मुंबई : दहावीच्या विद्यार्थ्यांचे प्रत्येक विषयाचे 100 गुणांचे मुल्यमापन होणार असल्याची माहिती शिक्षणमंत्री वर्षा गायकवाड यांनी दिली आहे. कोरोनाच्या प्रादुर्भावामुळे राज्यातील दहावीची परीक्षा रद्द करण्याचा निर्णय घेण्यात आला होता. या विद्यार्थ्यांना अंतर्गत मुल्यमापनाच्या आधारे उत्तीर्ण करण्यात येईल असं शिक्षणमंत्र्यांनी सांगितलं होतं.

या विद्यार्थ्यांचे मूल्यांकन कसे होणार, त्याची पद्धती राज्य सरकारने जाहीर केली आहे. शालेय शिक्षणमंत्री वर्षा गायकवाड यांनी याबाबतची घोषणा केली आहे. शिक्षणतज्ज्ञ, शिक्षक, पालक आणि समाजातील विविध घटकांशी यासंबंधी तब्बल २४ बैठका घेतल्यानंतर दहावीच्या मूल्यांकनाबाबतची पद्धती तयार करण्यात आली असल्याचे गायकवाड यांनी सांगितले. नववीतील विद्यार्थ्यांचे मूल्यमापन कोविड स्थितीत वस्तुनिष्ठ पद्धतीने झाले होते. त्याची नोंद सरल प्रणालीत आहे, असेही त्या म्हणाल्या. दहावीचा निकालाचे सत्र शालेय शिक्षण विभागाने जाहीर केले आहे. या सूत्रानुसार इयत्ता नववी व दहावी या दोन्ही इयत्तांमध्ये शाळांनी घेतलेल्या परीक्षांचे गुणांचे रूपांतर शंभर गुणांमध्ये करून अंतिम निकाल जाहीर केला जाणार आहे.

1. विद्यार्थ्यांचे इयत्ता दहावीच्या वर्षभरातील अंतर्गत लेखी मूल्यमापनाचे ३० गुण
2. विद्यार्थ्यांचे इयत्ता १०वीचे गृहपाठ/ तोंडी परीक्षा / प्रात्यवक्षक परीक्षा यांच्या आधारे २० गुण
3. विद्यार्थ्यांच्या इयत्ता नववीच्या अंतिम निकालात मिळालेल्या गुणांचे ५० टक्के वेटेज
4. वरीलप्रमाणे विषयनिहाय एकूण १०० गुणांपैकी मूल्यांकन होणार
5. म्हणजेच प्रत्येक विषयातील १०० गुणांपैकी नववीतील गुणांचे ५० टक्के आणि दहावीतील अंतर्गत मूल्यमापन गुणांचे ५० टक्के वेटेज वापरून तयार होणार अंतिम निकाल

ज्या विद्यार्थ्यांना वरील पद्धतीने तयार केलेला निकाल समाधानकारक वाटत नसेल त्यांना कोविड-19 ची परिस्थिती सामान्य झाल्यानंतर मंडळाच्या प्रचलित पद्धतीनुसार श्रेणीसुधार योजनेअंतर्गत यापुढील लगतच्या दोन परीक्षांमध्ये प्रविष्ट होण्याची संधी उपलब्ध असेल.

विद्यार्थ्यांच्या निकालाचे नियमन करण्यासाठी शाळा स्तरावर मुख्याध्यापकांच्या अध्यक्षतेखाली 7 सदस्यांची निकाल समिती असेल. या निकालपत्रांच्या अभिलेखांची पडताळणी विभागीय स्तरावर शालेय शिक्षण विभागातील अधिकाऱ्यांकडून करण्यात येईल. शाळास्तरावर गैरप्रकार अथवा अभिलेख यामध्ये फेरफार झाल्यास शिस्तभंग व दंडात्मक कारवाई याची तरतूद करण्यात आली आहे. मंडळामार्फत जून 2021 अखेर निकाल घोषित करण्याचे नियोजन आहे. त्याकरता विद्यार्थ्यांची मूल्यमापन प्रक्रिया पूर्ण करण्यासाठी वेळापत्रक मंडळामार्फत लवकरच जाहीर करण्यात येईल. सर्व शाळांनी या वेळापत्रकाचे तंतोतंत पालन करावे .

फेरपरीक्षा देणारे विद्यार्थी (Repeater Student), खाजगी ( Form no.17), तुरळक विषय घेऊन बसणारे विद्यार्थी यांच्यासाठी देखील मूल्यमापन धोरण निश्चित केले आहे. श्रेणीसुधार योजनेअंतर्गत बसलेल्या विद्यार्थ्यांसाठी त्यांना लागू असलेल्या पुढील एक किंवा दोन संधी अबाधित राहतील.

शिक्षणमंत्री वर्षा गायकवाड यांनी सांगितलं की विविध परीक्षा मंडळानी या वर्षीच्या इयत्ता दहावी निकालासाठी शाळास्तरावर होणारे अंतर्गत मूल्यमापन विचारात घेतल्याने अकरावी प्रवेशासाठी एकवाक्यता राहण्याच्या दृष्टीने व सर्व विद्यार्थ्यांना समान संधी मिळावी यासाठी अकरावी प्रवेशासाठी वैकल्पिक CET घेणार आहोत. सदर प्रवेश परीक्षा राज्य मंडळाच्या दहावीच्या अभ्यासक्रमावर आधारित असेल. 100 गुणांच्या परीक्षेसाठी बहुपर्यायी प्रश्न असतील आणि OMR पद्धतीने दोन तासांची परीक्षा घेण्यात येईल.

The post मोठी बातमी : दहावीचा अंतिम निकाल कसा तयार करणार? शिक्षणमंत्र्यांनी दिली माहिती, अकरावी प्रवेशासाठी वैकल्पिक CET appeared first on थोडक्यात घडामोडी.

मुंबई : काँग्रेस नेते एकनाथ गायकवाड यांचं निधन झालं आहे. ते राज्याच्या शालेय शिक्षणमंत्री वर्षा गायकवाड यांचे वडील होते. एकनाथ गायकवाड यांना कोरोनाची लागण झाली होती. त्यांच्यावर ब्रीच कॅण्डी रुग्णालयात उपचार सुरु होते. मात्र उपचारादरम्यानच त्यांचे निधन झाले.

माजी खासदार व मुंबई काँग्रेसचे माजी अध्यक्ष एकनाथ गायकवाड यांना कोरोनाची लागण झाली होती. त्यानंतर त्यांना ब्रीच कॅण्डी रुग्णालयात दाखल करण्यात आलं होतं. तिथे उपचार सुरु असताना आज सकाळी १० वाजता त्यांनी अखेरचा श्वास घेतला.

एकनाथ गायकवाड काँग्रेसचे मुंबईचे माजी अध्यक्ष राहिले होते. त्यांनी राज्य मंत्रिमंडळात मंत्रिपद भूषविलं होतं. एकनाथ गायकवाड यांनी दक्षिण मध्य मुंबई मतदारसंघातून शिवसेना नेते आणि लोकसभेचे माजी सभापती मनोहर जोशी यांचा पराभव केला होता. दक्षिण मध्य मुंबईतून दोन वेळा ते निवडून आले होते. नंतर मात्र शिवसेनेच्या राहुल शेवाळे यांनी त्यांचा पराभव केला होता. त्यांच्या निधनामुळे राजकीय क्षेत्रात शोक व्यक्त केला जात आहे.

The post शिक्षणमंत्री वर्षा गायकवाड यांना पितृशोक, काँग्रेस नेते एकनाथ गायकवाड यांचं निधन appeared first on थोडक्यात घडामोडी.

मुंबई : इयत्ता १०वी आणि १२वीच्या परीक्षांसंदर्भात आज शालेय शिक्षणमंत्री वर्षा गायकवाड यांनी अत्यंत महत्वाची माहिती दिली आहे. यंदाच्या वर्षी विद्यार्थ्यांना लेखी परीक्षेसाठी ३० मिनिटांचा वाढीव वेळ देण्यात येणार असून परीक्षा सकाळी ११ ऐवजी १०.३० वाजता सुरू होईल. दहावी आणि बारावीच्या परीक्षा या नियोजित वेळेत ऑफलाईन पद्धतीनेच घेण्यात येणार आहेत.

महत्वाचे मुद्दे :

1. विद्यार्थी असलेल्या शाळेतच लेखी परीक्षा घेतली जाणार आहे.
2. विद्यार्थ्यांना परीक्षेसाठी वर्ग खोल्या कमी पडल्यास नजीकच्या शाळेत परीक्षेची व्यवस्था केली जाईल.
3. यंदाच्या वर्षी लेखी परीक्षेसाठी विद्यार्थ्यांना ३० मिनिटांचा वाढीव वेळ मिळेल.
4. दिव्यांग विद्यार्थ्यांना एक तासाचा वाढीव वेळ मिळेल.
5. ४० – ५० मार्क्सच्या पेपरसाठी १५ मिनिटांचा वाढीव वेळ मिळेल.
6. यावर्षी अर्धातास आधी म्हणजेच ११ ऐवजी १०.३० वाजता परीक्षा सुरू होईल.
7. विद्यार्थ्यांना कोरोना झाल्यास विशेष परीक्षा जून महिन्यात घेतली जाईल.
8. दहावी-बारावीच्या प्रॅक्टिकल परीक्षा लेखी परीक्षेनंतर १५ दिवसांत होतील.
9. २२ ते १० जून दरम्यान बारावीची प्रात्यक्षिक परीक्षा होईल.

Hats off to our students who have braved this tough academic year. To help them, here are some concessions and guidelines for the final exams. For FAQs, referhttps://t.co/KX9sqYrmnj pic.twitter.com/BX0873EFVM

— Varsha Gaikwad (@VarshaEGaikwad) March 20, 2021

सुरक्षात्मक उपाय योजना :

1. परीक्षेसंदर्भात शाळा, कनिष्ठ महाविद्यालय, केंद्र प्रमुख पर्यवेक्षक व अन्य बाबी साठी स्वतंत्र सूचना देण्यात येतील.
2. कोविड-19 बाबत केंद्रशासन व राज्य शासनाच्या मार्गदर्शक सूचना स्वतंत्रपणे देण्यात येतील.
3. राज्यमंडळाच्या अधिकृत संकेतस्थळावरीलच माहिती अधिकृत समजण्यात यावी असं आवाहन सर्व विद्यार्थ्यांना, पालकांना करण्यात आलं आहे.

प्रात्यक्षिक परीक्षा :

1. दहावीच्या दरवर्षी प्रात्यक्षिक परीक्षा घेतल्या जात असत. परंतु या वर्षी कोविड -19 परिस्थितीमुळे विशिष्ट लेखन कार्य ( Assignment ) गृहपाठ पध्दतीने घेण्यात येतील.
2. प्रात्यक्षिक परीक्षा ऐवजी विशिष्ट लेखनकार्य, गृहपाठ पध्दतीने 21 मे ते 10 जून या कालावधीत सादर करण्यात यावेत असं बोर्डाकडून स्पष्ट करण्यात आलं आहे.
3. बारावीच्या लेखी परीक्षेनंतर प्रात्यक्षिक परीक्षा दि . 22 मे ते 10 जून या कालावधीत होतील.
4. कोविड-19 च्या परिस्थितीमुळे विद्यार्थ्यांना प्रत्यक्ष शाळेमध्ये प्रात्यक्षिकांचा सराव कमी असल्यामुळे 12 वी सायन्सच्या विद्यार्थ्यांची प्रात्यक्षिके कमी करण्यात आली असून 5 ते 6 प्रात्यक्षिकावरच परीक्षा घेण्यात येईल व त्या संदर्भात माहिती कनिष्ठ महाविद्यालयांना स्वतंत्रपणे देण्यात येईल.
5. कला, वाणिज्य, व्यावसायिक अभ्यासक्रम शिकत असलेल्या विद्यार्थ्यांनी लेखी परिक्षेनंतर 15 दिवसात Assignment सादर करावेत.
6. दहावी आणि बारावी मधील विद्यार्थ्यांस अथवा त्याच्या कुटुंबातील सदस्यास प्रात्यक्षिक परीक्षा कालावधी मध्ये कोरोनाची लागण झाल्यास किंवा लॉकडाऊन, कन्टेमेंन्ट झोन, संचारबंदी अथवा कोरोना विषय परिस्थितीमुळे, प्रात्यक्षिक परीक्षा किंवा Assignment सादर करण्यासा 15 दिवसाची मुदतवाढ देण्यात येईल, असं बोर्डाने आपल्या निवेदनात सांगितलं आहे.

The post मोठी बातमी : १० वी -१२ वीच्या परीक्षांसंदर्भात शिक्षणमंत्र्यांनी दिली महत्वाची माहिती appeared first on थोडक्यात घडामोडी.

मुंबई : शालेय शिक्षणमंत्री वर्षा यांनी दहावी-बारावी बोर्ड परिक्षेबाबत बैठक घेतली. या बैठकीत पालक संघटना, शिक्षक तसेच बोर्ड आणि शिक्षण विभागातील अधिकारी उपस्थित होते. यावेळी शिक्षणमंत्र्यांनी बोर्ड परिक्षेबाबत पालक, शिक्षकांचे म्हणणे जाणून घेतले. बोर्ड परीक्षांबाबत सर्व बाजूने चर्चा करून शिक्षणमंत्री वर्षा गायकवाड यांनी पालकांच्या शंकांचे निरसन केले.

पालकांनी परीक्षा ऑनलाइन घेता येईल का ? हा प्रश्न उपस्थित केला. यावर शिक्षण मंत्र्यांनी स्पष्ट केले की परीक्षा ऑनलाइन घेणे शक्य नसून, गावखेड्यात कनेक्टिव्हिटीचा प्रश्न आहे व लाखो विद्यार्थ्यांची परीक्षा घेणे यामध्ये शक्य नाही. शिवाय, सर्व विद्यार्थ्यांचा विचार करता बोर्डाला निर्णय घ्यावा लागणार त्यामुळे परीक्षा ऑफलाइन पद्धतीने घ्याव्या लागणार आहेत.

दहावी बारावी बोर्डाच्या परिक्षेच्या वेळापत्रकात बदल करणे शक्य नाही. कारण वेळापत्रकबाबत आपण हरकती आणि प्रश्न उपस्थित करण्यासाठी वेळ मागितला होता. त्यानंतर सर्व बाजूने विचार करून हे वेळापत्रक तयार केले आहे. जर काही विद्यार्थी अडचणीमुळे किंवा कोव्हिडमुळे परीक्षा देऊ शकले नाही. तर लगेच आपण त्यांची परीक्षा घेणार आहोत. ही परीक्षा झाल्यावर लगेच पुढील परीक्षा घेण्याचे नियोजन करणार आहोत त्यामुळे विद्यार्थी पालकांनी चिंता करण्याची गरज नाही, असेदेखील शिक्षणमंत्र्यांनी सांगितले.

प्रात्यक्षिक आणि तोंडी परीक्षा कोरोना प्रादुर्भाव पाहता लेखी परीक्षानंतर घेण्याचा सुद्धा विचार शिक्षण विभाग करत आहे. परीक्षेचा पॅटर्न आणि अभ्यासक्रमामध्ये ऐनवेळी बदल होणे शक्य नाही. त्यामुळे ठरवून दिलेल्या अभ्यासक्रमाचा विचार बोर्डाने केला आहे. परीक्षा आयोजन आणि नियोजनाबाबत सल्लागार समिती परिस्थितीचा आढावा घेऊन व विचार करून निर्णय घेत आहे, असंही शिक्षणमंत्र्यांनी सांगितलं.

The post दहावी-बारावी बोर्ड परीक्षा ऑफलाइन पद्धतीनेच होणार – शिक्षणमंत्री वर्षा गायकवाड appeared first on थोडक्यात घडामोडी.

युनेस्को आणि लंडनस्थित वार्की फाऊंडेशन यांच्या संयुक्त विद्यमाने दिला जाणारा ग्लोबल टीचर पुरस्कार सोलापूरच्या परितेवाडी शाळेतले शिक्षक रणजीतसिंह डिसले यांनी मिळवला. सात कोटी रुपयांचा पुरस्कार मिळवणारे रणजीतसिंह डिसले हे पहिले भारतीय शिक्षक ठरले. QR कोडेड पुस्तकांच्या माध्यमातून महाराष्ट्रच नव्हे तर देशातील शिक्षण क्षेत्रात अभिनव क्रांती केलेल्या कामांची दखल घेत हा पुरस्कार जाहीर करण्यात आला.

मुख्यमंत्री उद्धव ठाकरे यांनी याबद्दल त्यांचा सत्कार आपल्या निवासस्थानी केला. त्यावरून प्रवीण दरेकर यांनी ठाकरेंना टोला लगावला. मुख्यमंत्री उद्धव ठाकरे यांनी डिसले यांना निवासस्थानी बोलावून त्यांचा सत्कार केला. तसेच, शिक्षणमंत्री वर्षा गायकवाड यांनी डिसले यांचा शासकीय निवासस्थानी बोलावून सन्मान केला. याबाबत दरेकर यांनी त्यांच्यावर टीका केली.

प्रवीण दरेकर यांनी ट्विट करत म्हटलं कि, “मुख्यमंत्री महोदय, शिक्षणमंत्री महोदया, थोडे कष्ट घेऊन परितेवाडी-बार्शी गाठली असती आणि डिसले गुरुजींचा सत्कार केला असता, तर तो खऱ्या अर्थाने गुरुजींचा, त्यांच्या कुटुंबाचा, शाळेचा, विद्यार्थ्यांचा, त्या परिसराचा सत्कार ठरला असता. जागतिक पातळीवर ज्यांनी राज्याचं नाव रोशन केलं, त्या सत्कारमूर्तीला आपल्या निवासस्थानी बोलावून केलेला सत्कार म्हणजे निव्वळ औपचारिकता ठरली.”

The post त्या सत्कारमूर्तीला आपल्या निवासस्थानी बोलावून केलेला सत्कार म्हणजे… appeared first on थोडक्यात घडामोडी.