पसरले आणि वातावरणात घबराटीचे वातावरण निर्माण झाले. घटनेनंतर काही मिनिटांतच डझनभर रुग्णवाहिका आणि फायर ब्रिगेडच्या गाड्या घटनास्थळी दाखल झाल्या. जखमी प्रवाशांना वेगाने जवळच्या रुग्णालयात हलवण्यात आले. पोलिसांनी संपूर्ण परिसर सील केला असून वाहतुकीसाठी पर्यायी मार्ग तयार करण्यात आले आहेत.

नागरी विमान वाहतूक मंत्री राम मोहन नायडू यांनी या घटनेवर तीव्र दु:ख व्यक्त केले असून, “घटनेबद्दल ऐकून मी हादरलेलो आहे. सर्व विमान वाहतूक व आपत्कालीन सेवा संस्थांना जलद आणि समन्वित कारवाई करण्याचे निर्देश दिले आहेत. मी स्वतः परिस्थितीवर लक्ष ठेवून आहे,” असे त्यांनी स्पष्ट केले.

केंद्रीय गृहमंत्री अमित शहा यांनी देखील गुजरातचे मुख्यमंत्री भूपेंद्र पटेल यांच्याशी फोनवर संपर्क साधला आणि केंद्र सरकारकडून सर्वतोपरी मदतीचे आश्वासन दिले आहे.

ग्रीन कॉरिडॉर आणि वैद्यकीय मदत
मुख्यमंत्री भूपेंद्र पटेल यांनी सांगितले की, “जखमी प्रवाशांना तात्काळ उपचार मिळावेत यासाठी ग्रीन कॉरिडॉरची व्यवस्था करण्यात आली आहे. सर्व संबंधित रुग्णालयांना तत्काळ आणि सर्वोच्च प्राथमिकतेने वैद्यकीय मदत पुरवण्याच्या सूचना देण्यात आल्या आहेत.”

घटनेचे कारण अद्याप स्पष्ट झालेले नाही. नागरी विमान वाहतूक मंत्रालयाने तातडीने तपास समिती स्थापन केली असून, विमानाच्या ब्लॅक बॉक्सचा शोध घेण्याचे काम सुरू आहे. विमानात असलेल्या प्रवाशांच्या यादीची पडताळणी केली जात आहे.

प्रशासनाने नागरिकांना घटनास्थळाजवळ न जाण्याचे आणि अफवांवर विश्वास न ठेवण्याचे आवाहन केले आहे.

The post गुजरातमध्ये एअर इंडियाचे २४२ प्रवासी असलेले विमान कोसळले; आपत्कालीन यंत्रणा सक्रिय appeared first on थोडक्यात घडामोडी.

नवी दिल्ली : 22 एप्रिल रोजी जम्मू आणि काश्मीरमधील पहलगाम येथे झालेल्या दहशतवादी हल्ल्यानंतर केंद्र सरकारने ठोस आणि कठोर पावले उचलण्यास सुरुवात केली आहे. या भीषण हल्ल्यात 26 पर्यटकांचा मृत्यू झाला होता तर 17 जण जखमी झाले होते. या घटनेनंतर केंद्र सरकारने तातडीने ऍक्शन मोड घेत काही महत्वाचे निर्णय घेतले आहेत.

केंद्रीय गृह मंत्रालयाने पाकिस्तानशी संबंधित सर्व व्हिसा तत्काळ रद्द करण्याचे आदेश दिले आहेत. तसेच, गृहमंत्री अमित शहा यांनी सर्व राज्यांच्या मुख्यमंत्र्यांशी चर्चा करून त्यांच्या राज्यांमध्ये असलेल्या पाकिस्तानी नागरिकांना लवकरात लवकर देशाबाहेर काढण्याच्या सूचना दिल्या आहेत. वरिष्ठ अधिकाऱ्यांबरोबर झालेल्या उच्चस्तरीय बैठकीनंतर हा निर्णय घेण्यात आला.

याशिवाय, भारताने भारत-पाकिस्तानमधील सिंधू पाणी करार स्थगित करण्याचाही मोठा निर्णय घेतला आहे. पंतप्रधान नरेंद्र मोदी यांच्या अध्यक्षतेखाली झालेल्या सुरक्षाविषयक मंत्रिमंडळ समितीच्या बैठकीत हा निर्णय झाला. 1960 पासून लागू असलेला हा करार पाकिस्तानसाठी पाण्याचा मुख्य स्त्रोत मानला जातो. पाकिस्तानची 21 कोटींपेक्षा अधिक लोकसंख्या सिंधू आणि तिच्या उपनद्यांवर अवलंबून आहे.

अधिक कठोर पावले उचलताना केंद्र सरकारने अटारी सीमा बंद करण्याचा निर्णय घेतला आहे. भारतात आलेल्या पाकिस्तानी नागरिकांना 1 मेपर्यंत या मार्गाने परत जाण्याची अंतिम मुदत दिली आहे. भारतातील पाकिस्तानी उच्चायुक्तालयात तैनात असलेल्या संरक्षण सल्लागारांना देखील एका आठवड्याच्या आत देश सोडण्याचे आदेश देण्यात आले आहेत. भारत आणि पाकिस्तानच्या उच्चायोगांमधील कर्मचाऱ्यांची संख्या देखील कमी करण्यात आली असून ती 50 वरून 30 इतकी करण्यात आली आहे. केंद्र सरकारने स्पष्ट केले आहे की देशाच्या सुरक्षेशी कोणतीही तडजोड केली जाणार नाही.

The post पाकिस्तान्यांचे व्हिसा रद्द! सर्वांना शोधून शोधून बाहेर काढा, अमित शहांच्या सर्व मुख्यमंत्र्यांना सूचना appeared first on थोडक्यात घडामोडी.

पुणे: ‘‘सर्वांसाठी घरे’’ या महत्त्वाकांक्षी योजनेंतर्गत केंद्रीय सरकारने २०२९ पर्यंत गरीब, गरजू, महिला, अनुसूचित जाती आणि अनुसूचित जमाती (एससी, एसटी) यांतील पाच कोटी नागरिकांना हक्काचं घर देण्याचा संकल्प केला आहे, अशी माहिती केंद्रीय गृह आणि सहकार मंत्री अमित शहा यांनी शनिवारी पुण्यात दिली.

पंतप्रधान आवास योजना (ग्रामीण) च्या दुसऱ्या टप्प्यात राज्यातील २० लाख लाभार्थ्यांना मंजुरी पत्रांचे वितरण आणि दहा लाख लाभार्थ्यांना प्रथम हप्ता वितरण कार्यक्रमात शहा बोलत होते. या कार्यक्रमात मुख्यमंत्री देवेंद्र फडणवीस, उपमुख्यमंत्री एकनाथ शिंदे, उपमुख्यमंत्री अजित पवार, ग्रामविकास मंत्री जयकुमार गोरे, उच्च व तंत्रशिक्षण मंत्री चंद्रकांत पाटील, विधान परिषद सभापती राम शिंदे आदी उपस्थित होते.

अमित शहा म्हणाले, ‘‘घर नसलेल्या नागरिकांना हक्काचं घर, घरात शौचालय, मोफत वीज, उज्ज्वला योजनेंतर्गत सिलिंडर देण्याचे काम केंद्र आणि राज्य सरकार करत आहे. २०४७ पर्यंत विकसित भारताचे उद्दिष्ट आहे. त्यामध्ये प्रत्येकाला घर, पाच लाख रुपयांपर्यंतचा विमा, पाच किलो धान्य, मोफत वीज आणि सिलिंडर दिले जातील. महिला, गरीब, अनुसूचित जाती आणि जमाती यांतील पाच कोटी नागरिकांना २०२९ पर्यंत घरे देण्याचा संकल्प मोदी सरकारने केला आहे. गेल्या ११ वर्षांत मोदी सरकारने ४ कोटी लोकांना वीज, १३ कोटी शौचालये, १ कोटी लखपती दीदी आणि ३६ कोटी लोकांना गरिबीतून बाहेर काढले आहे.’’

उपमुख्यमंत्री एकनाथ शिंदे यांनी सांगितले, ‘‘देशाला आर्थिक महासत्ता बनविण्यासाठी पंतप्रधान नरेंद्र मोदी आणि गृहमंत्री अमित शहा काम करत आहेत. गेल्या अडीच वर्षांत पंतप्रधान मोदींनी राज्याला आर्थिक मदत केली असून, गृहमंत्री शहा हे भक्कमपणे पाठिशी राहिल्याने अनेक विकासकामे मार्गी लागली आहेत. पीएम आवास योजनेसह म्हाडा, सिडको अशा विविध माध्यमांतून घरे देण्यात येत आहेत. याबरोबरच राज्यात लवकरच नवीन गृहनिर्माण धोरण आणण्यात येणार आहे, ज्यामुळे परवडणारी घरे निर्माण होणार आहेत.’’

उपमुख्यमंत्री अजित पवार यांनी यावेळी ग्वाही दिली, ‘‘पीएम आवास योजनेंतर्गत दुसऱ्या टप्प्यात देशभरात दोन कोटी घरे देण्यात येणार आहेत. त्यामध्ये महाराष्ट्राला जास्तीत जास्त घरे मिळवण्यासाठी आम्ही प्रयत्न करू.’’

The post मोठी बातमी : ५ कोटी लोकांना २०२९ पर्यंत हक्काचं घर; केंद्रीय गृहमंत्री अमित शहा यांची मोठी घोषणा appeared first on थोडक्यात घडामोडी.

मुंबई: एकनाथ शिंदे यांचा कोणताही बालेकिल्ला नाही, त्यांनी पैशांच्या जोरावर काही बालेकिल्ले उभे केले आहेत. शिंदे यांनी ५० वर्षांत कोणतं महान कार्य केले आहे की बालेकिल्ले उभारले? ते काय लोकमान्य टिळक आहेत? त्यांची विचारधारा काय आहे? ते काय वल्लभभाई पटेल आहेत? दीनदयाळ उपाध्याय आहेत? अटलबिहारी वाजपेयी आहेत? ज्या दिवशी अमित शाह राहणार नाहीत, त्यादिवशी यांची टेकडीसुद्धा राहणार नाही, असं संजय राऊत यांनी म्हटलं आहे.

शरद पवारांसोबत कसला रूसवा-फुगवा, एका विशिष्ट मुद्द्याबद्दल आम्ही शिवसेनेच्या भावना व्यक्त केल्या. ज्या महादजी शिंदे यांच्या नावाने पुरस्कार दिला जातो, त्यांनी कोणतं महान कार्य केलं? इतका शूर योद्धा महादजी शिंदे यांच्या नावाने पुरस्कार मिळावा? महाराष्ट्र सदनमध्ये अखिल भारतीय मराठी साहित्य संमेलनाच्या बॅनरखाली हा कार्यक्रम घेतला गेला. लोकांचा गैरसमज झाला की अखिल भारतीय मराठी साहित्य संमेलनाने हा पुरस्कार दिला, पण तो साहित्य संमेलनाचा कार्यक्रम नव्हता, तो एक खासगी कार्यक्रम होता. शरद पवारांची फसवणूक झाली, हा कार्यक्रम साहित्य संमेलनाचा नव्हता, त्यामुळे आमचं आक्षेप त्यावर आहे, असं संजय राऊत यांनी स्पष्ट केलं.

ही लोकशाही आहे, दोन स्वतंत्र विचारधारांमध्ये मतभेद आहेत. आमचं एखाद्या व्यक्तीविषयीचं मत हे टोकाचं आहे. शरद पवारांचा पक्ष फोडण्याच्या मुद्द्यावरही आमचं मत तेच आहे. शिवसेना आणि शरद पवारांचा पक्ष अमित शाह आणि नरेंद्र मोदी यांनी फोडला, ते त्यांना हाताशी धरून हे करीत आहेत. आमच्या भावना टोकाच्या आहेत, भांडण असण्याचा प्रश्न नाही, आम्ही फक्त आमचं मत मांडलं, असं राऊतांनी सांगितलं.

दरम्यान, आज दिल्लीमध्ये संध्याकाळी संजय राऊत आणि शरद पवार हे एकाच मंचावर असणार आहेत. एक पुस्तक प्रकाशन कार्यक्रमात दोघं उपस्थित राहणार आहेत. एकनाथ शिंदे यांना पवारांच्या हस्ते पुरस्कार मिळाल्यानंतर राऊत यांनी पवारांवर निशाणा साधला आहे.

The post संजय राऊतांचा एकनाथ शिंदे आणि शरद पवारांवर तिव्र हल्ला; पैशांच्या जोरावर उभे केलेले बालेकिल्ले आणि अमित शाहांच्या मदतीने पक्ष फोडले असा गंभीर आरोप! appeared first on थोडक्यात घडामोडी.

महाराष्ट्र विधानसभा निवडणुकीत भाजपाच्या नेतृत्वाखालील महायुतीला ऐतिहासिक विजय मिळाला आहे. या विजयानंतर राज्यात स्थापन झालेल्या सरकारमध्ये देवेंद्र फडणवीस यांनी मुख्यमंत्री म्हणून, तर एकनाथ शिंदे आणि अजित पवार यांनी उपमुख्यमंत्री पदाची शपथ घेतली आहे. आज (रविवारी) नागपूरमध्ये मुख्यमंत्री देवेंद्र फडणवीस यांच्या नेतृत्वाखालील सरकारचा विस्तार होणार आहे. परंतु, किती मंत्र्यांचा शपथविधी होणार आणि घटक पक्षांना किती मंत्रीपदे मिळणार याबद्दल अद्याप स्पष्टता आलेली नाही.

दरम्यान, केंद्रीय गृहमंत्री आणि भाजपाचे दिग्गज नेते अमित शाह यांनी इंडिया टुडेला दिलेल्या मुलाखतीत विधानसभा निवडणुकीतील विजय आणि शिवसेनेचे नेते, उपमुख्यमंत्री एकनाथ शिंदे यांच्या नाराजीवर भाष्य केले आहे.

अमित शाह म्हणाले, “महाविकास आघाडीने लोकसभा निवडणुकीत १०५ जागा जिंकल्या होत्या, मात्र महाराष्ट्र विधानसभा निवडणुकीत महायुतीला विजय मिळाला आहे. तुमच्या विश्लेषणाचा आधार चुकीचा आहे. गेल्या निवडणुकीतदेखील नरेंद्र मोदी आणि देवेंद्र फडणवीस यांना बहुमत मिळालं होतं. शिवसेना ज्या जागांवर लढली त्या जागा आम्ही लढल्या नव्हत्या, त्यामुळे आम्ही जिंकू शकत नव्हतो. शिवसेना आमच्याबरोबर होती, त्यामुळे त्यांना बहुमत मिळालं होतं. आम्हाला संपूर्ण बहुमत मिळालं. मुख्यमंत्री बनण्याच्या लालसेपोटी उद्धव ठाकरे यांनी आमच्याशी विश्वासघात केला आणि महाराष्ट्राच्या जनतेशीही विश्वासघात केला.”

पुढे बोलताना अमित शाह म्हणाले, “उद्धव ठाकरे यांच्या नेतृत्वाखालील शिवसेनेने आमच्याबरोबर विश्वासघात केला, जनतेने ते लक्षात ठेवले. त्यानंतर अडीच वर्षांत सरकारने केलेल्या विकासकामांमुळे आणि मोदी सरकारच्या गेल्या १० वर्षांच्या सकारात्मक कामकाजाच्या जोरावर महायुतीला हा प्रचंड विजय मिळाला.”

राज्यात स्थापन झालेल्या महायुतीच्या सरकारमध्ये माजी मुख्यमंत्री एकनाथ शिंदे काहीसे नाराज असल्याची चर्चा सुरू आहे. याबाबत विचारले असता अमित शाह म्हणाले, “एकनाथ शिंदे नाराज असण्याचं काही कारण नाही. आमच्या जागा खूप जास्त आहेत. मागील वेळीही आमच्या जागा जास्त होत्या, पण आम्ही एकनाथ शिंदे यांना मुख्यमंत्री बनवले आणि अडीच वर्ष त्यांच्याबरोबर खंबीरपणे उभे राहिलो. यावेळी आम्ही सुरुवातीपासूनच सांगितले होते की, मुख्यमंत्री कोण असतील हे निवडणुकीनंतर निश्चित केले जाईल. त्यामुळे कोणीही नाराज होण्याची आवश्यकता नाही. कोणी नाराज नाही.”

मंत्रिमंडळ विस्तारास होणाऱ्या उशीराबद्दल अमित शाह म्हणाले, “आम्हाला काही अडचण येत नाही. सर्वकाही नियोजित कार्यक्रमानुसार चालू आहे. महाविकास आघाडीचे सरकार असताना जे घडत होते, त्यापेक्षा आम्ही तीन-तीन दिवस पुढे आहोत.”

The post उद्धव ठाकरे यांनी मुख्यमंत्री पदाच्या लालसेपोटी आमच्यासोबतच नाही, तर महाराष्ट्राच्या जनतेशीही विश्वासघात केला – अमित शाह appeared first on थोडक्यात घडामोडी.

जम्मू काश्मीरमध्ये तीन दिवसांत तीन दहशतवादी हल्ले झाल्याची घटना घडली आहे. दहशतवाद्यांनी भाविकांच्या एका बसवर हल्ला केला. यामध्ये १० जणांचा मृत्यू झाला. ही घटना ताजी असतानाच दहशतवाद्यांनी जम्मू काश्मीरच्या डोडा जिल्ह्यातील लष्कराच्या तळावर (टीओबी) गोळीबार केला. यामध्ये काही जवान जखमी झाले आहेत. जम्मू काश्मीरमधील दहशतवादी हल्ल्याच्या घटनांवर बोलताना शिवसेना ठाकरे गटाचे खासदार संजय राऊत यांनी देशाचे गृहमंत्री अमित शाह यांच्यावर हल्लाबोल केला आहे. ‘अमित शाह दुसऱ्यांदा गृहमंत्री झाल्यानंतर जम्मू काश्मीरमध्ये हल्ले वाढले असून देशातील कायदा-सुव्यवस्थेला गृहमंत्र्यांपासून धोका आहे’, असा गंभीर आरोप संजय राऊत यांनी केला.

जम्मू काश्मीरमध्ये दहशतवाद्यांनी एका बसवर हल्ला केला, त्यामध्ये १० लोक ठार झाले. त्यानंतर सातत्याने जम्मू काश्मीरमध्ये हल्ले सुरु आहेत. आजही बातमी आली की, डोडा जिल्ह्यात लष्कराच्या तळावर हल्ला केला. आता एकीकडे ३७० कलम रद्द केल्याचा डंका अमित शाह वाजवत आहेत. मात्र, तेव्हापासून जम्मू काश्मीरमध्ये शांतता नांदलेली दिसत नाही. काश्मिरी पंडित त्यांच्या घरी जाऊ शकलेले नाहीत, हे गृहमंत्र्यांचं अपयश आहे. आता अमित शाह यांना पुन्हा एकदा गृहमंत्रीपद दिल्यानंतर जम्मू काश्मीरमध्ये आणि मणिपूरमध्ये हिंसाचार वाढला आहे”, असा आरोप संजय राऊत यांनी केला.

मणिपूरच्या माजी मुख्यमंत्र्यांच्या ताफ्यावर हल्ला झाला. आमचं म्हणणं आहे की, अमित शाह हे गृहमंत्रीपदाचा वापर हा कायदा आणि सुव्यवस्था अबाधित ठेवण्यासाठी करत नाहीत. ते आपल्या राजकीय विरोधकांचा काटा काढण्यासाठी याचा वापर करतात. ते विरोधकांना संपवू शकतात, पण दहशतवाद्यांना संपवू शकत नाहीत. भष्ट्राचाऱ्यांना आपल्या पक्षात घेतात, पण काश्मिरी पंडितांना त्यांच्या घरी पाठवू शकले नाही. नरेंद्र मोदींनी असे गृहमंत्री पुन्हा एकदा देशाच्या छातीवर बसवून या देशातील शहिदांचा अपमान केला आहे. कायदा सुव्यवस्थेला धोका कोणापासून असेल तर गृहमंत्री अमित शाह यांच्यापासून आहे. कारण ते कायदा आणि सुव्यवस्थेबाबत विचार न करता ते फक्त राजकीय विचार करतात. त्यामुळे जेव्हापासून अमित शाह गृहमंत्री झाले तेव्हापासून जम्मू-काश्मीर आणि मणिपूर अशांत आहे. यावरून नितीश कुमार आणि चंद्रबाबू नायडू यांनी गृहमंत्र्यांचा राजीनामा मागितला पाहिजे”, असा हल्लाबोल संजय राऊत यांनी केला.

The post देशातील कायदा-सुव्यवस्थेला गृहमंत्र्यांपासून धोका, संजय राऊतांचा अमित शाहांवर गंभीर आरोप appeared first on थोडक्यात घडामोडी.

मुंबई : महाराष्ट्र नवनिर्माण सेनेने (मनसे) गृहमंत्री अमित शहा यांना पत्र लिहून मशिदींवरील लाऊडस्पीकर हटवण्याची मागणी केली आहे. सर्वोच्च न्यायालयाच्या आदेशाची अंमलबजावणी करून तातडीने ध्वनिक्षेपक काढण्याची कार्यवाही सुरू करावी, अशी मागणी महाराष्ट्र नवनिर्माण सेनेच्या नाशिक अध्यक्षांनी केली आहे.

मनसे नाशिक अध्यक्षांनी केंद्रीय गृहमंत्री अमित शहा यांना पत्र लिहिले आहे. सर्वोच्च न्यायालयाच्या आदेशाची अंमलबजावणी करताना मशिदींतील लाऊडस्पीकर लवकरात लवकर हटवावेत, अशी मागणी त्यांनी केली आहे. मनसे अध्यक्ष राज ठाकरे यांनी 12 एप्रिल रोजी ठाण्यातील सभेत राज्य सरकारला 3 मे पर्यंत मशिदींवरील लाऊडस्पीकर हटवण्यास सांगितले होते. जर लाऊडस्पीकर हटवले नाहीत तर पक्षाचे कार्यकर्ते मशिदींसमोर लाऊडस्पीकरवरून हनुमान चालीसा वाजवायला सुरुवात करतील, असेही ते म्हणाले होते.

तत्पूर्वी, बाबासाहेब भीमराव आंबेडकर यांच्या जयंतीनिमित्त महाराष्ट्रातील संगमनेर येथे काढण्यात आलेल्या मिरवणुकीत काही दंगलखोरांनी गोंधळ घातला आणि इस्लाम झिंदाबाद आणि अल्लाह-हू-अकबरच्या प्रक्षोभक घोषणा दिल्या. यावेळी जमावाकडून महिलांचा विनयभंग झाल्याचीही चर्चा आहे.

The post मनसेचे गृहमंत्री अमित शहांना पत्र, लाऊडस्पीकर हटवण्याची केली मागणी appeared first on थोडक्यात घडामोडी.

नवी दिल्ली : ‘नॅशनल स्टुडंटस युनियन ऑफ इंडिया’ (NSUI) संघटनेचे सरचिटणीस नागेश करियप्पा यांनी केंद्रीय गृहमंत्री अमित शहा बेपत्ता असल्याची तक्रार बुधवारी दिल्ली पोलिसांत दाखल केली आहे. अशा संकट प्रसंगी पळून न जाता देशवासियांची काळजी घेणं आणि सेवा करणं हे राजकीय व्यक्तीचं काम असल्याचंही त्यांनी आपल्या तक्रारीत म्हटलं आहे.

गृहमंत्री शहा बेपत्ता असल्याची तक्रार दाखल झाल्यानंतर दिल्ली पोलीस करियप्पा यांची चौकशी करण्यासाठी आल्याचा दावा एनएसयूआयचे राष्ट्रीय सचिव आणि प्रवक्ते लोकेश चूग यांनी केला. २०१३ पर्यंत राजकीय नेते नागरिकांना उत्तरासाठी बाध्य होते. परंतु, भाजप सत्तेत आल्यानंतर मात्र हे चित्रं पालटलं. महामारी सारख्या कठीण काळात पंतप्रधान पदानंतर दुसऱ्या अतिशय महत्त्वाच्या पदावर असलेली व्यक्ती मात्र गायब झाली आहे, अशी घणाघाती टीका चूग यांनी यावेळी केली.

देशातील सर्वच जण अत्यंत कठीण प्रसंगातून जात आहेत. अशा काळात नागरिकांना आधार देणं आणि जबाबदारी घेणं हे सरकारचं कर्तव्य आहे. परंतु, सद्य सरकार मात्र यात अपयशी ठरत असल्याचं दिसतं आहे. त्यामुळे गृहमंत्री बेपत्ता असल्याची तक्रार दाखल केली आहे. सरकार देशाच्या प्रश्नांची उत्तरं लवकरात लवकर देईल, अशी आशा आहे, असंही नागेश करियप्पा यांनी म्हटलं आहे.

Name : Amit shah
Designation : Home Minster of India
Last seen : During Bengal
election campaigns.
Missing Complaint registered with @DelhiPolice #AmitShahMissing pic.twitter.com/nX7mKP3nLB

— Nagesh Kariyappa (@Nagesh_nsui6) May 12, 2021

The post गृहमंत्री अमित शहा बेपत्ता असल्याची तक्रार दाखल, NSUI ने केली तक्रार appeared first on थोडक्यात घडामोडी.

नवी दिल्ली : 370 ही तात्पुरती कराराची बाब होती. तुम्ही आमच्याकडे 17 महिन्यांत काय केले याचा हिशोब मागता. पण तात्पुरतं असलेलं 370 कलम 70 वर्ष का चालू ठेवलं, याचं उत्तर कोण देईल? याआधी ७० वर्ष राज्य करण्याची संधी मिळालेल्यांनी ३७० तेव्हाच का हटवलं नाही त्याचे अगोदर उत्तर द्यावे. ज्यांच्याकडे पिढ्यानपिढ्या सत्ता होती, त्यांनी स्वतःकडे बघून ठरवावं आमच्याकडे दीड वर्षाचा हिशोब मागण्याची त्यांची योग्यता आहे का?, असे केंद्रीय गृहमंत्री अमित शहा म्हणाले. जम्मू काश्मीर पुनर्रचना विधेयकावर लोकसभेत चर्चा झाली. यावेळी उत्तर देताना अमित शहा यांनी हे वक्तव्य केले.

कलम ३७० हटवले त्यावेळी केंद्र सरकारने जम्मू काश्मीरमध्ये परिस्थिती सामान्य झाल्यानंतर निवडणूक घेण्याची घोषणा केली आहे. जम्मू काश्मीर हे विधानसभा असलेले केंद्रशासीत राज्य असेल, असे केंद्र सरकारने जाहीर केले आहे. सध्या दिल्ली आणि पुद्दुच्चेरी या ठिकाणी केंद्रशासीत राज्य अशी व्यवस्था आहे. अशाच पद्धतीची व्यवस्था जम्मू काश्मीरमध्ये आणण्याची केंद्र सरकारची योजना आहे. मात्र कोरोनामुळे थोडा वेळ लागत असल्याचे अमित शहा यांनी सांगितले.

जम्मू काश्मीरमध्ये दीर्घ काळ पंचायत व्यवस्था नव्हती. पण ३७० हटवल्यानंतर तिथे पंचायतींच्या निवडणुका झाल्या. स्थानिक पातळीवर विकासकामे राबवण्यासाठी लोकांनी केलेल्या मतदानातून त्यांचे प्रतिनिधी निवडले गेले आहेत. पंचायतींना विकासाकरिता बजेट दिले आहे. तब्बल २१ विषयांमध्ये पंचायती कामं करू शकतात. जम्मू काश्मीरच्या पंचायतींसाठी १५०० कोटी रुपयांची तरतूद केली आहे. आतापर्यंत जम्मू काश्मीरमध्ये ३ हजार ६०० सरपंच आणि ३३ हजार पंच यांची निवड झाली आहे. घराणेशाहीतून नाही तर लोकांनी केलेल्या मतदानातून निवड झालेले प्रतिनिधी काम करत आहेत. जम्मू काश्मीरमध्ये कनिष्ठ पंचायतींसाठी डिसेंबर २०१८ मध्ये निवडणूक झाली, त्यात ७४ टक्के मतदान झाले.

३७० हटवल्यामुळे जम्मू काश्मीरमध्ये मुक्त वातावरणात पंचायतींचा कारभार सुरू आहे. घराणेशाहीचा प्रभाव दिसत नाही. जम्मू काश्मीरची तरुण पिढी ऑल इंडिया कॅडरमधून आयएएस आणि आयपीएस होऊ शकते. राज्यातील शाळा जाळल्या गेल्या नसत्या तर आधीच अनेकजण आयएएस आणि आयपीएस होऊ शकले असते. पण आता मुक्त वातावरणात नक्की आयएएस आणि आयपीएस होऊ शकतील, असे अमित शहा म्हणाले.

एमआयएमचे नेते खासदार ओवैसी यांनी जम्मू काश्मीरच्या मुद्यावर प्रश्न उपस्थित केला होता. जम्मू काश्मीरला राज्याचा दर्जा देणार तर तिथले कॅडर रद्द का केले जात आहे, असे ओवैसींनी विचारले होते. या प्रश्नाला केंद्रीय गृहमंत्री अमित शहा यांनी उत्तर दिले. जम्मू काश्मीरला केंद्रशासीत राज्याचा दर्जा मिळणार आहे. तिथे विधानसभा असेल आणि प्रशासन राबण्यासाठी आयएएस दर्जाचे अधिकारी पण असतील. हिंदू अधिकारी मुस्लिम नागरिकांचे प्रश्न कसे हाताळणार हा मुद्दाच गैरलागू ठरतो. देशभर असा निकष वापरुन कारभार होत नाही. मग काश्मीरमध्ये ही व्यवस्था कशाला हवी. अधिकारी हिंदू असो वा मुस्लिम त्याला कायद्यांच्या चौकटीत राहून नागरिकांच्या हिताचे काम करायचे आहे. जर इतरत्र हे व्यवस्थित सुरू आहे तर तिथेही होणार, असे अमित शहा म्हणाले.

The post तात्पुरतं असलेलं 370 कलम 70 वर्ष ठेवणारे आमच्याकडे दीड वर्षाचा हिशोब मागत आहेत – अमित शहा appeared first on थोडक्यात घडामोडी.