अभिनेत्री पायल रोहतगीला अहमदाबाद पोलिसांनी केली अटक

अहमदाबाद : अभिनेत्री पायल रोहतगी हिला अहमदाबाद पोलिसांनी अटक केली आहे. तिच्यावर सोसायटीच्या अध्यक्षांना शिवीगाळ केल्याचा आरोप आहे. पायलच्या वडिलांनी 4-5 वर्षांपूर्वी या सोसायटीत घर विकत घेतले होते. पायल आणि सोसायटीतील सदस्यांमध्ये बराच काळापासून वाद सुरु होता. हे संपूर्ण प्रकरण अहमदाबादच्या सुंदरबन एपिटॉम सोसायटीमधील आहे.

मिळालेल्या माहितीनुसार, पायल 20 जून रोजी सोसायटीची सदस्य नसतानाही सोसायटीच्या सर्वसाधारण वार्षिक सभेत हजर होती. मात्र, त्यावेळी तिला बैठकीत बोलू दिलं नाही, त्यामुळे पायलने सदस्यांसोबत वाद घातला होता. सोसायटीतील सदस्यांबरोबर पायल छोट्या–छोट्या गोष्टींवरून बर्‍याचवेळा वाद घालते, अशी देखील तक्रार आहे. पायलवर सोसायटीच्या अध्यक्षांना जिवे मारण्याची धमकी दिल्याचा आरोप आहे. सोसायटीचे काही सदस्यांच्या म्हणण्यानुसार, लहान मुले सोसायटीच्या आवारात खेळताना दिसल्यास त्यांच्याबरोबरही तिचे वर्तन चांगले नसते. ती त्यांच्याशी देखील भांडते.