गुजरात : गुजरातच्या राजकारणात आज मोठ्या घडामोडी पाहायला मिळाल्या. मुख्यमंत्री भूपेंद्र पटेल यांच्या नेतृत्त्वाखालील सध्याच्या मंत्रिमंडळाने अचानक सर्व सदस्यांचे राजीनामे सादर केले. हे राजीनामे केंद्रीय नेतृत्वाच्या आदेशानंतर घेण्यात आले असल्याची माहिती आहे.

मुख्यमंत्र्यांच्या निवासस्थानी झालेल्या बैठकदरम्यान वरिष्ठ नेत्यांनी मंत्र्यांना हा निर्णय समजावून सांगितला. यानंतर सर्व मंत्र्यांनी आपापले राजीनामे मुख्यमंत्री भूपेंद्र पटेल यांच्याकडे सुपूर्द केले. सुरुवातीला अंदाज व्यक्त केला जात होता की, १२ मंत्री राजीनामा देतील, मात्र मुख्यमंत्री वगळता सर्व मंत्र्यांचे राजीनामे घेण्यात आले आहेत.

राज्यातील राजकीय विश्लेषकांच्या मते, या सर्व राजीनाम्यांचा उद्देश कॅबिनेट विस्तार करण्याशी संबंधित आहे. सूत्रांच्या माहितीनुसार, मुख्यमंत्री भूपेंद्र पटेल आज रात्री राज्यपालांची भेट घेऊन मंत्र्यांचे राजीनामे त्यांच्या हाती सुपूर्द करतील.

अद्याप भाजप किंवा मुख्यमंत्री कार्यालयाकडून अधिकृत घोषणा झालेली नाही. मात्र, राजकीय वर्तुळात सांगण्यात येत आहे की, नव्या मंत्रिमंडळाचा शपथविधी उद्या, शुक्रवारी सकाळी साडे ११ वाजता, गांधीनगर येथील महात्मा मंदिर येथे पार पडेल. या कार्यक्रमाला केंद्रीय मंत्री अमित शहा आणि भाजपचे राष्ट्रीय अध्यक्ष जे. पी. नड्डा उपस्थित राहणार आहेत.

विशेष म्हणजे, या शपथविधीनंतर मुख्यमंत्री भूपेंद्र पटेल नवीन मंत्रिमंडळाचा आकार निश्चित करतील आणि आगामी काळात गुजरातमध्ये राजकारणाची दिशा ठरवली जाईल. राजकीय वर्तुळात यासंदर्भात वेगवेगळ्या चर्चा रंगल्या आहेत, मात्र केंद्रीय नेतृत्वाच्या आदेशानुसार हा निर्णय घेण्यात आलेला आहे, असा अंदाज व्यक्त केला जात आहे.

गुजरातमध्ये सध्याच्या मंत्रिमंडळातील सर्व मंत्र्यांचे राजीनामे घेणे ही खूप मोठी आणि ऐतिहासिक घडामोड मानली जात आहे. आता पुढील काही दिवसात नव्या मंत्रिमंडळाच्या सदस्यांची नावे जाहीर होण्याची शक्यता आहे आणि आगामी कॅबिनेट विस्तारावर सर्वांचे लक्ष लागले आहे.

The post गुजरातच्या राजकारणात मोठी घडामोड, मुख्यमंत्री वगळता सर्व मंत्र्यांचे राजीनामे appeared first on थोडक्यात घडामोडी.

गुजरातमधील मेहसाना जिल्ह्यात एक धक्कादायक घटना घडली आहे. आरोग्य विभागाच्या कर्मचार्‍यांनी नसबंदीचे टार्गेट पूर्ण करण्यासाठी एका अविवाहित तरुणाला दारू पाजली आणि त्याची नसबंदी केली. या प्रकाराने एकच खळबळ उडाली आहे.

गोविंद दंतानी नामक 30 वर्षीय तरुणाने आपबिती सांगितली. तो शेतात काम करत असताना एक आरोग्य कर्मचारी त्याच्याकडे आला. त्याने गोविंदला लिंबू आणि पेरू तोडण्यासाठी रोजंदारीवर बोलावले आणि 500 रुपये रोज देण्याचं आश्वासन दिलं. गोविंद त्यासाठी तयार झाला. त्याला लगेच कारमध्ये बसवून, आरोग्य कर्मचाऱ्याने त्याला 100 रुपयांची दारू पाजली. दारूच्या नशेत असताना, त्याला सरकारी रुग्णवाहिकेतून गांधीनगरजवळ असलेल्या अदलज येथील रुग्णालयात नेलं आणि त्याच्यावर नसबंदीची शस्त्रक्रिया केली. शुद्धीवर आल्यावर गोविंदला या प्रकाराची माहिती मिळाली.

त्याच्या पोटात वेदना होऊ लागल्यावर, गोविंद डॉक्टरकडे गेला आणि तिथे त्याला कळलं की त्याची नसबंदी झाली आहे. या घटनेमुळे गोविंदच्या लग्नाची तयारी धुडकली, कारण त्याची लग्नासाठीचे नातेवाईक वधू पक्षाशी संबंध तोडले.

हा प्रकार, कुटुंब नियोजन पंधरवाडा साजरा असताना, टार्गेट पूर्ण करण्याच्या उद्देशाने आरोग्य कर्मचार्‍यांनी केला असल्याचा आरोप आहे. मेहसाना जिल्ह्यात 175 नसबंदी ऑपरेशन करण्याचं टार्गेट ठरवण्यात आलं होतं. या प्रकरणावर जिल्हा आरोग्य अधिकारी आरोप फेटाळत असले तरी, टार्गेट पूर्ण करण्यासाठी अशी कार्यवाही करणं हे गंभीर प्रश्न उपस्थित करत आहे.

The post नसबंदीचे टार्गेट पूर्ण करण्यासाठी आरोग्य कर्मचार्‍यांचा धक्कादायक प्रकार: अविवाहित तरुणाला दारू पाजून शस्त्रक्रिया appeared first on थोडक्यात घडामोडी.

मुंबई : बंगालच्या उपसागरात कमी दाबाचे क्षेत्र झाल्यामुळे राज्यात पावसाने जोर धरला आहे. मुंबईसह मराठवाड्यात पाऊस सुरूच असून आजही मराठवाड्यात काही ठिकाणी मुसळधार ते अतिमुसळधार पावसाची शक्यता वर्तवण्यात आली आहे.

मुंबई, ठाणे, पालघर, उत्तर मध्य महाराष्ट्र आणि गुजरात राज्यासह उत्तर कोकणात ढगांची मोठ्या प्रमाणात गर्दी दिसत असल्याने मुंबईसह उपनगरात व अलिबाग, ठाणे, माथेरान, कल्याण येथे मुसळधार पावसाची शक्यता हवामान खात्यानं वर्तवली आहे. तसंच, नाशिक, धुळे, जळगाव, नंदुरबार या जिल्ह्यांत मुसळधार पावसाची शक्यता आहे. काही भागात वादळी वारे वाहण्याचा अंदाज वर्तवण्यात आला आहे.

latest satellite obs at 10 am, 1 st Sept, indicates dense clouds over North Konkan including Mumbai Thane Palghar, North Madhya Mah and Gujarat state.
Watch for severe weather warnings from IMD for these regions. pic.twitter.com/ctJM03rZhu

— K S Hosalikar (@Hosalikar_KS) September 1, 2021

The post ‘या’ जिल्ह्यांत मुसळधार पावसाची शक्यता, काही भागांत वादळी वारे वाहण्याचा अंदाज appeared first on थोडक्यात घडामोडी.

गुजरात : गुजरातचे राज्यपाल आचार्य देवव्रत यांनी लव्ह जिहाद कायद्याला मान्यता दिली आहे. त्यानुसार, जबरदस्तीने धर्मांतर करणार्‍यांवर आणि फसवणूक करुन विवाह करणार्‍यांवर कायदेशीर कारवाई केली जाईल. 15 जूनपासून गुजरात राज्यात हा कायदा लागू होणार आहे. मुख्यमंत्री विजय रुपाणी यांनी हा निर्णय घेतला आहे. लव्ह जिहाद विधेयक गुजरात विधानसभेत जोरदार गदारोळात पारित झाले.

गुजरातचे राज्यपाल आचार्य देवव्रत यांनी नुकतीच लव्ह जिहाद कायद्याला मान्यता दिली होती. त्यानंतर राज्यात लव्ह जिहादसंदर्भात प्रभावी कायदा करण्यात आला. राज्यात हा कायदा अंमलात आणण्यामागील हेतू असा आहे की कोणीही बळजबरीने किंवा कोणत्याही प्रकारच्या हिंसाचाराने कुणाचा धर्म बदलू शकणार नाही.

लव्ह जिहाद कायद्यानुसार,

1. फसवणूक करून लग्न करून धर्मांतर करण्यास भाग पाडल्यास 10 वर्षांच्या तुरूंगवासाची तरतूद आहे.
2. धर्म लपवून लग्न करणार्‍यांना पाच वर्ष कैद आणि दोन लाख रुपये दंड
3. धर्म लपवून अल्पवयीन मुलीशी लग्न केल्यास सात वर्षांची शिक्षा किंवा तीन लाख रुपये दंड अशी तरतूद आहे.
4. कायद्याचे उल्लंघन करणार्‍यांना तीन लाख रुपये दंड आणि सात वर्षांच्या तुरूंगवासाची तरतूद आहे.

The post गुजरातमध्ये लव्ह जिहाद कायदा होणार लागू, जाणून घ्या या कायद्यानुसार शिक्षेची तरतूद appeared first on थोडक्यात घडामोडी.

गुजरात : गुजरातच्या सूरत शहरात कोरोनाने अवघ्या 14 दिवसांच्या चिमुकलीचा बळी घेतल्याची दुःखद घटना घडली आहे. डॉक्टरांनी चिमुकलीला वाचवण्याचा प्रयत्न केला. तिच्यावर प्लाझ्मा थेरपीचा देखील वापर करण्यात आला. मात्र, चिमुकलीचा मृत्यू झाला. या बाळाला जन्मानंतर दोन दिवसात कोरोनाची लागण झाली होती.

चिमुकलीच्या आईला आधीपासूनच कोरोनाची लक्षणे जाणवत होती. मात्र, तिने याकडे दुर्लक्ष केले. तिच्या या चुकीमुळे जन्मानंतर दोन दिवसात बाळाला कोरोनाची लागण झाली. त्यानंतर सूरतच्या वराछा येथील डायमंड रुग्णालयात या बाळावर उपचार सुरु होते. पण उपचारादरम्यान तिचा मृत्यू झाला.

सूरतमध्ये गेल्या 30 दिवसात 10 वर्षांखालील 286 लहान मुलांना कोरोनाची लागण झाल्याची माहिती समोर आली आहे. आतापर्यंत तीन चिमुकल्यांचा कोरोनामुळे मृत्यू झाला. तसेच, लहान मुलांसाठी कोरोनाची दुसरी लाट जास्त धोकादायक असल्याचं मत तज्ज्ञ वारंवार मांडत आहेत. त्यामुळे आता नवीन चिंता सर्वांना भेडसावत आहे.

The post कोरोनाच्या लक्षणांकडे आईने केलं दुर्लक्ष, 14 दिवसांच्या चिमुकलीचा दुर्दैवी मृत्यू appeared first on थोडक्यात घडामोडी.

जागतिक महिला दिनी तरुणीवर सामूहिक बलात्काराची धक्कादायक घटना घडली आहे. राजस्थान येथील अजमेरमध्ये गुजरातच्या एका तरुणीवर सामूहिक बलात्कार करण्यात आला. त्यानंतर तिला बेशुद्धावस्थेत रस्त्यावर फेकून आरोपी तेथून पसार झाले. पोलिसांनी तरुणीला JLN रुग्णालयात दाखल केले असून तिच्यावर उपचार सुरू आहेत.

मिळालेल्या माहितीनुसार, रामगंज पोलीस ठाण्याच्या हद्दीत काही पोलीस कर्मचारी गस्त घालत होते. त्यावेळी त्यांना एक तरुणी बेशुद्धावस्थेत रस्त्यावर पडलेली आढळली. पोलिसांनी तिची अवस्था बघून तिला तात्काळ रुग्णालयात दाखल केले. तिच्यावर उपचार सुरू आहेत. दरम्यान, महिला पोलिसांनी तिचा जबाब नोंदवून घेतला. या तरुणीने जबाबात सांगितले कि, “काही तरुणांनी तिला अज्ञात ठिकाणी नेले आणि तिथे तिच्यावर बलात्कार केला. त्यानंतर तिला तिथेच सोडून ते तेथून पळून गेले.”

पोलिसांनी दिलेल्या माहितीनुसार, पीडित तरुणी गुजरातची आहे. तिच्यावर रुग्णालयात उपचार सुरू आहेत. पीडितेचा जबाब नोंदवण्यात आला असून आरोपींचा शोध सुरू करण्यात आला आहे. या प्रकरणी गुन्हा दाखल केला आहे. तसेच पुढील तपास सुरु आहे. घटनास्थळावरील सीसीटीव्ही फुटेज देखील तपासले जात आहेत.

The post महिला दिनी तरुणीवर सामूहिक बलात्कार, बेशुद्धावस्थेत रस्त्यावर फेकून आरोपी पसार appeared first on थोडक्यात घडामोडी.

गुजरातमधील मोटेरा स्टेडियमचे नामकरण नरेंद्र मोदी स्टेडियम असे करण्यात आल्याने भाजपवर टीका होत आहे. या विषयावरून आता वंचित बहुजन आघाडीचे नेते प्रकाश आंबेडकर यांनी देखील पंतप्रधान मोदींवर बोचरी टीका केली आहे. नरेंद्र मोदींचा लोकांवर विश्वास नाही, की मृत्यूनंतर कोणी आपल्याला लक्षात ठेवेल की नाही. म्हणून मृत्यूआधी स्टेडियम आपल्या नावे करुन घेतलं, असं प्रकाश आंबेडकर यांनी म्हटलं आहे.

केंद्रीय गृहमंत्री अमित शहा यांच्या मतदारसंघामध्ये हे भव्य स्टेडियम उभारण्यात आलं आहे. या स्टेडियमचे नामकरण नरेंद्र मोदी स्टेडियम असे करण्यात आले. यावरुनच प्रकाश आंबेडकर यांनी नरेंद्र मोदींवर निशाणा साधला आहे. त्यांनी ट्वीट करत म्हटलं कि, “काय नेता मिळाला आहे देशाला. यांना लोक आपल्याला विसरुन जातील याची चिंता आहे. यांचा लोकांवर विश्वास नाही, की मृत्यूनंतर कोणी आपल्याला लक्षात ठेवेल की नाही. म्हणूनच मृत्यूआधी स्टेडियम आपल्या नावे करुन घेतलं.”

क्या नेता मिला है देश को। इनको चिंता है कहीं लोग इन्हें भूल न जाए। इन्हें लोगों पर भरोसा नही है कि गुजर जाने के बाद कोई इन्हे याद रखेगा या नही। इसीलिए मरने से पहले स्टेडियम अपने नाम पर करा लिया।#MoteraCricketStadium

— Prakash Ambedkar (@Prksh_Ambedkar) February 24, 2021

The post ..म्हणूनच मृत्यूआधी स्टेडियम आपल्या नावे करुन घेतलं, प्रकाश आंबेडकर यांची मोदींवर बोचरी टीका appeared first on थोडक्यात घडामोडी.

अहमदाबाद : मोटेरा स्टेडियमचे नाव नरेंद्र मोदी स्टेडियम असे ठेवण्यात आले आहे. हे जगातील सर्वात मोठे क्रिकेट मैदान आहे. भारत आणि इंग्लंड यांच्यात चार सामन्यांच्या कसोटी सामन्यांच्या मालिकेतील तिसरा कसोटी सामना आज अहमदाबादच्या या स्टेडियमवर खेळला जाईल. तत्पूर्वी आज राष्ट्रपती रामनाथ कोविंद यांनी गुजरातच्या अहमदाबाद येथील नरेंद्र मोदी स्टेडियमचे उद्घाटन केले. उयावेळी केंद्रीय गृहमंत्री अमित शहा देखील उपस्थित होते.

मोटेरा स्टेडियमची वैशिष्ट्ये :

1. मोटेरा हे जगातील सर्वात मोठे क्रिकेट स्टेडियम आहे, ज्यात 1 लाख 10 हजार प्रेक्षक बसण्याची क्षमता आहे.
2. हे स्टेडियम 63 एकरांवर बांधले गेले आहे. स्टेडियममध्ये चार ड्रेसिंग रूम आणि तीन सराव मैदान आहेत.
3. त्यात अंतर्गत आणि मैदानी सराव दोन्ही सुविधा आहेत.
4. इथली ड्रेनेज सिस्टम इतकी आधुनिक आहे की पाऊस थांबल्यानंतर अवघ्या अर्ध्या तासाने सामना सुरू होऊ शकतो.
5. हे देशातील पहिले स्टेडियम आहे जेथे विशेष LED लाईट देखील लावण्यात आले आहेत.

The post ब्रेकिंग : मोटेरा स्टेडियमचे नाव झाले ‘नरेंद्र मोदी स्टेडियम’, जाणून घ्या या स्टेडियमची खास वैशिष्ट्ये appeared first on थोडक्यात घडामोडी.

भारताविरूद्ध पाकिस्तानच्या कुरापती नेहमी सुरु असतात. दहशतवाद्यांना भारतात आणण्यासाठी पाकिस्तान आता जम्मू-काश्मीर आणि पंजाब व्यतिरिक्त आता राजस्थान आणि गुजरातमधून घुसखोरी करण्याचा प्रयत्न करीत आहे. सीमा सुरक्षा दलाने (बीएसएफ) जाहीर केलेल्या आकडेवारीनुसार अलिकडच्या काळात घुसखोरीच्या घटनांमध्येही वाढ झाली आहे.

BSF च्या अधिकाऱ्यांनी दावा केला आहे कि, दहशतवाद्यांना भारतात पाठविण्याकरिता पाकिस्तान वेगवेगळ्या मार्गांचा शोध घेत आहे. आमचे सैनिक पूर्णपणे सतर्क आहेत आणि 24 तास सीमेवर निगराणी करत आहेत. ते म्हणाले की, बीएसएफ आपल्या जवानांची पोझिशन इंटेलिजन्स इनपुटनुसार सतत अपडेट करत राहतात.

यावर्षी नोव्हेंबरच्या पहिल्या आठवड्यापर्यंत 11 घुसखोरीच्या घटना घडल्याचे बीएसएफच्या अधिकाऱ्यांनी सांगितले. जम्मू, काश्मीर, पंजाब, राजस्थान आणि गुजरातला लागून असलेल्या सीमेवर ही घुसखोरी करण्यात आली. यावर्षी जम्मू आणि पंजाब सीमेवरुन सर्वाधिक घुसखोरीच्या घटना घडल्या आहेत.

नोव्हेंबर महिन्यात जम्मू-काश्मीरच्या सांबा सेक्टरमधील आंतरराष्ट्रीय सीमेवर बीएसएफने दीडशे मीटर लांबीचा बोगदा शोधून काढला होता आणि एका घुसखोरालाही ठार केले होते. बीएसएफचे IG एनएस जामवाल म्हणाले होते की आंतरराष्ट्रीय सीमेवर हा बोगदा शोधल्यामुळे हे स्पष्ट होते की पाकिस्तानी सैन्य दहशतवाद्यांना मदत करत आहे.

The post दहशतवाद्यांना भारतात पाठविण्याकरिता पाकिस्तान घेत आहे नव्या मार्गांचा शोध appeared first on थोडक्यात घडामोडी.

गुजरातचा अमूल घोटाळा या दिवसात चर्चेत आहे. कोट्यवधी रुपयांच्या या घोटाळ्यात पोलिसांनी काल दूध सागर डेअरीचे माजी अध्यक्ष आणि राज्याचे माजी गृहमंत्री विपुल चौधरी यांना अटक केली. आर्थिक अनियमितता आणि पदाचा गैरवापर केल्याचा आरोप तक्रारदार भगवान भाई चौधरी यांनी मेहसाना पोलिस स्टेशनमध्ये विपुल चौधरी यांच्याविरुद्ध केला होता.

गांधीनगर सीआयडी गुन्हेगारी शाखेच्या म्हणण्यानुसार दुध सागर डेअरीचे माजी अध्यक्ष विपुल चौधरी, वर्तमान अध्यक्ष आशा ठाकोर, उपाध्यक्ष मोघजी ठाकोर, व्यवस्थापकीय संचालक यांच्यासह 3० अधिका्यांनी दुग्धशाळेतील 1932 कर्मचाऱ्यांना अतिरिक्त बोनस म्हणून सुमारे 15 कोटी रुपये देऊन अर्ध्याहून अधिक रक्कम विपुल चौधरी यांच्या खात्यात जमा केली.

काय आहे संपूर्ण प्रकरण :

मेहसाणा सहकारी दूध उत्पादक संघटनेचे अध्यक्ष असताना विपुल चौधरी यांनी सन 2013 मध्ये सुमारे 22 कोटी रुपयांचा पोषण आहार महाराष्ट्रात पाठविला होता . २०१4 मध्ये सहकारी निबंधकांकडे तक्रार केली गेली, त्यानंतर कुलसचिवांनी जानेवारी २०१5 मध्ये विपुल चौधरी यांना नोटीस बजावली. यावर, जुलै 2018 मध्ये सहकारी न्यायाधिकरणाने चौधरी यांना ऑक्टोबर 2018 पर्यंत 9 कोटी 10 लाख रुपये जमा करण्याचे आदेश दिले.

या प्रकरणात, विपुल चौधरी यांचं म्हणणं आहे कि, दुष्काळात महाराष्ट्रात विनामूल्य पोषण पाठविणे हा भ्रष्टाचार नाही. चौधरी यांच्या म्हणण्यानुसार सुमारे 11. 25 कोटी रुपये जमा केले असून यासाठी त्यांना त्यांची जमीनदेखील तारण म्हणून ठेवावी लागली आहे.

The post अमूल घोटाळा : गुजरातचे माजी गृहमंत्री विपुल चौधरी यांना अटक appeared first on थोडक्यात घडामोडी.