नवी दिल्ली : केंद्र सरकारने सोशल मीडियासाठी काही गाईडलाईन्स घालून दिल्या आहेत. त्यावरून अनेक प्रकारच्या चर्चा सुरु असून WhatsApp ने केंद्र सरकारच्या या गाईडलाईन्स मान्य करण्यास नकार दिला आहे. दिल्ली उच्च न्यायालयात यासंदर्भात व्हॉट्सअ‍ॅपकडून भारत सरकारविरूद्ध कायदेशीर याचिका दाखल करण्यात आली असून त्यासंदर्भात अद्याप सुनावणी झालेली नाही. मात्र, त्यावर आता केंद्र सरकारकडून भूमिका स्पष्ट करण्यात आली आहे.

केंद्रीय माहिती व तंत्रज्ञान मंत्री रवीशंकर प्रसाद यांनी म्हटलं आहे कि, “राईट टू प्रायव्हसीच्या नावाखाली व्हॉट्सअ‍ॅपकडून केंद्र सरकारची मार्गदर्शक नियमावली नाकारणं ही दिशाभूल आहे.” व्हॉट्सअ‍ॅपच्या भूमिकेवर स्पष्टीकरण करणारं परिपत्रक देखील केंद्र सरकारकडून जारी करण्यात आलं आहे.

Government is committed to ensure the Right of Privacy to all its citizens but at the same time it is also the responsibility of the government to maintain law and order and ensure national security.- says @rsprasad

Details: https://t.co/x45IqRnnVl

— PIB_India MeitY (@MeityPib) May 26, 2021

ब्रेकिंग : WhatsApp कडून भारत सरकारविरूद्ध कायदेशीर तक्रार दाखल, अनेकांनी केले व्हॉट्सअ‍ॅपच्या लढ्याचे समर्थन

The post राईट टू प्रायव्हसीच्या नावाखाली व्हॉट्सअ‍ॅपकडून दिशाभूल, केंद्र सरकारकडून स्पष्टीकरण appeared first on थोडक्यात घडामोडी.

नवी दिल्ली : बंगालच्या उपसागरात तयार होणारे वादळ आज चक्रीवादळामध्ये रूपांतरित होऊ शकते. जर ते चक्रीवादळात रूपांतरित झाले, तर त्याचे नाव ‘यास’ असेल. ओमानने चक्रीवादळाचे नाव निश्चित केले आहे. पूर्व किनाऱ्यावर सुरक्षा आणि बचावाची तयारी सुरू करण्यात आली आहे. आंध्र प्रदेश, ओडिसा, तामिळनाडू, पश्चिम बंगाल आणि अंदमान निकोबारमध्ये हाय अलर्ट जारी करण्यात आला आहे.

बंगाल आणि ओडिसाला या वादळाचा सर्वाधिक फटका बसेल. तर अंदमान निकोबार आणि पूर्व किनारपट्टीच्या काही भागात मुसळधार पाऊस पडण्याची शक्यता आहे. यामुळे पुराचा धोका देखील उद्भवू शकतो. ओडिसा सरकारने वादळाचा संभाव्य धोका लक्षात घेता आपल्या 30 ते 40 जिल्ह्यांना सतर्कतेचा इशारा दिला आहे.

तटरक्षक दल, आपत्ती निवारण दल (DRT), इन्फ्लाटेबल बोट्स, लाइफबॉयज आणि लाइफजेकेट्स यांच्यासह डॉक्टरांची  पथके आणि ऍम्ब्युलन्स तयार ठेवण्यात आले आहेत. बंदर प्राधिकरणे, ऑईल रिग ऑपरेटर, शिपिंग मत्स्यव्यवसाय अधिकारी आणि मच्छीमार संघटना यांना चक्रीवादळाविषयी माहिती देण्यात आली आहे. पूर्वेकडील किना-यावर मासेमारीवर बंदी घालण्यात आली आहे. तटरक्षक दल डोर्नियर विमान आणि जहाजे समुद्रात काम करणाऱ्या मच्छीमारांना हवामानाची माहिती देत आहेत. याव्यतिरिक्त, त्यांना जवळच्या बंदरात परत जाण्याच्या सूचना देण्यात आल्या आहेत. ICG ने जवळील सर्व राज्ये आणि केंद्रशासित प्रदेशांना बंदरांवर उपस्थित असलेल्या लोकांची माहिती ठेवण्याचे आवाहन केले आहे.

ICG प्रवक्त्याच्या म्हणण्यानुसार, बंगालच्या उपसागरातील हवामानावर निरंतर नजर ठेवली जात आहे. तामिळनाडू, पुद्दुचेरी, आंध्र प्रदेश, ओडिसा, पश्चिम बंगाल आणि अंदमान निकोबार बेटांवर ICG रिमोट ऑपरेटिंग स्टेशन (ROS) च्या मदतीने अलर्ट पाठविले जात आहे.

#Pre-emptive measures for likely #CycloneYaas continues. @IndiaCoastGuard ships and aircraft on East coast relayed weather warning to mariners & fishermen at sea. Shipping, Ports, fisheries, Oil rigs and other shore authorities also informed about likelihood of cyclone. pic.twitter.com/c8bdoOVXS7

— Indian Coast Guard (@IndiaCoastGuard) May 21, 2021

केंद्राने राज्यांसाठी जारी केल्या गाईडलाईन्स :

1. आपत्कालीन आदेश प्रणाली, आपत्कालीन ऑपरेशन सेंटर आणि नियंत्रण कक्ष तात्काळ सक्रिय करा. नोडल अधिकारी तैनात करा आणि त्यांचे कॉन्टॅक्ट डिटेल आरोग्य मंत्रालयाला उपलब्ध करून द्या.
2. किनारी राज्यातील सर्व जिल्ह्यांमध्ये हॉस्पिटल आपत्ती व्यवस्थापन योजना सुरू करा. या रुग्णालयांमध्ये आपत्कालीन परिस्थितीसाठी असलेल्या तयारीचा आढावा घ्यावा.
3. वादळाच्या मार्गावर येत असलेल्या भागातील सामुदायिक वैद्यकीय केंद्रे आणि रुग्णालयांमधील रुग्णांना उंच ठिकाणी असलेल्या मोठ्या रूग्णालयात हलविण्यासाठी आगाऊ योजना तयार करा.
4. आरोग्य संघटनांनी कोरोना व्यतिरिक्त डेंग्यू, मलेरिया, सर्दी-खोकला, चेचक यासारख्या आजारांसाठी देखील तयार राहावे.
5. कोविड केंद्रांसह चक्रीवादळग्रस्त भागातील सर्व आरोग्य केंद्रे आणि रुग्णालयांमध्ये पुरेसे मनुष्यबळ असले पाहिजे. ही सर्व केंद्रे पूर्णपणे कार्यरत असणे आवश्यक आहे.
6. रुग्णालयांमध्ये वीज, पाणी व इंधनाचा पुरेसा पुरवठा असल्याचं सुनिश्चित करा.
7. जोरदार वारे आणि मुसळधार पावसामुळे वाहतुकीवर परिणाम होऊ शकतो. आणीबाणीचा विचार करता आवश्यक औषधांचा साठा आगाऊ गोळा करा. ओआरएस, क्लोरीनच्या गोळ्या, ब्लीचिंग पावडर आणि कोरोनावर उपचार करण्यासाठी वापरल्या जाणार्‍या इतर औषधांची व्यवस्था करून ठेवा. कोविड आणि नॉन-कोविड या दोन्ही प्रकारच्या हॉस्पिटलसाठी ही व्यवस्था आवश्यक आहे.

The post आज उद्भवू शकतो ‘यास’ चक्रीवादळाचा धोका, ‘या’ राज्यांत हाय अलर्ट, केंद्राने जारी केल्या गाईडलाईन्स appeared first on थोडक्यात घडामोडी.

मुंबई : राज्यात कोरोना रुग्णसंख्या झपाट्याने वाढत आहे. रुग्णसंख्येत विक्रमी वाढ झाल्यामुळे स्थिती नियंत्रणात ठेवण्यासाठी राज्य सरकारने कठोर निर्णय घेतले आहेत. राज्य सरकारने नव्याने गाईडलाईन्स जारी केल्या आहेत.

काल राज्यात सर्वाधिक २५ हजार नवीन रुग्ण सापडले होते. त्यामुळं सरकारकडून हॉटेल व मंगल कार्यालयांवर निर्बंध लावण्यात आले होते. त्यानंतर आज सरकारने नव्यानं गाईडलाईन्स जारी करत खासगी कार्यालयांवर निर्बंध घातले आहेत.(आरोग्य व इतर अत्यावश्यक सेवा व आस्थापना तसेच मॅन्युफॅक्चरिंग क्षेत्र यातून वगळण्यात आले आहेत.)

गाइडलाईन्स :

1. राज्यातील सर्व खासगी कार्यालये आणि आस्थापनांमध्ये 50 टक्के कर्मचारी संख्या ठेवण्याचे निर्देश
2. नाट्यगृहे आणि सभागृहे यामधील उपस्थिती देखील 50 टक्के असावी
3. सर्व शासकीय आणि निमशासकीय कार्यालयांच्या विभाग आणि कार्यालय प्रमुखांनी कोविड परिस्थिती लक्षात घेऊन त्यांच्या कार्यालयातील कर्मचाऱ्यांची उपस्थिती किती ठेवायची ते निश्चित करावे
4. धार्मिक, सामाजिक, राजकीय , सांस्कृतिक मेळावे व सभा अशा इतर कारणांसाठी गर्दी करता येणार नाही

महाराष्ट्रात कोरोनाचा उद्रेक, कोरोना रुग्णसंख्येचे आजवरचे सर्व रेकॉर्ड मोडले

The post राज्य सरकारने जारी केल्या कोरोनाच्या नव्या गाईडलाईन्स, दिल्या ‘या’ सूचना appeared first on थोडक्यात घडामोडी.

नवी दिल्ली : लैंगिक छळ केलेल्या एका आरोपीला पीडित मुलीकडून राखी बांधून घेण्याच्या अटीवर जामीन मंजूर करण्याचा मध्य प्रदेश उच्च न्यायालयाने घेतलेला निर्णय सुप्रीम कोर्टाने रद्दबातल केला आहे. तसेच सुप्रीम कोर्टाने अशा प्रकरणांची गंभीर दखल घेत त्याबाबत मार्गदर्शक सूचनाही (Supreme Court Guidelines) जारी केल्या आहेत. लैंगिक गुन्ह्यांशी संबंधित प्रकरणांमध्ये महिलांविरूद्ध रुढीवादी भूमिका टाळण्याचा सल्ला सर्वोच्च न्यायालयाने यावेळी दिला आहे. तसेच पीडित आणि आरोपी यांच्यात लग्न, सलोखा किंवा तडजोड करण्याची सूचना किंवा पर्याय न्यायालयाने आपल्या वतीने देऊ नये, असंदेखील सुप्रीम कोर्टाने स्पष्ट केलं आहे.

सुप्रीम कोर्टाच्या गाईडलाईन्स :

1. सुप्रीम कोर्टाने म्हटले आहे की जामीन देण्याच्या अटींमध्ये आरोपी व पीडित यांच्यादरम्यान संपर्क होणार नाही याची काळजी घेत तशी परवानगी देऊ नये. जामीन अटींमध्ये आरोपींकडून होणाऱ्या कोणत्याही छळापासून तक्रारदाराला वाचविण्याचा प्रयत्न केला पाहिजे.
2. सुप्रीम कोर्टाने सांगितले आहे की तक्रारदार / फिर्यादी पक्षाची सुनावणी जेथे आवश्यक वाटेल तेथे केली जाऊ शकते. कारण अशी काही विचित्र परिस्थिती असू शकते, ज्यामुळे त्यांच्या संरक्षणासाठी अतिरिक्त अटींची आवश्यकता असू शकते.
3. सुप्रीम कोर्टाने स्पष्ट केले आहे की जर जामीन मंजूर करण्यात आला, तर तक्रारदारास त्वरित आरोपीला जामीन मंजूर झाल्याची माहिती कळवावी.
4. जामीन अटींमध्ये, महिला आणि समाजातील त्यांचे स्थान याविषयी रूढीवादी किंवा पुरुषप्रधान विचारांपासून दूर राहून सूचना देण्यात याव्यात. फौजदारी प्रक्रियेची संहिता (सीआरपीसी) च्या आवश्यकतेनुसार कठोरता असणे आवश्यक आहे.
5. कोर्टाने केसची सुनावणी करताना पीडित आणि आरोपी यांच्यात लग्न करण्याची किंवा तडजोड करण्याची कोणतीही कल्पना सुचवू नये किंवा अशी अट / सूचना देऊ नये, कारण हे त्यांच्या अधिकार व कार्यक्षेत्रात येत नाही.
6. कोर्टाला त्यांच्या कार्यक्षेत्र किंवा अधिकाराची मर्यादा माहित असणे आवश्यक आहे. त्या लक्ष्मण रेषेच्या पलीकडे जाऊ नका. संवेदनशीलता प्रत्येक टप्प्यावर दिसायला हवी.
7. सर्वोच्च न्यायालयाने निर्देश दिले की चर्चा, युक्तिवाद, आदेश आणि निर्णयात प्रत्येक वेळी वेदनेची जाणीव कोर्टाला देखील असायला हवी. विशेषतः न्यायाधीशाने बोलताना अधिक काळजीपूर्वक, संवेदनशील असले पाहिजे, जेणेकरून पीडितेचा आत्मविश्वास वाढेल. यामुळे पीडितेचा आत्मविश्वास डगमगणार नाही आणि कोर्टाच्या निष्पक्षतेवर कोणताही परिणाम होणार नाही.

The post मोठी बातमी : लैंगिक छळ प्रकरणात कोर्टाने ‘असे’ सल्ले देऊ नयेत, सुप्रीम कोर्टाने जारी केल्या ‘या’ गाईडलाईन्स appeared first on थोडक्यात घडामोडी.

मुंबई : कोरोनाचे रुग्ण वाढत असल्याने मुंबई महानगरपालिकेने कोरोनासंदर्भात मार्गदर्शक सूचना जाहीर केल्या आहेत. पाचपेक्षा अधिक रुग्ण आढळणारी इमारत सील केली जाणार असून गृह विलगीकरण केल्या जाणाऱ्या राहिवाशांच्या हातावर शिक्के मारले जाणार आहेत. विना मास्क फिरणाऱ्यांवर कारवाई करण्यात येणार असून मंगल कार्यालये, क्लब, उपहारगृहे या ठिकाणी धाडी टाकण्याचे स्पष्ट आदेश पालिका आयुक्त इक्बालसिंह चहल यांनी दिले आहेत.

कोरोनासंदर्भात नव्याने जारी करण्यात आलेल्या गाईडलाईन्स :

1. लक्षण विरहित रुग्णांना घरी विलगीकरण (होम क्वारंटाइन) करण्यात येते. अशा रुग्णांवर पूर्वीप्रमाणे हातावर शिक्के मारण्यात यावेत. तसेच त्यांची माहिती संबंधित सोसायटींना कळवावी. वॉर्ड वॉर रुम्सच्या माध्यमातून त्यांच्यारवर बारकाईने नजर ठेवावी. अशा व्यक्तिंना दिवसातून ५ ते ६ वेळा दूरध्वनीवर संपर्क साधून ते घरी असल्याची खातरजमा करावी. बाधित व्यक्तिंची योग्य माहिती ठेवून त्यांच्या नजीकच्या संपर्कातील व्यक्तिंचे विलगीकरण करावे. या रुग्णांचा विलगीकरण कालावधी पूर्ण होण्या‍आधी रुग्ण घराबाहेर पडला, सार्वजनिक ठिकाणी फिरला तर त्याची माहिती सोसायट्यांनी महानगरपालिकेच्या वॉर्ड वॉर रुमला कळवावी. वॉर्ड वॉर रुमने अशा रुग्णांवर गुन्हे दाखल करण्याची कार्यवाही करावी. तसेच अशा रुग्णांना सक्तीने संस्थात्मक विलगीकरण करावे.
2. ज्या रहिवासी इमारतींमध्ये पाचपेक्षा अधिक रुग्ण आढळतील, अशा निवासी इमारती प्रतिबंधित (सील) करण्यात याव्यात.
3. मंगल कार्यालये, जिमखाना/क्लब्ज, नाइट क्लब, उपहारगृह, चित्रपटगृह, सर्वधर्मिय स्थळ, खेळाची मैदाने व उद्याने, सार्वजनिक ठिकाणे, शॉपिंग मॉल तसेच सर्व खासगी कार्यालये अशा सर्व ठिकाणी मास्कचा वापर बंधनकारक आहे. मास्कचा वापर होत नसल्याचे आढळल्यास आणि ५० पेक्षा अधिक व्यक्ती एकावेळी आढळल्यास संबंधित व्यक्तिंना दंड करण्यासोबत त्या-त्या ठिकाणच्या आस्थापनांवर, व्यवस्थापनांवर गुन्हे दाखल करण्यात यावेत.
4. लग्न सोहळ्यांचे आयोजन होणारे सभागृह, मंगल कार्यालये येथे नियमितपणे तपासणी करावी. दररोज अशाप्रकारच्या किमान ५ जागांवर धाड टाकून तपासणी करावी. तिथे कोणत्यांही नियमांचे उल्लंघन झालेले असेल तर दंडात्मक कारवाई करून लग्नातचे आयोजक/पालक तसेच संबंधित व्यवस्थापनांवर देखील गुन्हे दाखल करावेत.
5. मास्कचा योग्यरित्या उपयोग न करणाऱ्या तसेच सार्वजनिक जागी थुंकणाऱ्या नागरिकांवर कारवाई करण्यासाठी मुंबईत सध्या कार्यरत असलेल्या २ हजार ४०० मार्शल्सची संख्या दुपटीने वाढवून ती ४ हजार ८०० इतकी करावी. विना मास्क फिरणाऱ्यांवर जरब बसवणे आवश्यक आहे. त्यादृष्टीने सध्या होत असलेली सरासरी १२ हजार ५०० नागरिकांवरील कारवाईची संख्या वाढवून दररोज संपूर्ण मुंबईत मिळून किमान २५ हजार नागरिकांवर दंडात्मक कारवाई करण्यात यावी.
6. मुंबईतील पश्चिम, मध्य आणि हार्बर उपनगरीय रेल्वे सेवांच्या गाड्यांमध्ये विना मास्क प्रवास करणाऱ्यांवर कारवाई करण्यासाठी प्रत्येक मार्गावर १०० याप्रमाणे एकूण ३०० मार्शल्स नेमून विनामास्क प्रवास करणाऱ्यांवर कारवाई करावी.
7. विनामास्क फिरणाऱ्यांवर कारवाई करण्यासाठी आता पोलिसांनाही अधिकार देण्या‍त येत असून पोलीस देखील मार्शल म्हणून नागरिकांकडून दंड आकारून कारवाई करु शकतील.
8. मुंबई महानगरपालिकेच्या मालकीच्या सर्व इमारती, कार्यालये, रुग्णालये आदी ठिकाणी आवश्यकतेनुसार महानगरपालिकेच्यात शिक्षकांची नियुक्ती करून त्यांना विना मास्क फिरणाऱ्यांवर दंडात्मक कारवाई करण्याचे अधिकार देण्यात येतील.
9. सर्वधर्मिय प्रार्थनास्थाळांच्या जागी पुरुषांप्रमाणेच महिला मार्शल नेमून तेथे नियमांचे पालन होत असल्याबाबत लक्ष ठेवण्यात येईल. विना मास्क फिरणे, ५० पेक्षा अधिक व्यक्तिंनी एकाचवेळी एकत्र येणे, अशा नियमांचे उल्लंघन केल्यास तेथेही कारवाई करण्यात येईल.
10. खेळाच्या मैदानांवर व उद्यानांमध्ये देखील विना मास्क आढळणाऱ्यांवर कारवाई करण्यात येईल.
11. कोविड बाधित रुग्णांची संख्या अधिक असलेल्या विभागांमध्‍ये मिशन झिरोच्या धर्तीवर कार्यवाही सुरू करावी. ज्या विभागांमध्ये नवीन रुग्ण मोठ्या संख्येने आढळून येत आहेत, तेथे एरिया मॅपिंग करून, त्या क्षेत्रांमध्ये जास्तीत जास्त संख्ये‍ने चाचण्या करण्यात याव्यात. तसेच अशा परिसरांमध्ये प्रति रुग्णामागे किमान १५ नजीकच्या संपर्कातील व्यक्ती (हायरिस्क कॉन्टॅक्ट) शोधून त्यांना विलगीकरणात ठेवावे.
12. झोपडपट्टी, अरुंद वस्ती, दाट वस्तींमध्ये बिगरशासकीय संस्थांच्या मदतीने आरोग्य तपासणी शिबिरांचे आयोजन करून संशयितांची तपासणी करावी. फिरत्या दवाखान्यांच्या (मोबाइल व्हॅन) माध्यमातून रुग्ण शोध मोहीम सुरु ठेवावी. चाचण्या कराव्यात.
13. प्रत्येक विभाग कार्यालयाच्या हद्दीमध्ये हाय रिस्क कॉन्टॅक्टमधील व्याक्तिंसाठी करोना केअर सेंटर १ आणि लक्षणे नसलेल्या बाधितांसाठी करोना केअर सेंटर २ असे दोन्‍ही संवर्गातील प्रत्येकी किमान एक केंद्र कार्यान्वित ठेवावे.
14. जम्बो कोविड सेंटरमधील क्षमतांचा आढावा घेऊन नियमित रुग्णशय्या, ऑक्सिजन रुग्णशय्या यांची पुरेशी उपलब्धता ठेवावी.
15. मुंबई महानगरपालिका क्षेत्रातील सर्व शासकीय तसेच खासगी रुग्णालयांतून कोविड रुग्ण, रुग्णशय्या व इतर आवश्यक माहिती दर तासाने संकलित करून ती माहिती डॅशबोर्डच्या माध्यमातून आपत्कालीन व्यवस्थापन खात्याने अद्ययावत करावी.
16. केंद्र सरकारच्या नियमावलीप्रमाणे आता ब्राझिलमधून भारतात येणाऱ्या प्रवाशांनाही संस्थात्मक विलगीकरणात रहावे लागणार आहे. यामुळे मुंबई विमानतळावर ब्राझिलमधून येणाऱ्या प्रवाशांना सक्तीने सात दिवसांच्या संस्थात्मक विलगीकरणात ठेवण्याचा निर्णय मुंबई महानगरपालिका प्रशासनाने घेतला असून त्याची अंमलबजावणी सुरू करण्यात आली आहे.

The post कोरोनासंदर्भात BMC ने नव्याने जारी केल्या गाईडलाईन्स, जाणून घ्या… appeared first on थोडक्यात घडामोडी.